ಐಪಿಎಲ್ 14: ಫಿನಿಶರ್ ಧೋನಿಯಿಂದ ಗೆದ್ದ ಚೆನ್ನೈ ಫೈನಲ್ ಗೆ

ದುಬೈ: ಐಪಿಎಲ್ 14 ರಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ತಂಡ ಡೆಲ್ಲಿ ವಿರುದ್ಧ ಪ್ಲೇ ಆಫ್ ಪಂದ್ಯದಲ್ಲಿ 4 ವಿಕೆಟ್ ಗಳಿಂದ ಗೆದ್ದು ಮೊದಲ ತಂಡವಾಗಿ ಫೈನಲ್ ಗೇರಿದೆ.

ವಿಶೇಷವೆಂದರೆ ಇಷ್ಟು ದಿನ ಫಾರ್ಮ್ ಕೊರತೆಯಿಂದ ಬಳಲುತ್ತಿದ್ದ ನಾಯಕ ಧೋನಿ ನಿನ್ನೆಯ ಪಂದ್ಯದಲ್ಲಿ ತಮ್ಮ ಹಳೆಯ ಫಿನಿಶರ್ ಅವತಾರ ದರ್ಶನ ಮಾಡಿದರು. 6 ಎಸೆತಗಳಲ್ಲಿ 3 ಬೌಂಡರಿ, ಒಂದು ಸಿಕ್ಸರ್ ಸಿಡಿಸಿ ಗೆಲುವು ಕೊಡಿಸಿದರು.

ಮೊದಲು ಬ್ಯಾಟಿಂಗ್ ಮಾಡಿದ ಡೆಲ್ಲಿ ಪೃ‍ಥ್ವಿ ಶಾ (60), ರಿಷಬ್ ಪಂತ್ (ಅಜೇಯ 57), ಹೆಟ್ ಮೇರ್ (37) ಆಟದ ನೆರವಿನಿಂದ ನಿಗದಿತ 20 ಓವರ್ ಗಳಲ್ಲಿ 5 ವಿಕೆಟ್ ನಷ್ಟಕ್ಕೆ 172 ರನ್ ಗಳಿಸಿತು. ಮಧ್ಯಮ ಕ್ರಮಾಂಕದಲ್ಲಿ ಶ್ರೇಯಸ್ ಐಯರ್ 1 ರನ್ , ಆರಂಭಿಕ ಶಿಖರ್ ಧವನ್ 7 ರನ್ ಗೆ ಔಟಾಗಿದ್ದರಿಂದ ಡೆಲ್ಲಿಗೆ ಬೃಹತ್ ಮೊತ್ತ ಪೇರಿಸಲಾಗಲಿಲ್ಲ.

ಇದಕ್ಕೆ ಉತ್ತರವಾಗಿ ಬ್ಯಾಟಿಂಗ್ ಆರಂಭಿಸಿದ ಚೆನ್ನೈಗೆ ಋತುರಾಜ್ ಗಾಯಕ್ ವಾಡ್, ರಾಬಿನ್ ಉತ್ತಪ್ಪ ಆಸರೆಯಾದರು. ಋತುರಾಜ್ 70 ರನ್ ಸಿಡಿಸಿದರೆ ಉತ್ತಪ್ಪ 63 ರನ್ ಗಳ ಕಾಣಿಕೆ ನೀಡಿದರು. ಅಂತಿಮವಾಗಿ ಚೆನ್ನೈ 19.4 ಓವರ್ ಗಳಲ್ಲಿ 6 ವಿಕೆಟ್ ನಷ್ಟಕ್ಕೆ 173 ರನ್ ಗಳಿಸಿ ಗೆಲುವು ಸಾಧಿಸುವುದರೊಂದಿಗೆ ಫೈನಲ್ ಗೆ ಲಗ್ಗೆಯಿಟ್ಟಿತು.