ಸಿನಿಮಾ ಮಾಡಲ್ವಾ? ಅಭಿಮಾನಿಯ ಪ್ರಶ್ನೆಗೆ ನಟಿ ರಮ್ಯಾ ಪ್ರತಿಕ್ರಿಯೆ ನೋಡಿ

ಬೆಂಗಳೂರು: ನಟಿ ರಮ್ಯಾ ಅಲಿಯಾಸ್ ದಿವ್ಯಾ ಸ್ಪಂದನ ಬಹಳ ದಿನಗಳ ನಂತರ ತಮ್ಮ ಸಾಮಾಜಿಕ ಜಾಲತಾಣದಲ್ಲಿ ಅಭಿಮಾನಿಗಳೊಂದಿಗೆ ಚಿಟ್ ಚ್ಯಾಟ್ ನಡೆಸಿದ್ದಾರೆ.

ಈ ವೇಳೆ ಅಭಿಮಾನಿಗಳಲ್ಲಿ ಅನೇಕರು ನೀವು ಯಾಕೆ ಸಿನಿಮಾ ಮಾಡೋದನ್ನು ನಿಲ್ಲಿಸಿದ್ರಿ? ಸಿನಿಮಾಗೆ ಕಮ್ ಬ್ಯಾಕ್ ಮಾಡ್ತೀರಾ? ಇತ್ಯಾದಿ ಪ್ರಶ್ನೆಗಳನ್ನೇ ಹೆಚ್ಚಾಗಿ ಕೇಳಿದ್ದಾರೆ. ಇದಕ್ಕೆ ಅವರು ಹೇಳಿದ್ದೇನು ಗೊತ್ತಾ?

ಅಭಿಮಾನಿಯೊಬ್ಬರು ಯಾಕೆ ನೀವು ಸಿನಿಮಾ ಮಾಡೋದನ್ನು ನಿಲ್ಲಿಸಿದ್ರಿ ಎಂಬ ಪ್ರಶ್ನೆಗೆ ರಮ್ಯಾ ನನಗೆ ಬೋರ್ ಆಯ್ತು ಎಂದಿದ್ದಾರೆ. ಮತ್ತೆ ಯಾಕೆ ಕಮ್ ಬ್ಯಾಕ್ ಮಾಡಬಾರದು ಎಂಬ ಪ್ರಶ್ನೆಗೆ ಆ ದೋಣಿ ನನ್ನಿಂದ ಬಹಳ ದೂರ ಸಾಗಿದೆ ಎಂದು ಮಾರ್ಮಿಕವಾಗಿ ಉತ್ತರಿಸಿದ್ದಾರೆ. ಮತ್ತೊಬ್ಬರ ಪ್ರಶ್ನೆಗೆ ರಮ್ಯಾ ನನಗೆ ಸಿನಿಮಾ ಹಣ, ಕೀರ್ತಿ ಎಲ್ಲವನ್ನೂ ನೀಡಿದೆ. ಸಿನಿ ಜೀವನದ ನೆನಪುಗಳು ಮಧುರ ಎಂದಿದ್ದಾರೆ. ಆದರೆ ಕಮ್ ಬ್ಯಾಕ್ ಮಾಡುವ ಬಗ್ಗೆ ಯೋಚನೆಯೇ ಇಲ್ಲ ಎಂದು ಖಡಕ್ ಆಗಿ ಹೇಳಿದ್ದಾರೆ.

ಇನ್ನೊಬ್ಬ ಅಭಿಮಾನಿ ನೀವು ಈಗ ಎಲ್ಲಿ ಇದ್ದೀರಾ? ಏನು ಮಾಡ್ತಿದ್ದೀರಾ? ಎಂಬ ಪ್ರಶ್ನೆಗಳಿಗೆ ರಮ್ಯಾ ಸರಿಯಾದ ಉತ್ತರ ನೀಡಿಲ್ಲ. ನಾನು ನಿಮ್ಮ ಮನಸ್ಸಲ್ಲಿರುವೆ. ಎಲ್ಲರಂತೆ ನಾನೂ ಸಾಮಾನ್ಯ ಜೀವನ ನಡೆಸುತ್ತಿದ್ದೇನೆ ಎಂದು ಹಾರಿಕೆಯ ಉತ್ತರ ನೀಡಿದ್ದಾರೆ. ರಾಜಕೀಯದಲ್ಲೂ ನನ್ನ ಕರ್ತವ್ಯ ಮುಗಿದಿದೆ ಎನ್ನುವ ಮೂಲಕ ಆ ಅನುಮಾನಗಳಿಗೂ ಫುಲ್ ಸ್ಟಾಪ್ ನೀಡಿದ್ದಾರೆ.