ಮುಂಬೈ: ಮುಂಬೈ ಇಂಡಿಯನ್ಸ್ ತಂಡದ ನೂತನ ನಾಯಕ ಹಾರ್ದಿಕ್ ಪಾಂಡ್ಯ ಮಾನಸಿಕ ಆರೋಗ್ಯ ಸಮಸ್ಯೆಯಿಂದ ಬಳಲುತ್ತಿದ್ದಾರೆ ಎಂದು ಕರ್ನಾಟಕ ಮೂಲದ ಮಾಜಿ ಕ್ರಿಕೆಟಿಗ ರಾಬಿನ್ ಉತ್ತಪ್ಪ ಅಚ್ಚರಿಯ ಹೇಳಿಕೆ ನೀಡಿದ್ದಾರೆ.
ಸಂದರ್ಶನವೊಂದರಲ್ಲಿ ರಾಬಿನ್ ಉತ್ತಪ್ಪ ಹಾರ್ದಿಕ್ ಪಾಂಡ್ಯ ಖಂಡಿತವಾಗಿಯೂ ಮಾನಸಿಕ ಸಮಸ್ಯೆಯಿಂದ ಬಳಲುತ್ತಿದ್ದಾರೆ ಎಂದಿದ್ದಾರೆ. ಇದು ಎಲ್ಲರ ಅಚ್ಚರಿಗೆ ಕಾರಣವಾಗಿದೆ. ಮುಂಬೈ ತಂಡದ ನಾಯಕನಾದ ಮೇಲೆ ಹಾರ್ದಿಕ್ ಸತತವಾಗಿ ಟೀಕೆ ಎದುರಿಸುತ್ತಲೇ ಇದ್ದಾರೆ. ಅವರು ಎಲ್ಲೇ ಹೋದರೂ ಅಭಿಮಾನಿಗಳು ಅವರನ್ನು ಮೂದಲಿಸುತ್ತಿದ್ದಾರೆ.
ಲೇವಡಿಗಳಿಗೆ ಹಾರ್ದಿಕ್ ಮೇಲ್ನೋಟಕ್ಕೆ ಕಿವಿಗೊಡುತ್ತಿಲ್ಲ ಎನಿಸಿದರೂ ಇದು ಅವರನ್ನು ಕಾಡುತ್ತಿದೆ. ಸತತವಾಗಿ ತಮ್ಮನ್ನು ಟೀಕೆ ಮಾಡುತ್ತಿರುವುದರಿಂದ ಅವರು ಮಾನಸಿಕವಾಗಿ ಕುಗ್ಗಿ ಹೋಗಿದ್ದಾರೆ. ಅಭಿಮಾನಿಗಳ ಮನಸ್ಸು ನಮಗೂ ಅರ್ಥವಾಗುತ್ತದೆ. ಆದರೆಯಾವುದೇ ಆಟಗಾರನನ್ನೂ ಈ ಮಟ್ಟಿಗೆ ಲೇವಡಿ ಮಾಡಬಾರದು. ಇದರಿಂದ ಖಂಡಿತವಾಗಿಯೂ ಹಾರ್ದಿಕ್ ಮಾನಸಿಕ ಸಮಸ್ಯೆಯಿಂದ ಬಳಲುತ್ತಿದ್ದಾರೆ ಎಂದು ರಾಬಿನ್ ಉತ್ತಪ್ಪ ಸಂದರ್ಶನದಲ್ಲಿ ಹೇಳಿದ್ದಾರೆ.
ಅವರ ಈ ಹೇಳಿಕೆ ಈಗ ಸಂಚಲನ ಮೂಡಿಸಿದೆ. ಯಾವ ಅಭಿಮಾನಿಗಳೂ ಈ ರೀತಿ ಅಸಭ್ಯವಾಗಿ ವರ್ತಿಸಬಾರದು. ಆಟಗಾರರನ್ನು ನೋಡಿ ನಗಬಾರದು.ಇದು ಹಾರ್ದಿಕ್ ಮೇಲೆ ಪರಿಣಾಮ ಬೀರುತ್ತಿದೆ ಎಂದು ರಾಬಿನ್ ಉತ್ತಪ್ಪ ಹೇಳಿದ್ದಾರೆ.
