ಅಂದು ಯಶಸ್ವಿ ಜೈಸ್ವಾಲ್ ಗೆ ಮಾಡಿದ್ದನ್ನೇ ಜಸ್ಪ್ರೀತ್ ಬುಮ್ರಾಗೆ ಮಾಡುತ್ತಿದ್ದಾರೆ ರೋಹಿತ್ ಶರ್ಮಾ

ನ್ಯೂಯಾರ್ಕ್: ಟಿ20 ವಿಶ್ವಕಪ್ ನ ಆರಂಭಿಕ ಎರಡು ಪಂದ್ಯಗಳಲ್ಲಿ ಭಾರತ ಜಯಭೇರಿ ಭಾರಿಸಲು ಕಾರಣವಾಗಿದ್ದು ವೇಗಿ ಜಸ್ಪ್ರೀತ್ ಬುಮ್ರಾ. ಎರಡೂ ಪಂದ್ಯಗಳಲ್ಲೂ ಅದ್ಭುತ ಬೌಲಿಂಗ್ ಮಾಡಿ ಅವರು ಪಂದ್ಯ ಶ್ರೇಷ್ಠ ಪ್ರಶಸ್ತಿ ಪಡೆದಿದ್ದಾರೆ.

ಆದರೆ ಪಂದ್ಯದ ಬಳಿಕ ಮಾತನಾಡಿದ ನಾಯಕ ರೋಹಿತ್ ಶರ್ಮಾ ಬುಮ್ರಾ ಅದ್ಭುತವಾಗಿ ಬೌಲಿಂಗ್ ಮಾಡಿದರು ಎಂದಷ್ಟೇ ಹೇಳಿದರು. ಉಳಿದಂತೆ ಬುಮ್ರಾ ಬಗ್ಗೆ ಹೆಚ್ಚು ಮಾತನಾಡಲು ಇಷ್ಟಪಡಲ್ಲ ಎಂದಿದ್ದಾರೆ. ಆ ಮೂಲಕ ಈ ಹಿಂದೆ ಇಂಗ್ಲೆಂಡ್ ವಿರುದ್ಧದ ಟೆಸ್ಟ್ ಸರಣಿ ವೇಳೆ ಯಶಸ್ವಿ ಜೈಸ್ವಾಲ್ ಗೆ ಮಾಡಿದ್ದನ್ನೇ ಈಗ ಬುಮ್ರಾಗೂ ಮಾಡುತ್ತಿದ್ದಾರೆ.

ಇಂಗ್ಲೆಂಡ್ ವಿರುದ್ಧ ಟೆಸ್ಟ್ ಸರಣಿ ವೇಳೆ ಯಶಸ್ವಿ ಜೈಸ್ವಾಲ್ ಸತತ ದ್ವಿಶತಕ ಸಿಡಿಸಿ ಅದ್ಭುತ ಫಾರ್ಮ್ ನಲ್ಲಿದ್ದರು. ಆದರೆ ರೋಹಿತ್ ಅವರನ್ನು ಒಮ್ಮೆಯೂ ಮನಸ್ಪೂರ್ತಿಯಾಗಿ ಹೊಗಳಲಿಲ್ಲ. ಇದಕ್ಕೆ ಕಾರಣವನ್ನು ಕೇಳಿದಾಗ ಈಗಲೇ ಹೊಗಳಿದರೆ ಅವರಿಗೆ ಯಶಸ್ಸು ತಲೆಗೆ ಹತ್ತಬಹುದು. ಇದರಿಂದ ಅವರ ಪ್ರದರ್ಶನದ ಮೇಲೆ ಪರಿಣಾಮ ಬೀರಬಹುದು. ಹೀಗಾಗಿ ಅವರು ಇದೇ ಆಟ ಮುಂದುವರಿಸಲಿ ಎಂದಿದ್ದರು. ಕೊನೆಗೆ ಸರಣಿ ಮುಕ್ತಾಯದ ಬಳಿಕ ಜೈಸ್ವಾಲ್ ರನ್ನು ಕೊಂಡಾಡಿದ್ದರು.

ಇದೀಗ ಬುಮ್ರಾ ಜೊತೆಗೂ ರೋಹಿತ್ ಅದೇ ರೀತಿ ನಡೆಸುಕೊಂಡಿದ್ದಾರೆ. ಬುಬ್ರಾ ಬಗ್ಗೆ ನಾನು ಈಗಲೇ ಹೆಚ್ಚೇನೂ ಹೇಳಲ್ಲ. ಅವರು ಅದ್ಭುತ ಬೌಲರ್. ಆದರೆ ಅವರು ಇದೇ ಲಹರಿಯಲ್ಲಿ ಕೊನೆಯವರೆಗೂ ಇರಲಿ. ಹೀಗಾಗಿ ಈಗಲೇ ಏನೂ ಮಾತನಾಡಲ್ಲ ಎಂದಿದ್ದಾರೆ.