ಮಗಳು ವಮಿಕಾ ಅಮ್ಮನಂತೆ ಆಗಲಿ ಎಂದ ವಿರಾಟ್ ಕೊಹ್ಲಿ

ಮುಂಬೈ: ಮಹಿಳಾ ದಿನಾಚರಣೆಯ ಅಂಗವಾಗಿ ಟೀಂ ಇಂಡಿಯಾ ನಾಯಕ ವಿರಾಟ್ ಕೊಹ್ಲಿ ತಮ್ಮ ಮುದ್ದಿನ ಮಡದಿ ಅನುಷ್ಕಾ ಹಾಗೂ ಮಗಳು ವಮಿಕಾಗೆ ವಿಶ್ ಮಾಡಿದ್ದಾರೆ.

ಇಬ್ಬರ ಫೋಟೋವನ್ನು ಸಾಮಾಜಿಕ ಜಾಲತಾಣದಲ್ಲಿ ಪ್ರಕಟಿಸಿರುವ ವಿರಾಟ್, ‘ಒಂದು ಮಗು ಹಡೆಯುವುದನ್ನು ನೋಡುವುದೇ ಅಚ್ಚರಿಯ, ಹಿತವಾದ ನಡುಕ ಹುಟ್ಟಿಸುವ ಅದ್ಭುತ ಅನುಭವ. ಅದನ್ನು ಅನುಭವಿಸಿದ ಮೇಲೆ ಒಬ್ಬ ಮಹಿಳೆಗೆ ದೇವರೇ ನೀಡಿದ ಶಕ್ತಿ ಮತ್ತು ಸಾಮರ್ಥ್ಯ ಪುರುಷರಿಗಿಂತಲೂ ಹೆಚ್ಚು ಎಂದು ಅರಿವಾಗಿದೆ. ಎಲ್ಲಾ ಮಹಿಳೆಯರಿಗೂ ಮಹಿಳಾ ದಿನಾಚರಣೆಯ ಶುಭಾಶಯಗಳು.

ಅದರಲ್ಲೂ ವಿಶೇಷವಾಗಿ ನನ್ನ ಜೀವನದ ಅತ್ಯಂತ ವಿಶೇಷ, ಸಶಕ್ತ ಮಹಿಳೆ ಮತ್ತು ಆಕೆಯಂತೇ ಬೆಳೆದು ದೊಡ್ಡವಳಾಗಲಿರುವ ಮಗಳಿಗೆ ಮಹಿಳಾ ದಿನಾಚರಣೆಯ ಶುಭಾಶಯಗಳು’ ಎಂದು ವಿರಾಟ್ ಸುದೀರ್ಘವಾಗಿ ಬರೆದುಕೊಂಡಿದ್ದಾರೆ. ಜೊತೆಗೆ ಅನುಷ್ಕಾ ಮತ್ತು ಮಗಳ ಖುಷಿಯ ಕ್ಷಣದ ಫೋಟೋವೊಂದನ್ನೂ ಪ್ರಕಟಿಸಿದ್ದಾರೆ.