ಕಾಂತಾರದಲ್ಲಿ ಭೂತಕೋಲ, ವೀರ ಚಂದ್ರಹಾಸದಲ್ಲಿ ಯಕ್ಷಗಾನ: ವೈರಲ್ ಆಗ್ತಿದೆ ರವಿ ಬಸ್ರೂರು ವೀರ ಚಂದ್ರಹಾಸ ಟೀಸರ್

ಬೆಂಗಳೂರು: ಕಾಂತಾರ ಸಿನಿಮಾದಲ್ಲಿ ತುಳುನಾಡಿನ ಭೂತಕೋಲವನ್ನು ವಿಶ್ವಕ್ಕೇ ಪರಿಚಯಿಸಿದ ರಿಷಬ್ ಶೆಟ್ಟಿ ಗೆಲುವು ಕಂಡರು. ಇದೀಗ ಅದೇ ಕುಂದಾಪುರದವರೇ ಆದ ಖ್ಯಾತ ಸಂಗೀತ ನಿರ್ದೇಶಕ ರವಿ ಬಸ್ರೂರು ಆಂಡ್ ಟೀಂ ಯಕ್ಷಗಾನವನ್ನು ಸಿನಿಮಾವಾಗಿ ಹೊರತರಲು ಸಿದ್ಧತೆ ನಡೆಸಿದೆ.

ರವಿ ಬಸ್ರೂರು ನಿರ್ದೇಶನ, ಸಂಗೀತ ನಿರ್ದೇಶನದಲ್ಲಿ ವೀರ ಚಂದ್ರಹಾಸ ಎನ್ನುವ ಸಿನಿಮಾ ಟೀಸರ್ ಬಿಡುಗಡೆ ಮಾಡಲಾಗಿದೆ. ಈ ಸಿನಿಮಾ ಯಕ್ಷಗಾನ ಕತೆಯನ್ನು ಹೊಂದಿದೆ. ಇದುವರೆಗೆ ಸಿನಿಮಾದಲ್ಲಿ ಯಕ್ಷಗಾನವನ್ನು ಬಳಸಿದ ಉದಾಹರಣೆಯಿಲ್ಲ. ಆದರೆ ರವಿ ಬಸ್ರೂರು ಇದೇ ಮೊದಲ ಬಾರಿಗೆ ಇಂತಹದ್ದೊಂದು ಪ್ರಯೋಗಕ್ಕಿಳಿದಿದ್ದಾರೆ.

ಕುಂತಲದ ಚಂದ್ರಹಾಸ ರಾಜನ ಸಾಹಸ ಕತೆಯನ್ನೊಳಗೊಂಡ ಯಕ್ಷಗಾನ ಪ್ರಸಂಗವನ್ನು ಸಿನಿಮಾ ರೂಪಕ್ಕಿಳಿಸಲಾಗಿದೆ. ಯಕ್ಷಗಾನ ಕೇವಲ ಒಂದು ರಂಗ ವೇದಿಕೆಗೆ ಸೀಮಿತವಾಗಿತ್ತು. ಕೆಲವೊಂದು ಸಿನಿಮಾಗಳಲ್ಲಿ ಯಕ್ಷಗಾನ ಪ್ರದರ್ಶನ ಮಾಡುತ್ತಿರುವ ದೃಶ್ಯವನ್ನು ಪ್ರಸಾರ ಮಾಡಿರಬಹುದು.

ಆದರೆ ಯಕ್ಷಗಾನವೇ ಸಿನಿಮಾವಾದ ಉದಾಹರಣೆಯಿಲ್ಲ. ಇದೀಗ ಕುಂದಾಪುರದವರಾದ ರವಿ ಬಸ್ರೂರು ಕರಾವಳಿಯ ಕಲೆ ಯಕ್ಷಗಾನವನ್ನು ಸಿನಿಮಾ ಮಾಡಿ ಈ ಕಲೆಯನ್ನು ಇನ್ನೊಂದು ಮಟ್ಟಕ್ಕೆ ಕೊಂಡೊಯ್ಯಲು ತಯಾರಿ ನಡೆಸಿದ್ದಾರೆ. ಸದ್ಯಕ್ಕೆ ಇದರ ಟೀಸರ್ ಬಿಡುಗಡೆಯಾಗಿದ್ದು ಇಲ್ಲಿದೆ ಲಿಂಕ್.