ಐಪಿಎಲ್ 13: ಡೆಲ್ಲಿ ಮೇಲೆ ಮುಗಿಬಿದ್ದ ಮುಂಬೈ ಫೈನಲ್ ಗೆ ಲಗ್ಗೆ

ದುಬೈ: ಐಪಿಎಲ್ 13 ರಲ್ಲಿ ಫೈನಲ್ ಪ್ರವೇಶಿಸಿದ ಮೊದಲ ತಂಡ ಮುಂಬೈ ಇಂಡಿಯನ್ಸ್. ಮೊದಲ ಪ್ಲೇ ಆಫ್ ಪಂದ್ಯದಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ವಿರುದ್ಧ ಎಲ್ಲಾ ವಿಭಾಗಗಳಲ್ಲೂ ಮುಗಿಬಿದ್ದ ಮುಂಬೈ 57 ರನ್ ಗಳ ಭರ್ಜರಿ ಜಯಗಳಿಸಿತು.

ಮೊದಲು ಬ್ಯಾಟಿಂಗ್ ಮಾಡಿದ ಮುಂಬೈ ನಿಗದಿತ 20 ಓವರ್ ಗಳಲ್ಲಿ ಭರ್ತಿ 200 ರನ್ ಗಳಿಸಿತು. ಮುಂಬೈ ಪರ ಇಶಾನ್ ಕಿಶನ್ 55, ಸೂರ್ಯಕುಮಾರ್ ಯಾದವ್ 55 ರನ್ ಗಳಿಸಿದರು. ನಾಯಕ ರೋಹಿತ್ ಶರ್ಮಾರದ್ದು ಶೂನ್ಯ ಸಂಪಾದನೆ.

ಈ ಬೃಹತ್ ಮೊತ್ತ ಬೆನ್ನತ್ತಿದ ಡೆಲ್ಲಿ ಆರಂಭದಿಂದಲೇ ಎಡವಿತು. 36 ರನ್ ಗಳಾಗುವಷ್ಟರಲ್ಲಿ ಪ್ರಮುಖ ನಾಲ್ಕು ವಿಕೆಟ್ ಕಳೆದುಕೊಂಡಿತು. ಅದರಲ್ಲೂ ಆರಂಭದ ಮೂವರು ಬ್ಯಾಟ್ಸ್ ಮನ್ ಗಳದ್ದು ಶೂನ್ಯ ಸಂಪಾದನೆ. ಇದರಿಂದಾಗಿ ಡೆಲ್ಲಿ ಸಂಕಷ್ಟ ಸ್ಥಿತಿಗೆ ತಲುಪಿತ್ತು. ಈ ವೇಳೆ ಮಾರ್ಕ್ ಸ್ಟಾಯ್ನಿಸ್ 65 ರನ್ ಗಳಿಸಿ ಚೇತರಿಕೆ ನೀಡಿದರು. ಆದರೆ ಅಂತಿಮವಾಗಿ ಡೆಲ್ಲಿ 20 ಓವರ್ ಗಳಲ್ಲಿ 8 ವಿಕೆಟ್ ನಷ್ಟಕ್ಕೆ 143 ರನ್ ಗಳಿಸಲಷ್ಟೇ ಶಕ್ತವಾಯಿತು. ಇದರೊಂದಿಗೆ ಮುಂಬೈ ನೇರವಾಗಿ ಫೈನಲ್ ಪ್ರವೇಶಿಸಿತು.