ಕುತೂಹಲದ ಜ್ವರವೇರಿಸಿತು ಚೇಜ್ ಟೀಸರ್!

ವಿಲೋಕ್ ಶೆಟ್ಟಿ ನಿರ್ದೇಶನದಲ್ಲಿ ಮೂಡಿ ಬಂದಿರೋ ಚಿತ್ರ ಚೇಜ್. ಶೀರ್ಷಿಕೆಯಲ್ಲಿಯೇ ಒಂದು ಆವೇಗವನ್ನಿಟ್ಟುಕೊಂಡಿರೋ ಈ ಸಿನಿಮಾ ಥ್ರಿಲ್ಲರ್ ಅಂಶಗಳನ್ನೊಳಗೊಂಡಿದೆ ಎಂಬ ವಿಚಾರ ಇಯಾವತ್ತೋ ಪ್ರೇಕ್ಷಕರಿಗೆ ಸ್ಪಷ್ಟವಾಗಿತ್ತು. ಅಖಂಡ ಎರಡು ವರ್ಷಗಳ ಕಾಲ ರೂಪಿಸಲ್ಪಟ್ಟರೂ ಆರಂಭದಿಂದ ಈ ವರೆಗೂ ಈ ಸಿನಿಮಾದೆಡೆಗಿನ ಕುತೂಹಲ ಜ್ವರದಂತೆಯೇ ಏರಿಕೊಳ್ಳುತ್ತಿದೆ.

chase

ಇದೀಗ ಬಿಡುಗಡೆಯಾಗಿರೋ ಟೀಸರ್ ಅದನ್ನು ಮತ್ತಷ್ಟು ತೀವ್ರವಾಗಿಸುವಂತೆ ಮೂಡಿ ಬಂದಿದೆ. ಇದನ್ನು ಕಂಡು ಎಲ್ಲ ವರ್ಗದ ಪ್ರೇಕ್ಷಕರೂ ಥ್ರಿಲ್ ಆಗಿದ್ದಾರೆ. ಈ ಮೂಲಕ ಚೇಜ್ ಅನ್ನು ಆದಷ್ಟು ಬೇಗನೆ ಕಣ್ತುಂಬಿಕೊಳ್ಳಬೇಕೆಂಬ ತಹ ತಹ ಕೂಡಾ ತೀವ್ರವಾಗಿ ಬಿಟ್ಟಿದೆ.

ಸಿಂಪ್ಲಿ ಫನ್ ಮೀಡಿಯಾ ಬ್ಯಾನರಿನಡಿಯಲ್ಲಿ ನಿರ್ಮಾಣಗೊಂಡಿರುವ ಈ ಚಿತ್ರ ವಿಲೋಕ್ ಶೆಟ್ಟಿಯವರ ಚೊಚ್ಚಲ ಪ್ರಯತ್ನ. ವಿಲೋಕ್ ಶೆಟ್ಟಿ ಸಾಹಿತ್ಯದತ್ತ ಬಹಳಷ್ಟು ಒಲವು ಹೊಂದಿಕೊಂಡೇ ಸಿನಿಮಾ ಧ್ಯಾನದಲ್ಲಿ ತಲ್ಲೀನವಾಗಿದ್ದ ಪ್ರತಿಭೆ. ಆ ಬಲದಿಂದಲೇ ಗಟ್ಟಿ ಕಥೆಯೊಂದನ್ನು ಸಿದ್ಧ ಪಡಿಸಿಕೊಂಡು ಅವರು ಈ ಚಿತ್ರವನ್ನು ನಿರ್ದೇಶನ ಮಾಡಿದ್ದಾರೆ. ಇದು ಕ್ರೈಂ ಥ್ರಿಲ್ಲರ್ ಸಸ್ಪೆನ್ಸ್ ಅಂಶಗಳನ್ನೊಳಗೊಂಡಿರೋ ಚಿತ್ರ. ಬೆಂಗಳೂರಿನಂಥಾ ನಗರಗಳಲ್ಲಿ ಮಹಿಳೆಯರು ರಾತ್ರಿ ಹೊತ್ತು ಒಂಟಿಯಾಗಿ ಓಡಾಡೋದು ಎಷ್ಟು ಸೇಫ್ ಎಂಬ ಸೂಕ್ಷ್ಮದಿಂದಲೇ ಬಿಚ್ಚಿಕೊಳ್ಳುವಂಥಾ ರೋಚಕ ಕಥಾಹಂದರವನ್ನು ಈ ಚಿತ್ರ ಒಳಗೊಂಡಿದೆ. ಅದೆಷ್ಟು ರೋಚಕವಾಗಿದೆ ಅನ್ನೋದು ಇದೀಗ ಬಿಡುಗಡೆಯಾಗಿರೋ ಟೀಸರ್ ಮತ್ತು ಅದಕ್ಕೆ ಸಿಗುತ್ತಿರೋ ಅಭೂತಪೂರ್ವ ಪ್ರತಿಕ್ರಿಯೆಗಳೇ ಸಾಬೀತು ಮಾಡುತ್ತವೆ.

ವಿಲೋಕ್ ಶೆಟ್ಟಿ ಅಖಂಡ ಎರಡು ವರ್ಷಗಳ ಕಾಲ ಪರಿಶ್ರಮ ವಹಿಸಿ ರೂಪಿಸಿರೋ ಚಿತ್ರವಿದು. ಅದು ಈ ಟೀಸರ್ ಮೂಲಕ ಸಾರ್ಥಕಗೊಂಡಿದೆ. ಲಕ್ಷ ಲಕ್ಷ ವೀಕ್ಷಣೆ ಮತ್ತು ದಂಡಿ ದಂಡಿ ಸದಾಭಿಪ್ರಾಯಗಳೊಂದಿಗೆ ಅದೀಗ ವೈರಲ್ ಆಗಿ ಬಿಟ್ಟಿದೆ. ಇದರಲ್ಲಿನ ಚುರುಕುತನ, ಥ್ರಿಲ್ಲರ್ ಅಂಶಗಳು ಮತ್ತು ಬೆಚ್ಚಿ ಬೀಳಿಸುವಂಥಾ ಕ್ರೈಂ ಚಿತ್ರಣಕ್ಕೆ ಪ್ರೇಕ್ಷಕರು ಮನಸೋತಿದ್ದಾರೆ. ಈ ಚಿತ್ರದಲ್ಲಿ ರಾಧಿಕಾ ನಾರಾಯಣ್ ಮತ್ತು ಅವಿನಾಶ್ ನರಸಿಂಹರಾಜು ಪ್ರಧಾನ ಪಾತ್ರಗಳನ್ನು ನಿರ್ವಹಿಸಿದ್ದಾರೆ. ಇನ್ನುಳಿದಂತೆ ಶೀತಲ್ ಶೆಟ್ಟಿ, ರಾಜೇಶ್ ನಟರಂಗ, ಸುಶಾಂತ್ ಪೂಜಾರಿ ಮುಂತಾದವರು ಕೂಡಾ ವೈಶಿಷ್ಟ್ಯ ಪೂರ್ಣವಾದ ಪಾತ್ರಗಳಿಗೆ ಜೀವ ತುಂಬಿದ್ದಾರಂತೆ.