ಎಲ್ಲಿದ್ದೆ ಇಲ್ಲಿತನಕ’ ಅಂದ ಸೃಜಾಗೆ ಅದ್ದೂರಿ ತಾರಾ ಬಳಗದ ಸಾಥ್!

ಟಾಕಿಂಗ್ ಸ್ಟಾರ್ ಸೃಜನ್ ಲೋಕೇಶ್ ಅಭಿನಯದ ಬಹು ನಿರೀಕ್ಷಿತ ಚಿತ್ರ ಎಲ್ಲಿದ್ದೆ ಇಲ್ಲಿತನಕ. ತೇಜಸ್ವಿ ನಿರ್ದೇಶನದ ಈ ಸಿನಿಮಾ ಇದೇ ತಿಂಗಳ 11ರಂದು ತೆರೆಗಾಣುತ್ತಿದೆ. ಈಗಾಗಲೇ ಮೋಹಕ ಹಾಡುಗಳು ಮತ್ತು ಪ್ರಾಮಿಸಿಂಗ್ ಟ್ರೇಲರ್ ಮೂಲಕ ಎಲ್ಲರನ್ನು ತಲುಪಿಕೊಂಡಿರೋ ಈ ಚಿತ್ರ ಬರೀ ಸೃಜನ್ ಲೋಕೇಶ್ ಪಾಲಿಗೆ ಮಾತ್ರವಲ್ಲದೇ, ಪ್ರೇಕ್ಷಕರಲ್ಲಿಯೂ ಸ್ಪೆಷಲ್ ಫೀಲ್ ಹುಟ್ಟಿಸ ಬಲ್ಲ ಸಿನಿಮಾ ಆಗಿತ್ತದೆಂಬ ನಂಬಿಕೆ ಚಿತ್ರತಂಡದಲ್ಲಿದೆ.

ಸೃಜನ್ ಲೋಕೇಶ್ ಇಲ್ಲಿ ಚಾಲೆಂಜಿಂಗ್ ಆದ ಪಾತ್ರವನ್ನು ಆರಿಸಿಕೊಂಡಿದ್ದಾರೆ. ಅವರಿಗೆ ಮಜಾ ಟಾಕೀಸ್ ಶೋವನ್ನು ಯಶಸ್ವಿಗೊಳಿಸಿದ್ದ ಒಂದಿಡೀ ತಂಡ ಸಾಥ್ ಕೊಟ್ಟಿದೆ. ಇದರ ನಿರ್ದೇಶಕ ತೇಜಸ್ವಿ ಕೂಡಾ ಹಲವಾರು ವರ್ಷಗಳಿಂದ ಸೃಜನ್ ಬಳಗದಲ್ಲಿರುವವರು. ಅವರಲ್ಲದೇ ಮಜಾ ಟಾಕೀಸ್ನ ತಾಂತ್ರಿಕ ವರ್ಗ ಸೇರಿದಂತೆ ಇಡೀ ತಂಡವೇ ಎಲ್ಲಿದ್ದೆ ಇಲ್ಲಿತನಕ ಚಿತ್ರಕ್ಕೆ ಸಾಥ್ ನೀಡಿದೆ. ಇದರ ಜೊತೆಗೇ ಘಟಾನುಘಟಿ ಕಲಾವಿದರೂ ಕೂಡಾ ಸೃಜನ್ ಲೋಕೇಶ್ಗೆ ಸಾಥ್ ಕೊಟ್ಟಿದ್ದಾರೆ. ಅದು ಎಲ್ಲಿದ್ದೆ ಇಲ್ಲಿತನಕ ಚಿತ್ರದ ನಿಜವಾದ ತಾಕತ್ತೆಂಬುದರಲ್ಲಿ ಎರಡು ಮಾತಿಲ್ಲ.

ನಿರ್ದೇಶಕ ತೇಜಸ್ವಿ ಈ ಸಿನಿಮಾದ ಪುಟ್ಟ ಪುಟ್ಟ ಪಾತ್ರಗಳನ್ನೂ ಮಹತ್ವ ನೀಡಿಯೇ ರೂಪಿಸಿದ್ದಾರಂತೆ. ಇಲ್ಲ ಸುಳಿದಾಡೋ ಸಣ್ಣ ಪಾತ್ರಗಳೂ ಕೂಡಾ ನೋಡುಗರನ್ನು ಕಾಡಲಿವೆ. ಇದರೊಂದಿಗೆ ಇಲ್ಲಿನ ಮಹತ್ವದ ಪಾತ್ರಗಳಿಗೆ ಪ್ರತಿಭಾವಂತ ಕಲಾವಿದರೇ ಜೀವ ತುಂಬಿದ್ದಾರೆ.

ಸಾಧು ಕೋಕಿಲಾ, ತಾರಾ, ಅವಿನಾಶ್, ಗಿರಿಜಾ ಲೋಕೇಶ್, ತರಂಗ ವಿಶ್ವ ಮುಂತಾದವರ ದಂಡೇ ಈ ಸಿನಿಮಾದಲ್ಲಿದೆ. ಅವರೆಲ್ಲರ ಪಾತ್ರಗಳೂ ಕೂಡಾ ಮಾಮೂಲು ಶೈಲಿಯದ್ದಲ್ಲ. ಅದೆಲ್ಲದರ ಅಸಲೀ ಮುದವೇನೆಂಬುದು ವಾರದೊಪ್ಪತ್ತಿನಲ್ಲಿಯೇ ಜಾಹೀರಾಗಲಿದೆ.