ಟೀಂ ಇಂಡಿಯಾಗೆ ಸುಲಭ ಜಯ ಬಿಟ್ಟುಕೊಡದ ಐರ್ಲೆಂಡ್

ಡುಬ್ಲಿನ್: ಭಾರತ ಮತ್ತು ಐರ್ಲೆಂಡ್ ನಡುವಿನ ದ್ವಿತೀಯ ಟಿ20 ಪಂದ್ಯವನ್ನು ಟೀಂ ಇಂಡಿಯಾ ರೋಚಕವಾಗಿ 4 ರನ್ ಗಳಿಂದ ಗೆಲ್ಲುವ ಮೂಲಕ ಸರಣಿ ಕ್ಲೀನ್ ಸ್ವೀಪ್ ಮಾಡಿಕೊಂಡಿದೆ.

ಈ ಪಂದ್ಯದಲ್ಲಿ ಎರಡೂ ತಂಡಗಳು 200 ಪ್ಲಸ್ ರನ್ ಗಳಿಸಿದ್ದು ಬ್ಯಾಟಿಂಗ್ ಅಬ್ಬರಕ್ಕೆ ಸಾಕ್ಷಿಯಾಗಿದೆ. ಟಾಸ್ ಗೆದ್ದು ಮೊದಲು ಬ್ಯಾಟಿಂಗ್ ಮಾಡಿದ ಭಾರತ 20 ಓವರ್ ಗಳಲ್ಲಿ 7 ವಿಕೆಟ್ ನಷ್ಟಕ್ಕೆ 225 ರನ್ ಗಳಿಸಿತು. ದೀಪಕ್ ಹೂಡಾ-ಸಂಜು ಸ್ಯಾಮ್ಸನ್ ದಾಖಲೆಯ ಜೊತೆಯಾಟವಾಡಿದರು. ಎರಡನೇ ವಿಕೆಟ್ ಗೆ 150 ಪ್ಲಸ್ ರನ್ ಪೇರಿಸುವ ಮೂಲಕ ಕೊಹ್ಲಿ-ರೋಹಿತ್ ದಾಖಲೆ ಮುರಿದರು. ದೀಪಕ್ ಹೂಡಾ ಚೊಚ್ಚಲ ಶತಕ (104) ಸಿಡಿಸಿದರೆ, ಸಂಜು ಸ್ಯಾಮ್ಸನ್ 77 ರನ್ ಚಚ್ಚಿದರು. ಆದರೆ ದಿನೇಶ್ ಕಾರ್ತಿಕ್, ಅಕ್ಸರ್ ಪಟೇಲ್, ಹರ್ಷಲ್ ಪಟೇಲ್ ಸಾಲಾಗಿ ಸೊನ್ನೆ ಸುತ್ತಿದರು.

ಈ ದೊಡ್ಡ ಮೊತ್ತವನ್ನು ಐರ್ಲೆಂಡ್ ಗೆ ಎದುರಿಸಲು ಕಷ್ಟವಾಗಬಹುದು ಎಂಬುದೇ ಎಲ್ಲರ ಲೆಕ್ಕಾಚಾರವಾಗಿತ್ತು. ಆದರೆ ಆತ್ಮವಿಶ್ವಾಸದಿಂದ ಬ್ಯಾಟಿಂಗ್ ಮಾಡಿದ ಐರ್ಲೆಂಡ್ ಗೆ ಪಾಲ್ ಸ್ಟಿರ್ಲಿಂಗ್ 40, ನಾಯಕ ಆಂಡ್ರ್ಯೂ ಬಾಲ್ಬಿರಿನ್ 60 ರನ್ ಸಿಡಿಸಿ ಉತ್ತಮ ಆರಂಭ ನೀಡಿದರು. ಕೆಳ ಕ್ರಮಾಂಕದಲ್ಲಿ ಜಾರ್ಜ್ ಡಾಕ್ರೆಲ್ 16 ಎಸೆತಗಳಲ್ಲಿ 34, ಮಾರ್ಕ್ ಅಡೈರ್ 12 ಎಸೆತಗಳಲ್ಲಿ 23  ರನ್ ಗಳಿಸಿ ಅಪಾಯಕಾರಿಯಾಗುವ ಸೂಚನೆ ನೀಡಿದರು. ಅಂತಿಮ ಓವರ್ ಎಸೆದ ಉಮ್ರಾನ್ ಮಲಿಕ ಒಂದು ನೋ ಬಾಲ್ ಸಹಿತ ಎರ್ರಾಬಿರ್ರಿ ರನ್ ಬಿಟ್ಟುಕೊಟ್ಟರು. ಆದರೆ ಕೊನೆಗೂ ಭಾರತ 4 ರನ್ ಗಳಿಂದ ರೋಚಕವಾಗಿ ಗೆಲುವು ಕಂಡಿತು. ಇದರೊಂದಿಗೆ 2 ಪಂದ್ಯಗಳ ಸರಣಿಯನ್ನು ಹಾರ್ದಿಕ್ ಪಡೆ 2-0 ಅಂತರದಿಂದ ಕ್ಲೀನ್ ಸ್ವೀಪ್ ಮಾಡಿಕೊಂಡಿತು.