ಕೊಹ್ಲಿ ಹೆಸರಿನಲ್ಲಿ ಬೆಂಗಳೂರಿನಲ್ಲಿ ರೆಸ್ಟೋರೆಂಟ್ ತೆರೆದ ಅಭಿಮಾನಿ

Photo Courtesy: Twitter

ಬೆಂಗಳೂರು: ಟೀಂ ಇಂಡಿಯಾ ಸ್ಟಾರ್ ಕ್ರಿಕೆಟಿಗ ವಿರಾಟ್ ಕೊಹ್ಲಿ ಎಂದರೆ ಜೀವ ಬಿಡುವ ಅದೆಷ್ಟೋ ಹುಚ್ಚು ಅಭಿಮಾನಿಗಳಿದ್ದಾರೆ. ಕಿಂಗ್ ಕೊಹ್ಲಿಯ ಜೊತೆ ಒಂದು ಸೆಲ್ಫೀ ತೆಗೆದುಕೊಳ್ಳಬೇಕೆಂದು ಮೈದಾನಕ್ಕೆ ನುಗ್ಗುವ ಅಭಿಮಾನಿಗಳನ್ನು ನೋಡಿದ್ದೇವೆ.

ಇದೀಗ ಬೆಂಗಳೂರಿನಲ್ಲಿ ಅಭಿಮಾನಿಯೊಬ್ಬರು ಕೊಹ್ಲಿ ಹೆಸರಿನಲ್ಲಿ ರೆಸ್ಟೋರೆಂಟ್ ಒಂದನ್ನು ತೆರೆದು ಸುದ್ದಿಯಾಗಿದ್ದಾರೆ. ಕೊಹ್ಲಿ ಮೇಲಿನ ಅಭಿಮಾನದಿಂದ ತಮ್ಮ ರೆಸ್ಟೋರೆಂಟ್ ಗೆ ಕೊಹ್ಲಿ’ಸ್ ಕಿಚನ್ ಎಂದು ನಾಮಕರಣ ಮಾಡಿದ್ದಾರೆ. ಇಲ್ಲಿ ವೆಜ್ ಮತ್ತು ನಾನ್ ವೆಜ್ ಶೈಲಿಯ ಆಹಾರ ನೀಡಲಾಗುತ್ತದೆ.

ಬೆಂಗಳೂರು ಕೊಹ್ಲಿಗೆ ಎರಡನೇ ತವರು
ಐಪಿಎಲ್ ನಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದ ಪರ ಆಡುವ ಕಾರಣಕ್ಕೆ ಕೊಹ್ಲಿಗೆ ಇದು ಎರಡನೇ ತವರಾಗಿದೆ. ಆಗಾಗ ಕೊಹ್ಲಿ ತಮ್ಮ ಬೆಂಗಳೂರು ಪ್ರೀತಿಯ ಬಗ್ಗೆ ಹೇಳಿಕೊಳ್ಳುತ್ತಾರೆ. ಇಲ್ಲಿನ ಅಭಿಮಾನಿಗಳೂ ಅವರನ್ನು ತಮ್ಮ ನೆಲದ ಕ್ರಿಕೆಟಿಗನಂತೇ ಪ್ರೀತಿಸುತ್ತಾರೆ.

ಇದೇ ರೀತಿ ಈ ಅಭಿಮಾನಿಯೂ ಅವರ ಮೇಲಿನ ಪ್ರೀತಿಯಿಂದ ಕೊಹ್ಲಿ ಕಿಚನ್ ತೆರೆದಿದ್ದಾರೆ. ಕೇವಲ ಹೆಸರಿಗೆ ಮಾತ್ರ ಕೊಹ್ಲಿ ಎಂದು ನಾಮಕರಣ ಮಾಡಿಲ್ಲ. ಈ ರೆಸ್ಟೋರೆಂಟ್ ನಲ್ಲಿ ಕೊಹ್ಲಿಯ ಇಷ್ಟದ ಕಾಂಟಿನೆಂಟಲ್, ಚೈನೀಸ್, ತಂದೂರಿ ಇತ್ಯಾದಿ ಆಹಾರಗಳೂ ಸಿಗಲಿವೆ. ಇದೀಗ ಕೊಹ್ಲಿ ಹೆಸರು ನೋಡಿಯೇ ಗ್ರಾಹಕರು ಈ ರೆಸ್ಟೋರೆಂಟ್ ಗೆ ಬರುತ್ತಿದ್ದಾರಂತೆ. ಬೆಂಗಳೂರಿನ ಬನಶಂಕರಿಯ, ಮುನೇಶ್ವರ ನಗರ ರಸ್ತೆಯಲ್ಲಿ ಈ ರೆಸ್ಟೋರೆಂಟ್ ಇದೆ.