ಬೆಂಗಳೂರು: ಮೊನ್ನೆ ಸಂಜೆ ತಮ್ಮ ಇನ್ ಸ್ಟಾಗ್ರಾಂ ಮೂಲಕ ಅಂತಾರಾಷ್ಟ್ರೀಯ ಕ್ರಿಕೆಟ್ ನಿವೃತ್ತಿ ಹೇಳುತ್ತಿರುವುದಾಗಿ ಧೋನಿ ಘೋಷಿಸಿದಾಗ ಅಭಿಮಾನಿಗಳಿಗೆ ಬೇಸರದ ಜತೆಗೆ ಟೀಂ ಇಂಡಿಯಾಕ್ಕೆ ಇಷ್ಟೊಂದು ಯಶಸ್ಸು ನೀಡಿದ ನಾಯಕನಿಗೆ ಈ ರೀತಿ ವಿದಾಯವೇ ಎಂದು ಕೊರಗಿದವರೇ ಹೆಚ್ಚು.
ಧೋನಿಗೆ ವಿದಾಯ ಪಂದ್ಯ ಏರ್ಪಡಿಸಿ ಎಂದು ಜಾರ್ಖಂಡ್ ಮುಖ್ಯಮಂತ್ರಿ ಹೇಮಂತ್ ಸೊರೇನ್ ಸೇರಿದಂತೆ ಅವರ ಅನೇಕ ಅಭಿಮಾನಿಗಳು ಬಿಸಿಸಿಐಗೆ ಒತ್ತಾಯಿಸಿವೆ. ಈ ಒತ್ತಾಯದ ಧ‍್ವನಿಗೆ ಈಗ ಸ್ಯಾಂಡಲ್ ವುಡ್ ಸ್ಟಾರ್ ಕಿಚ್ಚ ಸುದೀಪ್ ಕೂಡಾ ಧ‍್ವನಿಗೂಡಿಸಿದ್ದಾರೆ.
ಧೋನಿ ನಿವೃತ್ತಿ ಬಗ್ಗೆ ಮಾತನಾಡಿರುವ ಕಿಚ್ಚ, ನೀವು ಒಬ್ಬ ಉತ್ತಮ ಕ್ರಿಕೆಟಿಗ, ಅತ್ಯುತ್ತಮ ನಾಯಕ. ಆದರೆ ಇದು ಯಾಕೋ ಅರ್ಧಕ್ಕೇ ನಿಂತ ಹಾಗೆ ಕಾಣುತ್ತಿದೆ. ಎಲ್ಲರೂ ಅವರು ಕೊನೆಯದಾಗಿ ಆಡಿದ ಪಂದ್ಯ ನೋಡಿದ್ದೇವೆ. ಆದರೆ ಅದುವೇ ಅವರ ಕೊನೆಯ ಪಂದ್ಯ ಎಂಬುದು ಯಾರಿಗೂ ಗೊತ್ತಿರಲಿಲ್ಲ. ನಾನೂ ಸೇರಿದಂತೆ ಅವರ ಅಪಾರ ಅಭಿಮಾನಿಗಳು ಅವರಿಗೆ ಒಂದು ಅದ್ಭುತ ವಿದಾಯ ಸಿಕ್ಕಿದರೆ ಎಂದು ಆಶಿಸುತ್ತಿದ್ದೇವೆ ಎಂದು ಸುದೀಪ್ ಹೇಳಿಕೊಂಡಿದ್ದಾರೆ.