ಮುಂಬೈ: ಟೀಂ ಇಂಡಿಯಾ ಮುಖ್ಯ ಕೋಚ್ ಹುದ್ದೆಯಿಂದ ನಿರ್ಗಮಿಸಿರುವ ರಾಹುಲ್ ದ್ರಾವಿಡ್ ಮುಂದಿನ ದಿನಗಳಲ್ಲಿ ಐಪಿಎಲ್ ನಲ್ಲಿ ಈ ತಂಡದ ಪರ ಕೋಚ್ ಆಗಲಿದ್ದಾರೆ.
ಟೀಂ ಇಂಡಿಯಾ ಕೋಚ್ ಹುದ್ದೆಯಿಂದ ನಿವೃತ್ತಿಯಾದ ಬಳಿಕ ಆರ್ ಸಿಬಿ ಅಭಿಮಾನಿಗಳು ಇನ್ನಾದರೂ ನಮ್ಮ ತಂಡಕ್ಕೆ ಕೋಚ್ ಆಗಿ ಬನ್ನಿ ಎಂದು ಆಗ್ರಹಿಸಿದ್ದರು. ಆದರೆ ಆರ್ ಸಿಬಿ ಅಭಿಮಾನಗಳಿಗೆ ಅದೃಷ್ಟವಿಲ್ಲ ಬಿಡಿ. ದ್ರಾವಿಡ್ ಬೆಂಗಳೂರು ಬಿಟ್ಟು ರಾಜಸ್ಥಾನಕ್ಕೆ ಹಾರುವುದು ಬಹುತೇಕ ನಿಶ್ಚಿತವಾಗಿದೆ.
ಹೌದು, ಮುಂದಿನ ಆವೃತ್ತಿಯ ಐಪಿಎಲ್ ನಲ್ಲಿ ದ್ರಾವಿಡ್ ರಾಜಸ್ಥಾನ್ ರಾಯಲ್ಸ್ ತಂಡಕ್ಕೆ ಮುಖ್ಯ ಕೋಚ್ ಆಗಲಿದ್ದಾರೆ. ಅವರ ಆಯ್ಕೆ ಈಗ ಬಹುತೇಕ ಖಚಿತವಾಗಿದೆ. ಘೋಷಣೆಯೊಂದೇ ಬಾಕಿ ಎನ್ನಬಹುದು. ದ್ರಾವಿಡ್ ಈಗಾಗಲೇ ರಾಜಸ್ಥಾನ್ ಜೊತೆಗೆ ಒಪ್ಪಂದಕ್ಕೆ ಸಹಿ ಹಾಕಿದ್ದು ಮುಂಬರುವ ಹರಾಜಿಗೆ ಮುನ್ನ ಯಾವ ಆಟಗಾರರನ್ನು ರಿಲೀಸ್ ಮಾಡಬೇಕು, ಯಾರನ್ನು ಉಳಿಸಿಕೊಳ್ಳಬೇಕು ಎಂದು ಚರ್ಚೆಯನ್ನೂ ನಡೆಸಿದ್ದಾರಂತೆ.
ಅಷ್ಟಕ್ಕೂ ರಾಹುಲ್ ದ್ರಾವಿಡ್ ಗೆ ರಾಜಸ್ಥಾನ್ ತಂಡ ಹೊಸದೇನಲ್ಲ. ಈಗಾಗಲೇ ಈ ತಂಡದ ಪರ ನಾಯಕನಾಗಿ ಕೋಚ್ ಆಗಿ ದ್ರಾವಿಡ್ ಕಾರ್ಯನಿರ್ವಹಿಸಿದ್ದಾರೆ. ಬಳಿಕ ಅಂಡರ್ 19 ತಂಡದ ಕೋಚ್ ಆಗಲು ಐಪಿಎಲ್ ಗೆ ಗುಡ್ ಬೈ ಹೇಳಿದ್ದರು. ಇದೀಗ ಟೀಂ ಇಂಡಿಯಾದಿಂದ ನಿವೃತ್ತಿಯಾದ ಬೆನ್ನಲ್ಲೇ ಮತ್ತೆ ರಾಜಸ್ಥಾನ್ ತಂಡವನ್ನು ಕೂಡಿಕೊಳ್ಳಲಿದ್ದಾರೆ.
