ದುಬೈ: ಈ ಬಾರಿಯ ಐಪಿಎಲ್ ದುಬೈನಲ್ಲಿ ನಡೆಯುತ್ತದೆಂದು ಆಟಗಾರರೇನೋ ಈಗಾಗಲೇ ಅರಬ್ ರಾಷ್ಟ್ರದಲ್ಲಿ ಬೀಡುಬಿಟ್ಟಿದ್ದಾರೆ. ಆದರೆ ಐಪಿಎಲ್ ಸಂಪೂರ್ಣ ವೇಳಾಪಟ್ಟಿಯನ್ನು ಬಿಸಿಸಿಐ ಇನ್ನೂ ಬಿಡುಗಡೆ ಮಾಡಿಲ್ಲ.
ಜತೆಗೆ ಚೆನ್ನೈ ಸೂಪರ್ ಕಿಂಗ್ಸ್ ತಂಡದಲ್ಲಿ ಕೊರೋನಾ ಪ್ರಕರಣಗಳೂ ಪತ್ತೆಯಾಗಿದ್ದು, ಮತ್ತಷ್ಟು ಆತಂಕ ಹೆಚ್ಚಿಸಿದೆ. ಈ ನಡುವೆ ಪ್ರಮುಖ ಫ್ರಾಂಚೈಸಿಯೊಂದು ಆಟಗಾರರ ವೆಚ್ಚ ಭರಿಸಲು ಹಿಂದೇಟು ಹಾಕುತ್ತಿರುವುದರ ವಿರುದ್ಧ ಬಿಸಿಸಿಐ ಆಕ್ರೋಶ ವ್ಯಕ್ತಪಡಿಸಿದೆ ಎನ್ನಲಾಗಿದೆ.
ಒಂದು ವೇಳೆ ಐಪಿಎಲ್ ನಡೆಯುವುದಿಲ್ಲ ಎಂದಾಗಿದ್ದರೆ ಈ ಫ‍್ರಾಂಚೈಸಿಗಳಿಗೆ ಹಣ ಗಳಿಸಲು ಸಾಧ‍್ಯವಾಗುತ್ತಿತ್ತೇ? ಈಗ ಆಟಗಾರರ ನಿರ್ವಹಣೆಗೆ ವಿಪರೀತ ಖರ್ಚಾಗುತ್ತಿದೆ ಎಂದು ದೂರುತ್ತಿರುವುದು ಸರಿಯಲ್ಲ ಎಂದು ಬಿಸಿಸಿಐ ಮೂಲಗಳು ಕಿಡಿ ಕಾರಿವೆ ಎನ್ನಲಾಗಿದೆ. ಅಂತೂ ಐಪಿಎಲ್ ಆರಂಭಕ್ಕೂ ಮೊದಲೇ ಗೊಂದಲದ ಗೂಡಾಗಿರುವುದು ನಿಜ.
