ಮತ್ತೆ ಬೇಕೆಂದ್ರೂ ಸಿಗಲ್ಲ, ಈಗಲೇ ಅನುಭವಿಸಿ: ಪುನೀತ್ ಲಕ್ಕಿಮ್ಯಾನ್ ಬಗ್ಗೆ ಸುದೀಪ್ ಮಾತು

ಬೆಂಗಳೂರು: ಪವರ್ ಸ್ಟಾರ್ ಪುನೀತ್ ರಾಜ್ ಕುಮಾರ್ ಅತಿಥಿ ಪಾತ್ರದಲ್ಲಿ ಅಭಿನಯಿಸಿರುವ ಲಕ್ಕಿಮ್ಯಾನ್ ಸಿನಿಮಾದ ಹಾಡು ನಿನ್ನೆ ಬಿಡುಗಡೆಯಾಗಿದೆ. ಈ ಹಾಡಿನ ಬಿಡುಗಡೆ ಕಾರ್ಯಕ್ರಮಕ್ಕೆ ಸ್ಯಾಂಡಲ್ ವುಡ್ ಗಣ್ಯರು, ಪ್ರಭುದೇವ ಕುಟುಂಬದವರು ಸಾಕ್ಷಿಯಾಗಿದ್ದರು.

ಇಂಡಿಯನ್ ಮೈಕಲ್ ಜಾಕ್ಸನ್ ಪ್ರಭುದೇವ ಸಹೋದರ ನಾಗೇಂದ್ರ ಪ್ರಸಾದ್ ನಿರ್ದೇಶನದ ಲಕ್ಕಿ ಮ್ಯಾನ್ ಸಿನಿಮಾದಲ್ಲಿ ಹಾಡೊಂದಕ್ಕೆ ಪ್ರಭುದೇವ-ಅಪ್ಪು ಜೊತೆಯಾಗಿ ಹೆಜ್ಜೆ ಹಾಕಿದ್ದಾರೆ. ಆ ಹಾಡಿನ ಲಿರಿಕಲ್ ವಿಡಿಯೋ ನಿನ್ನೆ ಬಿಡುಗಡೆಯಾಗಿದೆ. ಈ ಕಾರ್ಯಕ್ರಮಕ್ಕೆ ಪ್ರಭುದೇವ, ವಿಜಯ್ ಆಂಟನಿ, ಮೂಗೂರ್ ಸುಂದರ್, ರಾಘವೇಂದ್ರ ರಾಜ್ ಕುಮಾರ್, ವಿನಯ್ ರಾಜ್ ಕುಮಾರ್, ಯುವ ರಾಜ್ ಕುಮಾರ್, ಸಾಧು ಕೋಕಿಲ, ಚಿತ್ರದ ನಾಯಕ ಡಾರ್ಲಿಂಗ್ ಕೃಷ್ಣ, ನಾಯಕಿ ಸಂಗೀತಾ ಸೇರಿದಂತೆ ಅನೇಕರು ಹಾಜರಾಗಿದ್ದರು.

ಈ ವೇಳೆ ಚಿತ್ರಕ್ಕೆ ಶುಭ ಹಾರೈಸಿ ಮಾತನಾಡಿದ ಕಿಚ್ಚ ಸುದೀಪ್ ಅಪ್ಪು ನೆನೆದು ಭಾವುಕರಾದರು. ‘ಈ ಹಾಡು ನೋಡುವಾಗ ನನಗೆ ದುಃಖವಾಗಲಿಲ್ಲ. ನಾನು ಅಪ್ಪು ನೋಡಿ ನಗುತ್ತಿದ್ದೆ. ಕಾರಣ, ಈ ಅವಕಾಶ ಮತ್ತೆ ಸಿಗಲ್ಲ. ಈಗಲೇ ಅನುಭವಿಸಿ. ಅವರನ್ನು ಕೊನೆಯ ಬಾರಿಗೆ ತೆರೆ ಮೇಲೆ ನೋಡುವ, ಸಂಭ್ರಮಿಸುವ ಕೊನೇ ಅವಕಾಶ ನಮಗಿದು. ಇದನ್ನು ಮಿಸ್ ಮಾಡಬೇಡಿ’ ಎಂದು ಸುದೀಪ್ ಹೇಳಿದ್ದಾರೆ.