ಪುಷ್ಪ 2 ಟೀಸರ್ ರಿಲೀಸ್: ಗಂಗಮ್ಮನ ಅವತಾರದಲ್ಲಿ ಅಲ್ಲು ಅರ್ಜುನ್

ಹೈದರಾಬಾದ್: ಸ್ಟೈಲಿಶ್ ತಾರೆ ಅಲ್ಲು ಅರ್ಜುನ್ ಬರ್ತ್ ಡೇ ನಿಮಿತ್ತ ಇಂದು ಬಹುನಿರೀಕ್ಷಿತ ಪುಷ್ಪ 2 ಸಿನಿಮಾದ ಟೀಸರ್ ಬಿಡುಗಡೆಯಾಗಿದೆ. ಗಂಗಮ್ಮನ ಅವತಾರದಲ್ಲಿ ಪುಷ್ಪ ಸಖತ್ ಎಂಟ್ರಿ ಕೊಟ್ಟಿದ್ದಾನೆ.

ಸೀರೆ ಉಟ್ಟುಕೊಂಡು ಮಾಲೆ ಹಾಕಿಕೊಂಡು ಪುಷ್ಪನ ಅವತಾರ ಸಖತ್ ರಗಡ್ ಆಗಿದೆ. ಗಂಗಮ್ಮನ ಅವತಾರದಲ್ಲಿ ಪುಷ್ಪ ಎದುರಾಳಿಗಳನ್ನು ಚೆಂಡಾಡುತ್ತಾನೆ. ಭರ್ಜರಿ ಸಾಹಸ ದೃಶ್ಯವಿರುವ ತುಣುಕೊಂದನ್ನು ಹೊರಬಿಡಲಾಗಿದೆ. ಪುಷ್ಪ ಹೊರತಾಗಿ ಟೀಸರ್ ನಲ್ಲಿ ಬೇರೆ ಯಾರೂ ಇಲ್ಲ.

ಟೀಸರ್ ನೋಡಿದ ಜನ ನಾನಾ ರೀತಿಯಲ್ಲಿ ಕಾಮೆಂಟ್ ಮಾಡಿದ್ದಾರೆ. ನಮ್ಮ ಐಕಾನ್ ತಾರೆಯನ್ನು ಹಿಂದೆಂದೂ ಈ ಥರಾ ಮಾಸ್ ಅವತಾರದಲ್ಲಿ ನೋಡಿಲ್ಲ ಎಂದು ಕೆಲವರು ಹೇಳಿದ್ದಾರೆ. ಬಾಡಿ ಲಾಂಗ್ವೇಜ್, ಪುಷ್ಪನ ಡ್ರೆಸ್ ಎಲ್ಲವೂ ವಿಭಿನ್ನವಾಗಿದೆ ಎಂದು ಜನ ಕಾಮೆಂಟ್ ಮಾಡಿದ್ದಾರೆ.

ಪುಷ್ಪ 1 ರಲ್ಲಿದ್ದಂತೆ ಅಲ್ಲು ಅರ್ಜುನ್ ಬಾಡಿ ಲಾಂಗ್ವೇಜ್ ಇಲ್ಲೂ ಮುಂದುವರಿದಿದೆ. ಜೊತೆಗೆ ಡಿಎಸ್ ಪಿ ಹಿನ್ನಲೆ ಸಂಗೀತವೂ ಚಚ್ಚಿಹಾಕುವಂತಿದೆ. ಪುಷ್ಪ 2 ಸಿನಿಮಾ ಇದೇ ವರ್ಷ ಆಗಸ್ಟ್ 15 ರಂದು ಥಿಯೇಟರ್ ನಲ್ಲಿ ಬಹುಭಾಷೆಗಳಲ್ಲಿ ಬಿಡುಗಡೆಯಾಗುತ್ತಿದೆ.