ಹೈದರಾಬಾದ್: ಟ್ವೀಟ್ ಒಂದಕ್ಕೆ ಪ್ರತಿಕ್ರಿಯೆ ನೀಡುವಾಗ ಕೀಳು ಮಟ್ಟದ ಕಾಮೆಂಟ್ ಮಾಡಿ ಟೀಕೆಗೊಳಗಾಗಿದ್ದ ನಟ ಸಿದ್ಧಾರ್ಥ್ ಈಗ ಖ್ಯಾತ ಬ್ಯಾಡ್ಮಿಂಟನ್ ತಾರೆ ಸೈನಾ ನೆಹ್ವಾಲ್ ಗೆ ಪತ್ರ ಮುಖೇನ ಬೇಷರತ್ ಕ್ಷಮೆ ಯಾಚಿಸಿದ್ದಾರೆ.
ಸೈನಾ ಬಗ್ಗೆ ಕಾಕ್ ಚಾಂಪಿಯನ್ ಎಂದು ಕೆಟ್ಟ ಭಾಷೆಯಲ್ಲಿ ಪ್ರತಿಕ್ರಿಯಿಸಿದ್ದ ಸಿದ್ಧಾರ್ಥ್ ವಿರುದ್ಧ ಸ್ವತಃ ಮಹಿಳಾ ಆಯೋಗ ಸಿಡಿದೆದ್ದಿತ್ತು. ಪುರುಷರ ಗುಪ್ತಾಂಗಕ್ಕೆ ಹೋಲಿಸಿ ಸೈನಾಗೆ ಕಾಮೆಂಟ್ ಮಾಡಿ ಟೀಕಗೊಳಗಾಗಿದ್ದ ಸಿದ್ಧಾರ್ಥ್ ಈಗ ಕ್ಷಮೆ ಯಾಚಿಸಿದ್ದಾರೆ.
‘ಡಿಯರ್ ಸೈನಾ, ನನ್ನ ಜೋಕ್ ಬಗ್ಗೆ ಕ್ಷಮೆ ಯಾಚಿಸುತ್ತೇನೆ. ಕೆಲವು ದಿನಗಳ ಹಿಂದೆ ನೀವು ಮಾಡಿದ ಟ್ವೀಟ್ ನನಗೆ ಕೋಪ ತರಿಸಿರಬಹುದು. ಆದರೆ ಅದಕ್ಕೆ ನಾನು ಪ್ರತಿಕ್ರಿಯಿಸಿದ ರೀತಿಯಿಂದ ನಿಮಗೆ ಬೇಸರವಾಗಿದ್ದರಿಂದ ಕ್ಷಮೆ ಯಾಚಿಸುತ್ತೇನೆ. ನನಗೆ ಮಹಿಳೆಯರ ಮೇಲೆ ಅಪಾರವಾದ ಗೌರವವಿದೆ. ಈ ಜೋಕ್ ಮಾಡುವ ಮೂಲಕ ಮಹಿಳೆಯಾಗಿ ನಿಮ್ಮ ಮೇಲೆ ಆಕ್ರಮಣ ಮಾಡುವುದು ನನ್ನ ಉದ್ದೇಶವಾಗಿರಲಿಲ್ಲ. ಈ ಪತ್ರವನ್ನು ಸ್ವೀಕರಿಸಿ ಕ್ಷಮೆ ಸ್ವೀಕರಿಸಿ. ನೀವು ಯಾವತ್ತೂ ನನ್ನ ಪಾಲಿಗೆ ಚಾಂಪಿಯನ್’ ಎಂದು ಸಿದ್ಧಾರ್ಥ್ ಸುದೀರ್ಘವಾಗಿ ಪತ್ರ ಬರೆದು ಬಹಿರಂಗವಾಗಿ ಕ್ಷಮೆ ಯಾಚಿಸಿದ್ದಾರೆ.
