ರಾಜನಂದಿನಿಯಾಗಿ ಕಿರುತೆರೆಗೆ ಬಂದ ನಟಿ ಸೋನು ಗೌಡ

ಬೆಂಗಳೂರು: ಹಿರಿ ತೆರೆಯ ನಟಿಯರು ಕಿರುತೆರೆಗೆ ಬರುವುದು ಇತ್ತೀಚೆಗಿನ ದಿನಗಳಲ್ಲಿ ಟ್ರೆಂಡ್ ಆಗಿದೆ. ಆ ಸಾಲಿಗೆ ನಟಿ ಸೋನು ಗೌಡ ಸೇರಿಕೊಂಡಿದ್ದಾರೆ.

ಜೀ ಕನ್ನಡದಲ್ಲಿ ಪ್ರಸಾರವಾಗುತ್ತಿರುವ ಸೆನ್ಸೇಷನಲ್ ಧಾರವಾಹಿ ಜೊತೆ ಜೊತೆಯಲಿ ಈಗ ಕುತೂಹಲಕಾರಿ ಘಟ್ಟದಲ್ಲಿದ್ದು, ಈ ಧಾರವಾಹಿಯಲ್ಲಿ ವೀಕ್ಷಕರು ಬಹುದಿನಗಳಿಂದ ‘ರಾಜನಂದಿನಿ’ ಪಾತ್ರ ಯಾರು ಮಾಡಲಿದ್ದಾರೆ ಎಂದು ಪ್ರಶ್ನೆ ಮಾಡುತ್ತಿದ್ದರು. ಆ ಪ್ರಶ್ನೆಗೆ ಈಗ ಉತ್ತರ ಸಿಕ್ಕಿದೆ.

ಸ್ಯಾಂಡಲ್ ವುಡ್ ನಟಿ ಸೋನು ಗೌಡ ಜೊತೆ ಜೊತೆಯಲಿ ಧಾರವಾಹಿಯಲ್ಲಿ ರಾಜನಂದಿನಿ ಪಾತ್ರ ಮಾಡಲಿದ್ದಾರೆ. ನಾಯಕ  ನಟ ಅನಿರುದ್ಧ್ ಗೆ ಜೋಡಿಯಾಗಿ ಸೋನು ಗೌಡ ಕೆಲವು ಸಂಚಿಕೆಗಳಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ರಾಜನಂದಿನಿ ನಾಯಕ ಆರ್ಯವರ್ಧನ್ ಮೊದಲ ಪತ್ನಿಯ ಹೆಸರು. ಈ ಪಾತ್ರವೇ ಈ ಧಾರವಾಹಿಯ ಜೀವಾಳ. ಈಗ ಈ ಪ್ರಮುಖ ಪಾತ್ರ ಮಾಡಲು ಧಾರವಾಹಿ ತಂಡ ಬೇಡಿಕೆಯ ನಟಿಯನ್ನೇ ಕರೆತಂದಿದೆ. ಈ ಪಾತ್ರ ಮಾಡಲು ಹಿಂದಿ ನಟಿಯನ್ನು ಕರೆಸಿಕೊಳ್ಳುತ್ತಾರೆ ಎಂಬಿತ್ಯಾದಿ ರೂಮರ್ ಗಳು ಕೆಲವು ದಿನಗಳ ಹಿಂದಿತ್ತು. ಆದರೆ ಈಗ ಅಪ್ಪಟ ಕನ್ನಡತಿ ಸೋನು ಗೌಡ ಈ ಪವರ್ ಫುಲ್ ಪಾತ್ರರ ನಿಭಾಯಿಸಲಿದ್ದಾರೆ. ಇನ್ನು ಮುಂದಿನ ಸಂಚಿಕೆಗಳಲ್ಲಿ ರಾಜನಂದಿನಿಯ ಸುತ್ತ ನಡೆಯುವ ಕತೆ ರೋಚಕವಾಗಿರಲಿದ್ದು, ಪ್ರೇಕ್ಷಕರಿಗೆ ಥ್ರಿಲ್ ಕೊಡಲಿದೆ.