ಹೈದರಾಬಾದ್: ಬಹುನಿರೀಕ್ಷಿತ ಪುಷ್ಪ 2 ಸಿನಿಮಾದ ಶ್ರೀವಲ್ಲಿ ಹಾಡು ಇಂದು ಬಿಡುಗಡೆಯಾಗುತ್ತಿದೆ. ಶ್ರೀವಲ್ಲಿಯಾಗಿ ರಶ್ಮಿಕಾ ಹೇಗೆ ಕಾಣಿಸಬಹುದು ಎಂದು ನೋಡಲು ಫ್ಯಾನ್ಸ್ ಕಾತುರದಿಂದ ಕಾಯುತ್ತಿದ್ದಾರೆ.
ಪುಷ್ಪ ಭಾಗ 1 ರಲ್ಲಿ ಶ್ರೀವಲ್ಲಿ ಹಾಡು ಭಾರೀ ಜನಪ್ರಿಯವಾಗಿತ್ತು. ಇದರ ಸ್ಟೆಪ್ಸ್ ಕೂಡಾ ವೈರಲ್ ಆಗಿತ್ತು. ರಶ್ಮಿಕಾರನ್ನು ಜನ ಶ್ರೀವಲ್ಲಿ ಎಂದೇ ಕರೆಯಲಾರಂಭಿಸಿದ್ದರು. ಅಷ್ಟರ ಮಟ್ಟಿಗೆ ಆ ಪಾತ್ರ, ಹಾಡು ಅವರಿಗೆ ಜನಪ್ರಿಯತೆ ತಂದುಕೊಟ್ಟಿತು. ಇದೀಗ ಮತ್ತೊಮ್ಮೆ ಪುಷ್ಪ 2 ಸಿನಿಮಾದಲ್ಲೂ ಶ್ರೀವಲ್ಲಿ ಹಾಡಿನೊಂದಿಗೆ ಬರಲಿದ್ದಾರೆ.
ಈ ಹಾಡಿನ ಶೂಟಿಂಗ್ ಮಾಡುವಾಗ ತುಂಬಾ ಎಂಜಾಯ್ ಮಾಡಿದ್ದೆ. ಹಾಡನ್ನೂ ನೀವು ಅಷ್ಟೇ ಪ್ರೀತಿಯಿಂದ ಸ್ವೀಕರಿಸುತ್ತೀರಿ ಎಂದು ಅಂದುಕೊಂಡಿದ್ದೇನೆ ಎಂದಿದ್ದಾರೆ ರಶ್ಮಿಕಾ. ಈ ಹಾಡಿನಲ್ಲಿ ರಶ್ಮಿಕಾ ಮಾತ್ರ ಇರುತ್ತಾರೆಯೇ ಅಥವಾ ನಾಯಕ ಅಲ್ಲು ಅರ್ಜುನ್ ಕೂಡಾ ಕಾಣಿಸಿಕೊಳ್ಳಲಿದ್ದಾರಾ ನೋಡಬೇಕಿದೆ.
ಶ್ರೀವಲ್ಲಿ ಹಾಡು ಇಂದು ಬೆಳಿಗ್ಗೆ 11.07 ಗಂಟೆಗೆ ಬಿಡುಗಡೆಯಾಗಲಿದೆ. ಪುಷ್ಪ ಸಿನಿಮಾಗೆ ಖ್ಯಾತ ಸಂಗೀತ ನಿರ್ದೇಶಕ ಡಿಎಸ್ ಪಿ ಸಂಗೀತ ಸಂಯೋಜಿಸಿದ್ದಾರೆ. ಈಗಾಗಲೇ ಟೈಟಲ್ ಹಾಡು ಬಿಡುಗಡೆಯಾಗಿದೆ. ಇದೀಗ ಎರಡನೇ ಹಾಡು ಇಂದು ಲೋಕಾರ್ಪಣೆಯಾಗುತ್ತಿದೆ.
