ಚಂದನ್ ಶೆಟ್ಟಿ ವಿವಾದಕ್ಕೂ ನನಗೂ ಯಾವ ಸಂಬಂಧವೂ ಇಲ್ಲ: ನಟ ಪ್ರಥಮ್ ಕೆಂಡಾಮಂಡಲ

ಬೆಂಗಳೂರು: ಇತ್ತೀಚೆಗಷ್ಟೇ ವಿಚ್ಛೇದನಗೊಂಡ ಸ್ಯಾಂಡಲ್ ವುಡ್ ಜೋಡಿ ಚಂದನ್ ಶೆಟ್ಟಿ ಮತ್ತು ನಿವೇದಿತಾ ಗೌಡರನ್ನು ಒಂದು ಮಾಡಲು ಹೋಗಿ ನಟ ಪ್ರಥಮ್ ಸಿಕ್ಕಾಪಟ್ಟೆ ಟ್ರೋಲ್ ಗೊಳಗಾಗಿದ್ದರು. ಇದರ ನಡುವೆಯೇ ಅವರು ಇನ್ನು ಮುಂದೆ ನನಗೂ ಚಂದನ್, ನಿವೇದಿತಾಗೂ ಯಾವುದೇ ಸಂಬಂಧವಿಲ್ಲ ಎಂದಿದ್ದಾರೆ.

ಚಂದನ್-ನಿವೇದಿತಾ ವಿಚ್ಛೇದನ ಸುದ್ದಿ ಸ್ಪೋಟವಾಗುತ್ತಿದ್ದಂತೇ ಮಾಧ್ಯಮಗಳಿಗೆ ಪ್ರತಿಕ್ರಿಯಿಸಿದ್ದ ಪ್ರಥಮ್, ನಾನು ಇಬ್ಬರನ್ನೂ ಒಂದು ಮಾಡಲು ಪ್ರಯತ್ನ ಮಾಡುತ್ತೇನೆ. ಚಂದನ್ ಗೆ ಮಿಲನ ಸಿನಿಮಾದ ಕ್ಲೈಮ್ಯಾಕ್ಸ್ ತೋರಿಸುತ್ತೇನೆ. ಧ್ರುವ ಸರ್ಜಾ ಮಾತಿಗೆ ಚಂದನ್ ಬೆಲೆಕೊಡುತ್ತಾರೆ. ಧ್ರುವ ಸರ್ಜಾ ಮಧ್ಯಸ್ಥಿಕೆ ವಹಿಸಿ ಚಂದನ್-ನಿವೇದಿತಾರನ್ನು ಒಂದು ಮಾಡುತ್ತೇನೆ ಎಂದೆಲ್ಲಾ ಹೇಳಿಕೆ ನೀಡಿದ್ದರು.

ಪ್ರಥಮ್ ಹೀಗೊಂದು ಹೇಳಿಕೆ ನೀಡುತ್ತಿದ್ದಂತೇ ಸೋಷಿಯಲ್ ಮೀಡಿಯಾದಲ್ಲಿ ಟ್ರೋಲ್ ಆಗಿದ್ದರು. ಕಂಡವರ ಮನೆ ವಿಷಯ ನಿಮಗ್ಯಾಕೆ? ನೀವೇನು ಅಂತ ಅವರಿಬ್ಬರ ವಿಚಾರದಲ್ಲಿ ಮಧ್ಯಸ್ಥಿಕೆ ವಹಿಸುವುದು ಎಂದು ಕೆಲವರು ಆಕ್ರೋಶ ವ್ಯಕ್ತಪಡಿಸಿದ್ದರು. ಜೊತೆಗೆ ಮಾಧ್ಯಮಗಳಲ್ಲೂ ಪ್ರಥಮ್ ಹೇಳಿಕೆಗಳು ವೈರಲ್ ಆಗಿದ್ದವು.

ಇದರ ಬೆನ್ನಲ್ಲೇ ಬೇಸತ್ತ ಪ್ರಥಮ್, ಸೋಷಿಯಲ್ ಮೀಡಿಯಾದಲ್ಲಿ ಇನ್ನು ಮುಂದೆ ಇಬ್ಬರ ನಡುವಿನ ಸಂಧಾನಕ್ಕೆ ನಾನಿಲ್ಲ ಎಂದಿದ್ದಾರೆ. ‘ಚಂದನ್ ಶೆಟ್ಟಿ ನನ್ನ ಮದುವೆಗೆ ಬಂದಿದ್ದರು. ಅವ್ರ ವಿಚಾರದಲ್ಲಿ ಸಂಧಾನ ಮಾಡೋಣ ಎಂದು ಶಕ್ತಿ ಮೀರಿ ಪ್ರಯತ್ನ ಮಾಡಿದೆ. ಆಧರೆ ಕೆಲವು ಯೂ ಟ್ಯೂಬ್ ವಾಹಿನಿಗಳು ಏನೇನೋ ಹೇಳಿ ತಪ್ಪಾಗಿ ಸುದ್ದಿ ಪ್ರಕಟಿಸಿದವು. ಇಲ್ಲಿಗೆ ನಿಲ್ಸಿ. ನನಗೂ ಇದಕ್ಕೂ ಇನ್ಮೇಲ್ ಯಾವುದೇ ಸಂಬಂಧವಿಲ್ಲ. ನಾನು ಯಾವ ಸಂಧಾನಕ್ಕೂ ಹೋಗಲ್ಲ. ಥೂ ನಿಮ್ ಹಾಳಾದ ಜನ್ಮಕ್ಕೆ ಏನೇನೋ ಹಾಕ್ತೀರಲ್ರೋ.. ಹಾಳಾದವ್ರೇ’ ಎಂದು ಬಾಯಿಗೆ ಬಂದ ಹಾಗೆ ಬೈದು ಸಂದೇಶ ಬರೆದಿದ್ದಾರೆ.