ಶ್ರೀಲಂಕಾ ಸರಣಿ ಮುಗಿದ ಬೆನ್ನಲ್ಲೇ ಭಾರತಕ್ಕೆ ಟಾಟಾ ಬೈ ಬೈ ಎಂದು ಲಂಡನ್ ಗೆ ಹಾರಿದ ವಿರಾಟ್ ಕೊಹ್ಲಿ

ಕೊಲಂಬೊ: ಶ್ರೀಲಂಕಾ ವಿರುದ್ಧ ಏಕದಿನ ಸರಣಿಯಲ್ಲಿ ಪಾಲ್ಗೊಂಡ ಬಳಿಕ ಟೀಂ ಇಂಡಿಯಾ ಸ್ಟಾರ್ ಕ್ರಿಕೆಟಿಗ ವಿರಾಟ್ ಕೊಹ್ಲಿ ಭಾರತಕ್ಕೆ ಬರದೇ ನೇರವಾಗಿ ಲಂಡನ್ ವಿಮಾನವೇರಿದ್ದಾರೆ.

ಇತ್ತೀಚೆಗೆ ವಿರಾಟ್ ಕೊಹ್ಲಿ ತಮ್ಮ ಸಂಸಾರ ಸಮೇತ ಲಂಡನ್ ಗೆ ಶಿಫ್ಟ್ ಆಗಲಿದ್ದಾರೆ ಎಂಬ ಸುದ್ದಿ ಕೇಳಿಬರುತ್ತಿದೆ. ಅದಕ್ಕೆ ತಕ್ಕ ಹಾಗೇ ಅನುಷ್ಕಾ ಶರ್ಮಾ ಹೆರಿಗೆ ಬಳಿಕ ಹೆಚ್ಚು ಕಡಿಮೆ ಲಂಡನ್ ನಲ್ಲಿಯೇ ಇದ್ದಾರೆ. ಒಮ್ಮೆ ಮಾತ್ರ ಪುತ್ರ ಅಕಾಯ್ ಜೊತೆ ಭಾರತಕ್ಕೆ ಬಂದಿದ್ದರು. ಹೀಗಾಗಿ ಕೊಹ್ಲಿ ಕೂಡಾ ಬಹುತೇಕ ಲಂಡನ್ ನಲ್ಲಿಯೇ ಇರುತ್ತಾರೆ.

ಟಿ20 ವಿಶ್ವಕಪ್ ಗೆಲುವಿನ ಬಳಿಕ ಕೇವಲ ಒಂದೇ ದಿನಕ್ಕೆ ಭಾರತಕ್ಕೆ ಬಂದಿದ್ದ ವಿರಾಟ್ ಕೊಹ್ಲಿ ರಾತ್ರಿಯೇ ಲಂಡನ್ ವಿಮಾನವೇರಿದ್ದರು. ಅದಾದ ಬಳಿಕ ಅವರು ಭಾರತಕ್ಕೆ ಬಂದೇ ಇಲ್ಲ. ಇತ್ತೀಚೆಗೆ ಲಂಕಾ ವಿರುದ್ಧ ಏಕದಿನ ಸರಣಿಗೆ ನೇರವಾಗಿ ದ್ವೀಪ ರಾಷ್ಟ್ರಕ್ಕೇ ಬಂದಿಳಿದಿದ್ದರು.

ಇದೀಗ ಏಕದಿನ ಸರಣಿ ಮುಕ್ತಾಯವಾದ ಬೆನ್ನಲ್ಲೇ ಕೊಹ್ಲಿ ನೇರವಾಗಿ ಲಂಡನ್ ಗೆ ಮರಳಿದ್ದಾರೆ. ಈ ಮೂಲಕ ಅವರು ಲಂಡನ್ ನಲ್ಲಿಯೇ ನೆಲೆಸಲಿದ್ದಾರೆ ಎಂಬ ಸುದ್ದಿಗೆ ಮತ್ತಷ್ಟು ಪುಷ್ಠಿ ಸಿಕ್ಕಂತಾಗಿದೆ. ಕೊಹ್ಲಿ ಲಂಡನ್ ಗೆ ತೆರಳಿರುವುದನ್ನು ನೋಡಿದ ಫ್ಯಾನ್ಸ್ ಅಲ್ಲೇ ಇರಿ, ಇಲ್ಲಿಗೆ ಯಾಕೆ ಬರ್ತೀರಿ ಎಂದು ಆಕ್ರೋಶವನ್ನೂ ವ್ಯಕ್ತಪಡಿಸಿದ್ದಾರೆ.