ನಾನ್ಯಾಕೆ ಹೋಟೆಲ್ ರೂಂಗೆ ಹೋಗ್ಲಿ? ಹೋಟೆಲ್ ರೂಂಗೆ ಬಿಲ್ ಕಟ್ಟದ ಆರೋಪಕ್ಕೆ ಪೂಜಾ ಗಾಂಧಿ ಪ್ರತಿಕ್ರಿಯೆ

ಬೆಂಗಳೂರು: ಖಾಸಗಿ ಹೋಟೆಲ್ ನಿಂದ ಬಿಲ್ ಪಾವತಿ ಮಾಡದೇ ತೆರಳಿದ ಆರೋಪದ ಮೇಲೆ ನಟಿ ಪೂಜಾ ಗಾಂಧಿ ವಿರುದ್ಧ ದೂರು ದಾಖಲಾಗಿದೆ.

2016 ಏಪ್ರಿಲ್ ನಿಂದ 2017 ರ ಮೇವರೆಗೆ ಪೂಜಾ ಗಾಂಧಿ ಅಶೋಕ ಹೋಟೆಲ್ ನಲ್ಲಿ ವಾಸ್ತವ್ಯ ಹೂಡಿದ್ದರು. ಅಶೋಕ ಹೋಟೆಲ್ ನಲ್ಲಿ ಪೂಜಾ ಗಾಂಧಿ ಮತ್ತು ಬಿಜೆಪಿ ನಾಯಕ ಅನಿಲ್ ಮೆಣಸಿನ ಕಾಯಿ ನಡುವೆ ಬಿಡಿಎ ಫೈಲ್ ಗೆ ಬಿಡಿಎ ಆಯುಕ್ತರಿಂದ ಸಹಿ ಹಾಕಿಸಿಕೊಳ್ಳಲು ಇಲ್ಲಿ ಡೀಲ್ ನಡೆದಿತ್ತು. ಆದರೆ ಇಬ್ಬರ ನಡುವೆ ವೈಮನಸ್ಯ ನಡೆದ ಕಾರಣ ಪೂಜಾ ಹಾಗೂ ಅನಿಲ್ ಮೆಣಸಿನಕಾಯಿ ಹೋಟೆಲ್ ಬಿಲ್‍ ಪಾವತಿಸದೇ ತೆರಳಿದ್ದರು ಎನ್ನಲಾಗಿದೆ.

ಆದರೆ ಈ ಬಗ್ಗೆ ಖಾಸಗಿ ವಾಹಿನಿಗೆ ಮಾತನಾಡಿರುವ ಪೂಜಾ ಗಾಂಧಿ, ನಾನು ಆವತ್ತು ಹೋಟೆಲ್ ನಲ್ಲಿ ವಾಸ್ತವ್ಯ ಹೂಡಿದ್ದಕ್ಕೆ ಬಿಲ್ ಕ್ಲಿಯರ್ ಮಾಡಿದ್ದೇನೆ. ಆದರೆ ನನಗೆ ಅನಿಲ್ ಮೆಣಸಿನಕಾಯಿ ಸಹೋದರ ಸಮಾನ. ನಮ್ಮಿಬ್ಬರ ನಡುವೆ ಯಾವುದೇ ಡೀಲ್ ನಡೆದಿಲ್ಲ. ನಾನ್ಯಾಕೆ ಹೋಟೆಲ್ ನಲ್ಲಿ ಡೀಲ್ ಮಾಡಲಿ. ನನಗೆ ನನ್ನದೇ ಕುಟುಂಬವಿದೆ. ಈ ರೀತಿ ನನ್ನ ಮತ್ತು ಅವರ ಹೆಸರಿನ ನಡುವೆ ಕಳಂಕ ತರಬೇಡಿ ಎಂದಿದ್ದಾರೆ.

ಅತ್ತ ಅನಿಲ್ ಮೆಣಸಿನಕಾಯಿ ಕೂಡಾ ಪ್ರತಿಕ್ರಿಯೆ ನೀಡಿದ್ದು, ನಾನು ಸಹಿ ಹಾಕಿಸಿಕೊಳ್ಳಬೇಕಿದ್ದರೆ ಪೂಜಾ ಗಾಂಧಿ ಬಳಿ ಯಾಕೆ ಹೋಗಲಿ? ಈ ಕೇಸ್ ಗೂ ನನಗೂ ಸಂಬಂಧವಿಲ್ಲ. ನಾನು ಎಲ್ಲೂ ಹೋಟೆಲ್ ರೂಂಗೆ ಹೋಗಿಲ್ಲ. ನನಗೆ ನನ್ನದೇ ಕುಟುಂಬ, ಪತ್ನಿ ಇದ್ದಾಳೆ. ನನ್ನ ಹೆಸರಿಗೆ ಇದುವರೆಗೆ ಯಾವುದೇ ಕಳಂಕ ಬಂದಿಲ್ಲ ಎಂದಿದ್ದಾರೆ.

ತಾಜಾ ಸುದ್ದಿಗಳನ್ನು ಓದಲು ವೆಬ್ ದುನಿಯಾ ಮೊಬೈಲ್ ಆಪ್ ಡೌನ್ ಲೋಡ್ ಮಾಡಿ