ಮುಂಬೈ: ಬಹಳ ದಿನಗಳಿಂದ ಟೀಂ ಇಂಡಿಯಾ ಪಂದ್ಯಗಳೇ ಇಲ್ಲದೇ ಅಭಿಮಾನಿಗಳು ನಿರಾಸೆಗೊಂಡಿದ್ದಾರೆ. ಆದರೆ ಇತ್ತ ಕ್ರಿಕೆಟಿಗರು ಬಹುದಿನಗಳ ಬ್ರೇಕ್ ಖುಷಿ ಅನುಭವಿಸುತ್ತಿದ್ದಾರೆ. ಇದೀಗ ಟೀಂ ಇಂಡಿಯಾ ಮುಂದಿನ ಸರಣಿ ಯಾವಾಗ, ಯಾರ ಜೊತೆ ಎನ್ನುವುದಕ್ಕೆ ಇಲ್ಲಿದೆ ವಿವರ.
ಟೀಂ ಇಂಡಿಯಾ ಕೊನೆಯದಾಗಿ ಶ್ರೀಲಂಕಾ ವಿರುದ್ಧ ಟಿ20 ಮತ್ತು ಏಕದಿನ ಸರಣಿ ಆಡಿತ್ತು. ಟೆಸ್ಟ್ ಸರಣಿ ಆಡದೆ ಅಂತೂ ತಿಂಗಳುಗಳೇ ಕಳೆದಿವೆ. ಆಗಸ್ಟ್ ಮೊದಲ ವಾರದಲ್ಲಿ ಭಾರತ ತಂಡ ಕೊನೆಯ ಪಂದ್ಯವನ್ನು ಆಡಿತ್ತು. ಅದಾದ ಬಳಿಕ ಇದೀಗ ಮೂರು ವಾರಗಳಿಂದ ಯಾವುದೇ ಪಂದ್ಯಗಳಿಲ್ಲ.
ಭಾರತ ತಂಡದ ಮುಂದಿನ ಸರಣಿ ಇರುವುದು ಬಾಂಗ್ಲಾದೇಶದ ವಿರುದ್ಧ. ಇದು ಆರಂಭವಾಗುವುದ ಮುಂದಿನ ತಿಂಗಳು. ಈ ಸರಣಿಯಲ್ಲಿ ಭಾರತ ತಂಡ ಟೆಸ್ಟ್ ಮತ್ತು ಟಿ20 ಸರಣಿಯನ್ನಾಡಲಿದೆ. ಮೊದಲು ಎರಡು ಟೆಸ್ಟ್ ಪಂದ್ಯಗಳ ಸರಣಿ ಆಡಲಿರುವ ಭಾರತ ನಂತರ ಮೂರು ಪಂದ್ಯಗಳ ಟಿ20 ಸರಣಿ ಆಡಲಿದೆ.
ಸೆಪ್ಟೆಂಬರ್ 19 ರಿಂದ 23 ರವರೆಗೆ ನಡೆಯಲಿರುವ ಟೆಸ್ಟ್ ಪಂದ್ಯ ಚೆನ್ನೈನ ಎಂಎ ಚಿದಂಬರಂ ಮೈದಾನದಲ್ಲಿ ನಡೆಯಲಿದೆ. ಎರಡನೇ ಪಂದ್ಯ ಸೆಪ್ಟೆಂಬರ್ 27 ರಿಂದ ಕಾನ್ಪುರದ ಗ್ರೀನ್ ಪಾರ್ಕ್ ಮೈದಾನದಲ್ಲಿ ನಡೆಯಲಿದೆ. ಅದಾದ ಬಳಿಕ ಅಕ್ಟೋಬರ್ 6 ರಿಂದ ಟಿ20 ಸರಣಿ ಆರಂಭವಾಗಲಿದೆ. ಅಕ್ಟೋಬರ್ 12 ಕ್ಕೆ ಟಿ20 ಸರಣಿ ಮುಕ್ತಾಯವಾಗುವುದು. ಬಹುಶಃ ಭಾರತ ತಂಡಕ್ಕೆ ಇಷ್ಟು ಸುದೀರ್ಘ ಬ್ರೇಕ್ ಸಿಕ್ಕಿದ್ದು ಎಷ್ಟೋ ದಿನಗಳ ನಂತರ ಎನ್ನಬಹುದು.
