ಮೆಗಾಸ್ಟಾರ್ ಚಿರಂಜೀವಿ ಭೇಟಿಯಾಗಿ ಒಟ್ಟಿಗೇ ಊಟ ಸವಿದ ಶಿವರಾಜ್ ಕುಮಾರ್

Photo Courtesy: Twitter

ಹೈದರಾಬಾದ್: ಹ್ಯಾಟ್ರಿಕ್ ಹೀರೋ ಶಿವರಾಜ್ ಕುಮಾರ್ ನಿನ್ನೆ ಟಾಲಿವುಡ್ ಮೆಗಾಸ್ಟಾರ್ ಚಿರಂಜೀವಿ ನಿವಾಸಕ್ಕೆ ಭೇಟಿ ನೀಡಿ ಜೊತೆಯಾಗಿ ಊಟ ಸವಿದಿದ್ದಾರೆ.

ಚಿರಂಜಿವಿ ಕುಟುಂಬ ಮತ್ತು ಡಾ.ರಾಜ್ ಕುಟುಂಬಕ್ಕೆ ಮೊದಲಿನಿಂದಲೂ ಸ್ನೇಹವಿದೆ. ಪುನೀತ್ ರಾಜ್ ಕುಮಾರ್ ನಿಧನರಾದಾಗ ಚಿರಂಜೀವಿ ಪುತ್ರ ರಾಮ್ ಚರಣ್ ಬೆಂಗಳೂರಿಗೆ ಬಂದು ಅಂತಿಮ ದರ್ಶನ ಪಡೆದಿದ್ದರು. ಚಿರಂಜೀವಿ ಕೂಡಾ ಶಿವಣ್ಣನ ಜೊತೆ ಈ ಹಿಂದೆಯೂ ಹಲವು ಬಾರಿ ಆತ್ಮೀಯವಾಗಿ ಕಾಲ ಕಳೆದಿದ್ದರು. ಇದೀಗ ಚಿರಂಜೀವಿ ನಿವಾಸಕ್ಕೆ ಶಿವಣ್ಣ ಭೇಟಿ ನೀಡಿ ಅವರ ಕುಟುಂಬದವರ ಜೊತೆ ಕೆಲವು ಕಾಲ ಕಳೆದು ಒಟ್ಟಿಗೇ ಊಟ ಮಾಡಿ ಬಂದಿದ್ದಾರೆ.

ಶಿವಣ್ಣ-ಮೆಗಾಸ್ಟಾರ ಭೇಟಿಯಾಗಿದ್ದೇಕೆ?
ಇತ್ತೀಚೆಗಷ್ಟೇ ಮೆಗಾಸ್ಟಾರ್ ಚಿರಂಜೀವಿಗೆ ಕೇಂದ್ರ ಸರ್ಕಾರ ಪದ್ಮ ವಿಭೂಷಣ ಪ್ರಶಸ್ತಿ ನೀಡಿ ಗೌರವಿಸಿತ್ತು. ಸಿನಿಮಾದಲ್ಲಿನ ಅವರ ಸಾಧನೆಗಾಗಿ ಈ ಉನ್ನತ ನಾಗರಿಕ ಪ್ರಶಸ್ತಿ ನೀಡಲಾಗಿತ್ತು. ಈ ಕಾರಣಕ್ಕೆ ಮೆಗಾಸ್ಟಾರ್ ನಿವಾಸಕ್ಕೆ ಭೇಟಿ ನೀಡಿದ ಶಿವಣ್ಣ ಹೂಗುಚ್ಚ ನೀಡಿ ಅಭಿನಂದಿಸಿದ್ದಾರೆ. ಶಿವಣ್ಣನಿಗೆ ತಾವೇ ಕೈಯಾರೆ ಊಟ ಬಡಿಸಿ ಮೆಗಾಸ್ಟಾರ್ ಫ್ಯಾಮಿಲಿ ಉಪಚರಿಸಿದೆ. ಇಬ್ಬರ ಫೋಟೋ ಅಭಿಮಾನಿಗಳ ಗಮನ ಸೆಳೆದಿದೆ.

ಚಿರು ಮತ್ತು ಸ್ಯಾಂಡಲ್ ವುಡ್ ನಂಟು ಈ ಹಿಂದಿನಿಂದಲೂ ಇದೆ. ಹಿಂದೊಮ್ಮೆ ಚಿರಂಜೀವಿ ಕ್ರೇಜಿಸ್ಟಾರ್ ರವಿಚಂದ್ರನ್ ಜೊತೆ ಸ್ನೇಹಕ್ಕೆ ಸ್ನೇಹ ಹಾಡಿನಲ್ಲಿ ಕುಣಿದಿದ್ದು ಯಾರು ಮರೆಯಲು ಸಾಧ್ಯ? ಇದೀಗ ಮತ್ತೆ ಅವರು ಕನ್ನಡ ಸಿನಿಮಾವೊಂದರಲ್ಲಿ ನಟಿಸಲಿದ್ದಾರೆ ಎಂಬು ಸುದ್ದಿಗಳಿತ್ತು.