ಮುಂಬೈ: ನ್ಯೂಜಿಲೆಂಡ್ ಮತ್ತು ಭಾರತ ನಡುವೆ ನಡೆಯುತ್ತಿರುವ ದ್ವಿತೀಯ ಟೆಸ್ಟ್ ಪಂದ್ಯದಲ್ಲಿ ಟೀಂ ಇಂಡಿಯಾ ಗೆಲುವಿನ ಸನಿಹ ಬಂದಿದೆ. ಮೂರನೇ ದಿನದಾಟದ ಅಂತ್ಯಕ್ಕೆ ನ್ಯೂಜಿಲೆಂಡ್ ದ್ವಿತೀಯ ಇನಿಂಗ್ಸ್ ನಲ್ಲಿ 5 ವಿಕೆಟ್ ನಷ್ಟಕ್ಕೆ 140 ರನ್ ಗಳಿಸಿದೆ.
ಭಾರತ ನೀಡಿದ 540 ರನ್ ಗಳ ಬೃಹತ್ ಮೊತ್ತ ಬೆನ್ನತ್ತಿರುವ ಕಿವೀಸ್ ಗೆ ಟೀಂ ಇಂಡಿಯಾ ಸ್ಪಿನ್ನರ್ ಗಳು ತಡೆಯಾಗಿದ್ದಾರೆ. ಆರಂಭದಲ್ಲೇ ಅಶ್ವಿನ್ ಮೂರು ವಿಕೆಟ್ ಪಡೆದ ಬಳಿಕ ಡೆರಿಲ್ ಮಿಚೆಲ್ 60 ರನ್ ಗಳಿಸಿ ಕಾಡಿದರು. ವಿಶೇಷವಾಗಿ ಅಕ್ಸರ್ ಪಟೇಲ್ ರನ್ನು ದಂಡಿಸಿದರು. ಆದರೆ ಕೊನೆಗೆ ಅವರಿಗೇ ವಿಕೆಟ್ ಒಪ್ಪಿಸಿ ನಡೆದರು.
ಇದೀಗ ಕ್ರೀಸ್ ನಲ್ಲಿ 36 ರನ್ ಗಳಿಸಿದ ಹೆನ್ರಿ ನಿಕಲಸ್, 2 ರನ್ ಗಳಿಸಿರುವ ರಚಿನ್ ರವೀಂದ್ರ ಇದ್ದಾರೆ. ಭಾರತದ ಪರ ಅಶ್ವಿನ್ 3, ಅಕ್ಸರ್ ಪಟೇಲ್ 1 ವಿಕೆಟ್ ಪಡೆದರೆ ಇನ್ನೊಂದು ವಿಕೆಟ್ ರನೌಟ್ ರೂಪದಲ್ಲಿ ದಕ್ಕಿತು. ಇದರೊಂದಿಗೆ ನ್ಯೂಜಿಲೆಂಡ್ ಗೆಲುವಿನ ಗುರಿ ತಲುಪಲು ಇನ್ನೂ 400 ರನ್ ಗಳಿಸಬೇಕಿದೆ.
