ಟೀಂ ಇಂಡಿಯಾ ಸೋಲಿಸುತ್ತೇವೆ ಎನ್ನುತ್ತಿರುವ ಬಾಂಗ್ಲಾದೇಶಿಯರಿಗೆ ಗುನ್ನ ಕೊಟ್ಟ ರೋಹಿತ್ ಶರ್ಮಾ

ಚೆನ್ನೈ: ಪಾಕಿಸ್ತಾನವನ್ನು ಸೋಲಿಸಿದ ಹುಮ್ಮಸ್ಸಿನಲ್ಲಿ ಭಾರತವನ್ನೂ ಸೋಲಿಸುತ್ತೇವೆ ಎಂದು ಕನಸು ಕಾಣುತ್ತಿರುವ ಬಾಂಗ್ಲಾದೇಶ ಕ್ರಿಕೆಟ್ ತಂಡಕ್ಕೆ ರೋಹಿತ್ ಶರ್ಮಾ ತಮ್ಮದೇ ಶೈಲಿಯಲ್ಲಿ ಗುನ್ನ ಕೊಟ್ಟಿದ್ದಾರೆ.

ಬಾಂಗ್ಲಾದೇಶ ವಿರುದ್ಧ ಟೆಸ್ಟ್ ಸರಣಿಗೆ ಮುನ್ನ ರೋಹಿತ್ ಇಂದು ಮಾಧ್ಯಮಗೋಷ್ಠಿಯಲ್ಲಿ ಮಾತನಾಡಿದರು. ರೋಹಿತ್ ಮಾಧ್ಯಮಗೋಷ್ಠಿ ಎಂದರೆ ಅಲ್ಲಿ ತಮಾಷೆ, ನಗು ಇದ್ದೇ ಇರುತ್ತದೆ. ಅದೇ ರೀತಿ ಇಂದೂ ರೋಹಿತ್ ಎದುರಾಳಿಗಳಿಗೆ ತಮ್ಮದೇ ಶೈಲಿಯಲ್ಲಿ ಗುದ್ದು ಕೊಟ್ಟಿದ್ದಾರೆ.

ಪಾಕಿಸ್ತಾನ ವಿರುದ್ಧ ಇತ್ತೀಚೆಗೆ ಟೆಸ್ಟ್ ಸರಣಿ ಗೆದ್ದಿರುವ ಸಂಭ್ರಮದಲ್ಲಿರುವ ಬಾಂಗ್ಲಾ ಕ್ರಿಕೆಟಿಗರು ಈಗ ಭಾರತದ ವಿರುದ್ಧ ಟೆಸ್ಟ್ ಸರಣಿ ಆಡಲು ಬಂದಿದ್ದಾರೆ. ಭಾರತವನ್ನು ಬಾಂಗ್ಲಾದೇಶ ಇದುವರೆಗೆ ಟೆಸ್ಟ್ ಪಂದ್ಯದಲ್ಲಿ ಸೋಲಿಸಿಲ್ಲ. ಆದರೆ ಈ ಬಾರಿ ಸೋಲಿಸಲು ನಮಗೆ ಉತ್ತಮ ಅವಕಾಶವಿದೆ ಎಂದು ಬಾಂಗ್ಲಾ ಕ್ರಿಕೆಟಿಗರು ಮಾಧ್ಯಮಗಳಿಗೆ ಹೇಳಿಕೆ ನೀಡುತ್ತಿದ್ದಾರೆ.

ಇದರ ಬಗ್ಗೆ ಇಂದು ರೋಹಿತ್ ಗೆ ಪ್ರಶ್ನಿಸಿದಾಗ ನಕ್ಕ ಅವರು ‘ಅರೇ.. ಅವರೂ ಸ್ವಲ್ಪ ಮಜಾ ಮಾಡಲಿ ಬಿಡಿ ಗೆಳೆಯ’ ಎಂದು ಕಾಲೆಳೆದಿದ್ದಾರೆ. ಎಲ್ಲಾ ತಂಡಗಳೂ ಭಾರತವನ್ನು ಸೋಲಿಸಲು ಬಯಸುತ್ತವೆ. ಅದೇ ರೀತಿ ಬಾಂಗ್ಲಾ ತಂಡವೂ ಸ್ವಲ್ಪ ಮಜಾ ಅನುಭವಿಸಲಿ. ಇದಕ್ಕೆ ಮೊದಲು ಇಂಗ್ಲೆಂಡ್ ಬಂದಾಗ ಅವರೂ ಮಾಧ್ಯಮಗಳ ಮುಂದೆ ಸಾಕಷ್ಟು ಕೊಚ್ಚಿಕೊಂಡರು. ಆದರೆ ಅವರು ತಮ್ಮ ಆಟದ ಬಗ್ಗೆ ಗಮನ ಕೊಡಲು ಮರೆತರು. ಆದರೆ ನಾವು ವಿರೋಧಿ ತಂಡದ ವಿರುದ್ಧ ಆಲೋಚನೆ ಮಾಡದೇ ನಮ್ಮ ಆಟದ ಸುಧಾರಣೆ ಬಗ್ಗೆ ಮಾತ್ರ ಗಮನ ಕೇಂದ್ರೀಕರಿಸುತ್ತೇವೆ’ ಎಂದಿದ್ದಾರೆ.