ಕಾಂತಾರ ಚಾಪ್ಟರ್ 1 ಗಾಗಿ ಕಳರಿಪಯಟ್ಟು ಕಲಿಯುತ್ತಿರುವ ರಿಷಬ್ ಶೆಟ್ಟಿ: ಫೋಟೋ ವೈರಲ್

ಬೆಂಗಳೂರು: ಕಾಂತಾರ ಚಾಪ್ಟರ್ 1 ಸಿನಿಮಾಗಾಗಿ ರಿಷಬ್ ಶೆಟ್ಟಿ ಭರ್ಜರಿ ತಯಾರಿ ಮಾಡಿಕೊಂಡಿದ್ದಾರೆ. ಈ ಸಿನಿಮಾದ ಸಾಹಸ ದೃಶ್ಯಗಳಿಗಾಗಿ ರಿಷಬ್ ಕಳರಿಪಯಟ್ಟು ಕಲಿಯುತ್ತಿರುವ ಫೋಟೋವೊಂದನ್ನು ಅವರೇ ಪ್ರಕಟಿಸಿದ್ದು ವೈರಲ್ ಆಗಿದೆ.

ಕಾಂತಾರ ಸಕ್ಸಸ್ ಆದ ಮೇಲೆ ರಿಷಬ್ ಸಾಕಷ್ಟು ತಯಾರಿ ಮಾಡಿಕೊಂಡೇ ಕಾಂತಾರ ಚಾಪ್ಟರ್ 1 ಶೂಟಿಂಗ್ ಆರಂಭಿಸಿದ್ದರು. ಈ ಸಿನಿಮಾದ ಕತೆ ಕದಂಬರ ಕಾಲದ್ದು ಎಂದು ಈಗಾಗಲೇ ರಿಷಬ್ ಸುಳಿವು ಕೊಟ್ಟಿದ್ದಾರೆ. ಹೀಗಾಗಿ ರಿಷಬ್ ವೇಷಭೂಷಣ, ಹಾವ ಭಾವಗಳೂ ಆ ಕಾಲಕ್ಕೆ ತಕ್ಕಂತೇ ಇರಲಿದೆ.

ಈ ಸಿನಿಮಾದ ಸಾಹಸ ದೃಶ್ಯಗಳು ವಿಶೇಷವಾಗಿರಲಿದೆ. ಇದಕ್ಕಾಗಿ ಕೇರಳ ಮೂಲದ ಸಾಹಸ ಕಲೆ ಕಳರಿಪಯಟ್ಟು ಕಲಿಯಲಿದ್ದಾರೆ ಎಂದು ಈಗಾಗಲೇ ಸುದ್ದಿಗಳಿತ್ತು. ಇದೀಗ ಅದನ್ನು ರಿಷಬ್ ಅವರೇ ಫೋಟೋ ಪ್ರಕಟಿಸುವ ಮೂಲಕ ಖಚಿತಪಡಿಸಿದ್ದಾರೆ. ರಿಷಬ್ ಕಚ್ಚೆ ಕಟ್ಟಿಕೊಂಡು ಗುರಾಣಿ ಹಿಡಿದುಕೊಂಡು ಏಕಾಗ್ರತೆಯಿಂದ ಕಳರಿ ಭಂಗಿಯಲ್ಲಿರುವ ಫೋಟೋ ವೈರಲ್ ಆಗಿದೆ.

ರಿಷಬ್ ಪ್ರಕಟಿಸಿರುವ ಫೋಟೋಗೆ ನೆಟ್ಟಿಗರು ಸಾಕಷ್ಟು ಸಂಖ್ಯೆಯಲ್ಲಿ ಕಾಮೆಂಟ್ ಮಾಡಿದ್ದಾರೆ. ಈ ಫೋಟೋ ನೋಡಿದ ಮೇಲೆ ನಮಗೆ ಕಾಂತಾರ ಚಾಪ್ಟರ್ 1 ರ ಮೇಲೆ ನಿರೀಕ್ಷೆ ಹೆಚ್ಚಾಗ್ತಿದೆ ಎಂದಿದ್ದಾರೆ. ಈ ಫೋಟೋವೊಂದೇ ಸಾಕು, ನೀವು ಯಾವ ಮಟ್ಟದಲ್ಲಿ ಸಿನಿಮಾ ನಿರ್ಮಾಣ ಮಾಡುತ್ತೀರಿ ಎಂದು ತಿಳಿದುಕೊಳ್ಳಲು ಎಂದು ಅಭಿಮಾನಿಗಳು ಕಾಮೆಂಟ್ ಮಾಡಿದ್ದಾರೆ.