ಲಂಡನ್ ವಾಸಿಯಾದ ಮೇಲೆ ರನ್ ಬರಗಾಲ ಎದುರಿಸುತ್ತಿರುವ ವಿರಾಟ್ ಕೊಹ್ಲಿ

ಚೆನ್ನೈ: ಮಗ ಅಕಾಯ್ ಜನಿಸಿದ ಬಳಿಕ ಹೆಚ್ಚು ಕಡಿಮೆ ಲಂಡನ್ ನಿವಾಸಿಯಾಗಿರುವ ವಿರಾಟ್ ಕೊಹ್ಲಿ ತಮ್ಮ ವೃತ್ತಿ ಜೀವನದ ಕಡೆಗೆ ಗಮನ ಕೊಡುವುದು ಕಡಿಮೆಯಾಗಿದೆಯೇನೋ ಎಂಬ ಅನುಮಾನ ಅಭಿಮಾನಿಗಳಿಗೆ ಶುರುವಾಗಿದೆ. ಇದಕ್ಕೆ ಅವರು ಕಳೆದ ಕೆಲವು ತಿಂಗಳಿನಿಂದ ಎದುರಿಸುತ್ತಿರುವ ರನ್ ಬರಗಾಲವೇ ಸಾಕ್ಷಿ.

ವಿರಾಟ್ ಕೊಹ್ಲಿ ಎರಡನೇ ಮಗುವಿನ ಜನನದ ಬಳಿಕ ಹೆಚ್ಚು ಸಮಯ ತಮ್ಮ ಕುಟುಂಬಕ್ಕಾಗಿ ಮೀಸಲಿಡುತ್ತಿದ್ದಾರೆ. ಕಳೆದ ಐಪಿಎಲ್, ಟಿ20 ವಿಶ್ವಕಪ್ ಎಲ್ಲದರಲ್ಲೂ ಕೊಹ್ಲಿಯಿಂದ ಹೇಳಿಕೊಳ್ಳುವಂತಹ ಇನಿಂಗ್ಸ್ ಬಂದಿಲ್ಲ. ಅನೇಕ ಬಾರಿ ಅವರು ನಿಧಾನಗತಿಯ ಬ್ಯಾಟಿಂಗ್ ನಿಂದ ಟೀಕೆಗೊಳಗಾಗಿದ್ದು ಇದೆ.

ಅದರಲ್ಲೂ ಐಸಿಸಿ ಟೂರ್ನಿಗಳಲ್ಲಿ ಸಿಡಿದೇಳುವ ಕೊಹ್ಲಿ ಕಳೆದ ಟಿ20 ವಿಶ್ವಕಪ್ ನಲ್ಲಿ ಫೈನಲ್ ಪಂದ್ಯ ಬಿಟ್ಟರೆ ಉಳಿದೆಲ್ಲಾ ಪಂದ್ಯಗಳಲ್ಲಿ ಎಡವಿದ್ದರು. ಇದಾದ ಬಳಿಕ ಇತ್ತೀಚೆಗೆ ನಡೆದ ಶ್ರೀಲಂಕಾ ವಿರುದ್ಧದ ಸರಣಿಯಲ್ಲೂ ಅವರಿಂದ ಹೇಳಿಕೊಳ್ಳುವಂತಹ ರನ್ ಬಂದಿರಲಿಲ್ಲ.

ಇದೀಗ ಬಾಂಗ್ಲಾದೇಶ ವಿರುದ್ಧ ಟೆಸ್ಟ್ ಸರಣಿಗಾಗಿ ಅವರು ತಯಾರಿ ನಡೆಸಿದ್ದು, ಅವರ ಮೆಚ್ಚಿನ ಮಾದರಿಯಲ್ಲಾದರೂ ರನ್ ಬರಗಾಲ ನೀಗಿಸಲಿ ಎಂಬುದು ಅಭಿಮಾನಿಗಳ ಬಯಕೆ. ಕೊಹ್ಲಿಯ ಬ್ಯಾಟಿಂಗ್ ನಲ್ಲಿ ಮೊದಲಿನ ಜಿದ್ದು ಕಾಣುತ್ತಿಲ್ಲ ಎಂಬ ನಿರಾಸೆಯಲ್ಲಿ ಅವರ ಅಭಿಮಾನಿಗಳಿದ್ದಾರೆ. ಲಂಡನ್ ಮತ್ತು ಭಾರತದ ನಡುವೆ ಓಡಾಡುವುದರಲ್ಲೇ ಮುಳುಗಿರುವ ಕೊಹ್ಲಿ ಬ್ಯಾಟಿಂಗ್ ಮರೆತರಾ ಎಂದು ಟೀಕಾಕಾರರು ಟೀಕಿಸಿದ್ದು ಇದೆ. ಇದೆಲ್ಲವೂ ನೀಗಿ ಅವರು ಈ ಬಾಂಗ್ಲಾದೇಶ ಸರಣಿಯಲ್ಲಿ ಮೊದಲಿನ ಕೊಹ್ಲಿಯ ಝಲಕ್ ತೋರಿಸಲಿ ಎಂಬುದು ಅಭಿಮಾನಿಗಳ ಬಯಕೆ.