ಸೂರ್ಯಕುಮಾರ್ ಯಾದವ್ ವಿಸಿಟ್ ಮಾಡಿದ ಉಡುಪಿಯ ಈ ವಿಶೇಷ ಬಂಗಲೆ ಯಾವುದು ಹೇಳಿ ನೋಡೋಣ

Photo Credit: Instagram

ಉಡುಪಿ: ಪತ್ನಿಯ ತವರು ಉಡುಪಿ-ಮಂಗಳೂರಿಗೆ ಬಂದಿರುವ ಕ್ರಿಕೆಟಿಗ ಸೂರ್ಯಕುಮಾರ್ ಯಾದವ್ ವಿಶೇಷ ಜಾಗವೊಂದಕ್ಕೆ ಭೇಟಿ ನೀಡಿದ್ದಾರೆ. ಆ ಜಾಗದ ಫೋಟೋವನ್ನೂ ಅವರು ಸೋಷಿಯಲ್ ಮೀಡಿಯಾದಲ್ಲಿ ಹಂಚಿಕೊಂಡಿದ್ದಾರೆ. ಅಷ್ಟಕ್ಕೂ ಆ ಜಾಗದ ವಿಶೇಷತೆ ಏನು ಗೊತ್ತಾ?

ಸೂರ್ಯಕುಮಾರ್ ಪತ್ನಿ ದೇವಿಶಾ ಶೆಟ್ಟಿ ಮೂಲತಃ ಕರಾವಳಿಯವರು. ತಮ್ಮ ತವರಿಗೆ ಪತಿಯನ್ನು ಕರೆದುಕೊಂಡು ದೇವಿಶಾ ಬಂದಿದ್ದಾರೆ. ಜೊತೆಗೆ ಉಡುಪಿಯ ಮಾರಿಗುಡಿ ಕಾಪಿಗೆ ಭೇಟಿ ನೀಡಿ ಪೂಜೆ ಸಲ್ಲಿಸಿದ್ದರು. ವಿವಾಹ ವಾರ್ಷಿಕೋತ್ಸವದ ಸಂದರ್ಭದಲ್ಲೇ ಸೂರ್ಯಕುಮಾರ್ ದಂಪತಿ ಕರಾವಳಿಗೆ ಭೇಟಿ ನೀಡಿದ್ದು ವಿಶೇಷ.

ಸದ್ಯಕ್ಕೆ ಕ್ರಿಕೆಟ್ ನಿಂದ ಬಿಡುವು ಪಡೆದಿರುವ ಸೂರ್ಯಕುಮಾರ್ ಯಾದವ್ ಕರಾವಳಿಯ ಸುಂದರ ಪರಿಸರದಲ್ಲಿ ಅಡ್ಡಾಡುತ್ತಿದ್ದಾರೆ. ಅದರಲ್ಲೂ ಅವರ ಸೋಷಿಯಲ್ ಮೀಡಿಯಾದಲ್ಲಿ ಉಡುಪಿಯ ವಿಶೇಷ ಹೆರಿಟೇಜ್ ಬಂಗಲೆಯೊಂದನ್ನು ಹಂಚಿಕೊಂಡಿದ್ದಾರೆ. ಈ ಬಂಗಲೆಯನ್ನು ನಿಮಗೂ ಎಲ್ಲೋ ನೋಡಿದಂತಾಗಬಹುದು.

ಇದು ಉಡುಪಿಯ ಮುಳೂರಿನಲ್ಲಿರುವ ಸಾಯಿ ರಾಧಾ ಹೆರಿಟೇಜ್ ಬಂಗಲೆಯಾಗಿದೆ. ಈ ಬಂಗಲೆಯಲ್ಲೇ ಕಾಂತಾರ ಸಿನಿಮಾದ ಆರಂಭದಲ್ಲಿ ಬರುವ ಅರಮನೆ ಭಾಗದ ಚಿತ್ರೀಕರಣವಾಗಿತ್ತು. ಇದನ್ನು ಸೂರ್ಯ ಕೂಡಾ ಗುರುತಿಸಿದ್ದಾರೆ. ಇದನ್ನು ನೆನಪಿಸಿಕೊಂಡು ಫೋಟೋ ಹಂಚಿಕೊಂಡಿರುವ ಸೂರ್ಯ ಇದು ಕಾಂತಾರ ಮನೆ ಎಂದು ಸ್ಟೇಟಸ್ ಬರೆದುಕೊಂಡಿದ್ದಾರೆ.