ಲಾರ್ಡ್ಸ್ ಅಂಗಣದಲ್ಲಿ ಯುವಿ-ಕೈಫ್ ಜೋಡಿ ಫೋಟೋ ನೋಡಿ ಬೆಚ್ಚಿಬಿದ್ದ ನಾಸಿರ್ ಹುಸೇನ್

ಲಂಡನ್: 2002 ರ ನ್ಯಾಟ್ ವೆಸ್ಟ್ ಸರಣಿಯಲ್ಲಿ ಭಾರತ ಇಂಗ್ಲೆಂಡ್ ವಿರುದ್ಧ ಫೈನಲ್ ಪಂದ್ಯವನ್ನು ಗೆದ್ದಿದ್ದು, ಗೆದ್ದ ಮೇಲೆ ಗಂಗೂಲಿ ಶರ್ಟ್ ಬಿಚ್ಚಿ ಕುಣಿದಾಡಿದ್ದು ಇಂದಿಗೂ ಕ್ರಿಕೆಟ್ ಪ್ರಿಯರ ಮನಸ್ಸಲ್ಲಿ ಹಸಿರಾಗಿದೆ.

ಅಂದು ಭಾರತವನ್ನು ಅಸಾಧ್ಯ ಗೆಲುವಿನತ್ತ ಕೊಂಡೊಯ್ದಿದ್ದು ಟೀಂ ಇಂಡಿಯಾ ಬ್ಯಾಟ್ಸ್ ಮನ್ ಗಳಾದ ಯುವರಾಜ್ ಸಿಂಗ್ ಮತ್ತು ಮೊಹಮ್ಮದ್ ಕೈಫ್ ಜೋಡಿ. ಆ ಮ್ಯಾರಥಾನ್ ಇನಿಂಗ್ಸ್ ಆಡಿದ ಜೋಡಿ ಇದೀಗ ಮತ್ತೆ ಲಾರ್ಡ್ಸ್ ಅಂಗಣದಲ್ಲಿ ಜತೆಯಾಗಿ ನಿಂತು ಫೋಟೋ ತೆಗೆಸಿಕೊಂಡು ಸಾಮಾಜಿಕ ಜಾಲತಾಣದಲ್ಲಿ ಪ್ರಕಟಿಸಿದ್ದಾರೆ.

ಇದನ್ನು ನೋಡಿದ ಅಂದು ಇಂಗ್ಲೆಂಡ್ ನಾಯಕರಾಗಿದ್ದ ನಾಸಿರ್ ಹುಸೇನ್ ಪ್ರತಿಕ್ರಿಯಿಸಿದ್ದು ‘ಈ ಫೋಟೋ ನೋಡುತ್ತಾ ಬೆಳಗಾಗಲು ಯಾರೂ ಇಷ್ಟಪಡಲ್ಲ. ಇಂದಿಗೂ ಅಂದಿನ ಇವರ ಆಟ ನೆನೆಸಿಕೊಂಡರೆ ರಾತ್ರಿಯೂ ಬೆಚ್ಚಿಬೀಳುವ ಕನಸು ಬೀಳುತ್ತೆ’ ಎಂದು ಹುಸೇನ್ ತಮಾಷೆಯಾಗಿ ಬರೆದುಕೊಂಡಿದ್ದಾರೆ.