ಬೆಂಗಳೂರು: ನಟಿ ರಮ್ಯಾ ಸ್ಯಾಂಡಲ್ ವುಡ್ ಗೆ ಕಮ್ ಬ್ಯಾಕ್ ಮಾಡುವುದನ್ನು ಕಾದಿರುವ ಅಭಿಮಾನಿಗಳಿಗೆ ಕಾದು ಕಾದು ಸುಸ್ತಾಗಿದೆ. ಇದೀಗ ರಮ್ಯಾ ಒಂದು ಸಿನಿಮಾದಲ್ಲಿ ಅತಿಥಿ ಪಾತ್ರ ಮಾಡಲಿದ್ದಾರೆ ಎಂಬ ಸುದ್ದಿ ಕೇಳಿಬರುತ್ತಿದೆ.
ಉತ್ತರಕಾಂಡ ಸಿನಿಮಾದಲ್ಲಿ ನಟಿ ರಮ್ಯಾ ನಾಯಕಿಯಾಗಿ ಅಭಿನಯಿಸಬೇಕಿತ್ತು. ಈ ಸಿನಿಮಾಗೆ ಡಾಲಿ ಧನಂಜಯ್ ನಾಯಕ. ಮುಹೂರ್ತ ಕಾರ್ಯಕ್ರಮಕ್ಕೂ ರಮ್ಯಾ ಬಂದಿದ್ದರು. ಆದರೆ ಕೊನೆಯ ಕ್ಷಣದಲ್ಲಿ ರಾಜಕಾರಣದ ನೆಪ ಹೇಳಿ ರಮ್ಯಾ ಸಿನಿಮಾದಿಂದ ಹೊರಬಂದಿದ್ದಾರೆ.
ಇದು ಅವರ ಅಭಿಮಾನಿಗಳಿಗೆ ತೀವ್ರ ನಿರಾಸೆ ಉಂಟು ಮಾಡಿತ್ತು. ಆದರೆ ಈಗ ಸಿದ್ಲಿಂಗು 2 ಚಿತ್ರತಂಡ ನೀಡಿದ ಪೋಸ್ಟರ್ ಒಂದು ನೋಡಿದರೆ ಅಭಿಮಾನಿಗಳಿಗೆ ಕುತೂಹಲ ಮೂಡಿದೆ. ಸಿದ್ಲಿಂಗು ಸಿನಿಮಾದ ಮೊದಲ ಭಾಗದಲ್ಲಿ ರಮ್ಯಾ ಅಭಿನಯಿಸಿದ್ದರು. ಮೊದಲ ಭಾಗದಲ್ಲಿ ನಾಯಕಿ ಸತ್ತು ಹೋಗುತ್ತಾಳೆ. ಇದೀಗ ಸಿದ್ಲಿಂಗು 2 ಸಿನಿಮಾ ಸೆಟ್ಟೇರಿದೆ. ಈ ಸಿನಿಮಾದಲ್ಲೂ ನಾಯಕರಾಗಿ ಲೂಸ್ ಮಾದ ಯೋಗಿ ಅಭಿನಯಿಸುತ್ತಿದ್ದಾರೆ. ಅವರಿಗೆ ನಾಯಕಿಯಾಗಿ ಸೋನು ಗೌಡ ಅಭಿನಯಿಸುತ್ತಿದ್ದಾರೆ.
ಈ ಸಿನಿಮಾದಲ್ಲಿ ನಾಯಕಿಯಾಗಿಯಂತೂ ರಮ್ಯಾ ಇರಲ್ಲ. ಆದರೆ ಚಿತ್ರತಂಡ ಯುಗಾದಿ ನಿಮಿತ್ತ ಪೋಸ್ಟರ್ ಒಂದನ್ನು ಬಿಡುಗಡೆ ಮಾಡಿದೆ. ಈ ಪೋಸ್ಟರ್ ನಲ್ಲಿ ‘ಬೇವು ಬೆಲ್ಲದೊಂದಿಗೆ ಅತಿಥಿಯಾಗಿ ಬಂದರೂ ಬರಬಹುದು. ಅವರ ಹೆಸರಿನ ಮೊದಲ ಅಕ್ಷರ ‘ರ’ ಎಂದು ಬರೆಯಲಾಗಿದೆ. ಈ ಬರಹ ನೋಡಿದರೆ ಚಿತ್ರತಂಡ ರಮ್ಯಾರನ್ನು ಕರೆತರುವ ಪ್ರಯತ್ನ ನಡೆಸುತ್ತಿದೆ ಎಂಬ ಅನುಮಾನ ಅಭಿಮಾನಿಗಳದ್ದು.