ಕೊಚ್ಚಿ: ಕನ್ನಡ ನಟ ರಾಜ್ ಬಿ ಶೆಟ್ಟಿ ಈಗ ಮಲಯಾಳಂ ಸಿನಿಮಾ ರಂಗದಲ್ಲಿ ಖಡಕ್ ವಿಲನ್ ಆಗಿ ಎಂಟ್ರಿ ಕೊಟ್ಟಿದ್ದಾರೆ. ಮಮ್ಮುಟ್ಟಿ ನಾಯಕರಾಗಿರುವ ಟರ್ಬೋ ಸಿನಿಮಾದ ಟ್ರೈಲರ್ ಬಿಡುಗಡೆಯಾಗಿದೆ.
ಟರ್ಬೋ ಸಿನಿಮಾವನ್ನು ಸ್ವತಃ ಮಮ್ಮುಟ್ಟಿಯೇ ನಿರ್ಮಿಸುತ್ತಿದ್ದಾರೆ. ಈ ಸಿನಿಮಾದ ಟ್ರೈಲರ್ ನಿನ್ನೆ ಲಾಂಚ್ ಆಗಿದೆ. ಟ್ರೈಲರ್ ನೋಡಿದರೆ ಇದು ಸಖತ್ ಆಕ್ಷನ್ ಸಿನಿಮಾ ಎನ್ನುವುದು ಪಕ್ಕಾ ಆಗುತ್ತದೆ. ಈ ಸಿನಿಮಾದ ಟ್ರೈಲರ್ ನಲ್ಲಿ ಮಮ್ಮುಟ್ಟಿ ಜೊತೆಗೆ ಗಮನ ಸೆಳೆದಿದ್ದು ರಾಜ್ ಬಿ ಶೆಟ್ಟಿ ರೋಲ್.
ರಾಜ್ ಬಿ ಶೆಟ್ಟಿ ಕನ್ನಡದಲ್ಲಿ ಹಾಸ್ಯ ಪಾತ್ರ ಇಲ್ಲವೇ ಹೀರೋ ಆಗಿ ಗುರುತಿಸಿಕೊಂಡಿದ್ದಾರೆ. ಆದರೆ ಇದೀಗ ಮಲಯಾಳಂ ಸಿನಿಮಾದಲ್ಲಿ ಖಡಕ್ ವಿಲನ್ ಪಾತ್ರ ಮಾಡುತ್ತಿದ್ದಾರೆ. ವಿಲನ್ ಎಂದರೆ ಮೈಕಟ್ಟು ಹೊಂದಿರಬೇಕು, ಕಂಚಿನ ಕಂಠವಿರಬೇಕು ಎಂಬೆಲ್ಲಾ ಫಾರ್ಮುಲಾಗಳು ಇಂದಿನ ಸಿನಿಮಾಗಳಲ್ಲಿ ಇಲ್ಲ.
ಇದೀಗ ರಾಜ್ ಬಿ ಶೆಟ್ಟಿ ಚಿತ್ರದ ಪ್ರಮುಖ ವಿಲನ್ ಆಗಿ ಪಾತ್ರ ಮಾಡುತ್ತಿದ್ದಾರೆ. ಮಮ್ಮುಟ್ಟಿ ಹೆಗಲ ಮೇಲೆ ಕೈಯಿಟ್ಟು, ‘ನಾನು ಸೀ ಯೂ ಸೂನ್ ಅನ್ನಲ್ಲ, ಯಾಕೆಂದರೆ ನಾವು ಇನ್ನು ಮುಂದೆ ಪರಸ್ಪರ ಕಾಣಲ್ಲ’ ಎನ್ನುತ್ತಾರೆ. ಅವರ ಈ ಮಾಸ್ ಡೈಲಾಗ್ ಪ್ರೇಕ್ಷಕರಿಗೆ ಇಷ್ಟವಾಗಿದೆ. ಈ ಸಿನಿಮಾ ರಾಜ್ ಬಿ ಶೆಟ್ಟಿಗೆ ಪರಭಾಷೆಗಳಲ್ಲಿ ಬೇರೊಂದು ಇಮೇಜ್ ತಂದುಕೊಡುವ ವಿಶ್ವಾಸವಿದೆ. ಮೇ 23 ಕ್ಕೆ ಟರ್ಬೋ ಸಿನಿಮಾ ಥಿಯೇಟರ್ ಗೆ ಬರಲಿದೆ.
