ರೋಹಿತ್ ಶರ್ಮಾ ಮಗಳಿಗಾಗಿ ಅರ್ಧಶತಕ ಸಿಡಿಸಿ ಸಂಭ್ರಮಿಸಿದ ತಿಲಕ್ ವರ್ಮ

Photo Courtesy: Twitter

ಗಯಾನ: ಭಾರತ ಮತ್ತು ವೆಸ್ಟ್ ಇಂಡೀಸ್ ನಡುವೆ ದ್ವಿತೀಯ ಟಿ20 ಪಂದ್ಯದಲ್ಲಿ ಟೀಂ ಇಂಡಿಯಾ ಪರ ಅರ್ಧಶತಕ ಸಿಡಿಸಿದ ತಿಲಕ್ ವರ್ಮ ವಿಶೇಷವಾಗಿ ಸಂಭ್ರಮಿಸಿದ್ದಾರೆ. ಇದಕ್ಕೆ ಕಾರಣವನ್ನೂ ಅವರು ನೀಡಿದ್ದಾರೆ.

ತಿಲಕ್ ವರ್ಮ ನಿನ್ನೆಯ ಪಂದ್ಯದಲ್ಲಿ 41 ಎಸೆತಗಳಿಂದ 51 ರನ್ ಗಳಿಸಿದರು. ಇದು ಅವರ ಚೊಚ್ಚಲ ಅರ್ಧಶತಕವಾಗಿತ್ತು. ಎರಡನೇ ಪಂದ್ಯದಲ್ಲೇ ತಿಲಕ್ ವರ್ಮ ಅರ್ಧಶತಕ ಸಿಡಿಸಿ ಗಮನ ಸೆಳೆದಿದ್ದಾರೆ.

ಅರ್ಧಶತಕ ಸಿಡಿಸಿದ ಬಳಿಕ ತಿಲಕ್ ವರ್ಮ ಚಿಕ್ಕಮಗುವಿನಂತೆ ಕುಣಿದಾಡಿ ಸಂಭ್ರಮಿಸಿದ್ದಾರೆ. ಇದಕ್ಕೆ ಕಾರಣ ರೋಹಿತ್ ಶರ್ಮಾ ಮಗಳು ಸಮೈರಾ. ತಿಲಕ್ ವರ್ಮ ಮುಂಬೈ ಇಂಡಿಯನ್ಸ್ ಪರ ಐಪಿಎಲ್ ಆಡುತ್ತಾರೆ. ಹೀಗಾಗಿ ಮುಂಬೈ ಇಂಡಿಯನ್ಸ್ ತಂಡದ ನಾಯಕರೂ ಆಗಿರುವ ರೋಹಿತ್ ಶರ್ಮಾ ಮಗಳ ಜೊತೆ ಅವರಿಗೆ ಉತ್ತಮ ಒಡನಾಟವಿದೆ. ಈ ವೇಳೆ ತಾನು ಅರ್ಧಶತಕ ಅಥವಾ ಶತಕ ಸಿಡಿಸಿದರೆ ಈ ರೀತಿ ಸಂಭ್ರಮಿಸುವುದಾಗಿ ಸಮೈರಾಗೆ ಪ್ರಾಮಿಸ್ ಮಾಡಿದ್ದರಂತೆ. ಆ ಪ್ರಾಮಿಸ್ ಉಳಿಸಲು ತಿಲಕ್ ಈ ರೀತಿ ಸಂಭ್ರಮಿಸಿದ್ದಾರೆ. ಅಷ್ಟೇ ಅಲ್ಲ, ಈ ಅರ್ಧಶತಕವನ್ನು ಸಮೈರಾಗೆ ಅರ್ಪಿಸಿದ್ದಾರೆ.