ಸೆಂಚೂರಿಯನ್: ಭಾರತ ಮತ್ತು ದ.ಆಫ್ರಿಕಾ ನಡುವೆ ಇಂದು ದ್ವಿತೀಯ ಟಿ20 ಪಂದ್ಯ ನಡೆಯಲಿದ್ದು, ಮತ್ತೊಂದು ಗೆಲುವಿನೊಂದಿಗೆ ಸರಣಿ ತನ್ನದಾಗಿಸಿಕೊಳ್ಳಲು ಕೊಹ್ಲಿ ಬಳಗ ಸಜ್ಜಾಗಿದೆ.
ಸೆಂಚೂರಿಯನ್ ನಲ್ಲಿ ಈಗಾಗಲೇ ಅಂತಿಮ ಏಕದಿನ ಆಡಿ ಗೆದ್ದಿರುವ ಭಾರತ ಮತ್ತೊಂದು ಗೆಲುವು ದಾಖಲಿಸಲು ತುದಿಗಾಲಲ್ಲಿ ನಿಂತಿದೆ. ಅದ್ಭುತ ಫಾರ್ಮ್ ನಲ್ಲಿರುವ ನಾಯಕ ವಿರಾಟ್ ಕೊಹ್ಲಿ ಮತ್ತೊಂದು ದಾಖಲೆಯ ನಿರೀಕ್ಷೆಯಲ್ಲಿದ್ದಾರೆ.
ಟಿ20 ಮಾದರಿ ಕ್ರಿಕೆಟ್ ನಲ್ಲಿ 2000 ರನ್ ಪೂರೈಸಲು ಅವರಿಗೆ ಇನ್ನು 18 ರನ್ ಗಳ ಅಗತ್ಯವಿದೆ. ಅದು ಇದೇ ಪಂದ್ಯದಲ್ಲಿ ಪೂರೈಸಿಯಾರು ಎಂಬ ನಿರೀಕ್ಷೆ ಅಭಿಮಾನಿಗಳಲ್ಲಿದೆ.
ಭಾರತ ತಂಡದ ಬಗ್ಗೆ ಹೇಳಬೇಕಾದರೆ ಮಧ್ಯಮ ಕ್ರಮಾಂಕ ಇನ್ನೂ ಕ್ಲಿಕ್ ಆಗಿಲ್ಲ. ಬಹಳ ದಿನಗಳ ನಂತರ ತಂಡಕ್ಕೆ ಬಂದ ಸುರೇಶ್ ರೈನಾ ಹೆಚ್ಚೇನೂ ಕಡೆದು ಕಟ್ಟೆ ಹಾಕಿಲ್ಲ. ಹಾರ್ದಿಕ್ ಪಾಂಡ್ಯ ತಮ್ಮ ಎಂದಿನ ಮೊನಚು ಕಳೆದುಕೊಂಡಿದ್ದಾರೆ. ಇದ್ದವರಲ್ಲಿ ಕನ್ನಡಿಗ ಮನೀಶ್ ಪಾಂಡೆ ಪರವಾಗಿಲ್ಲ. ಧೋನಿಗೆ ಇನ್ನೂ ಅಂತಹ ಅವಕಾಶ ಸಿಕ್ಕಿಲ್ಲ.
ಬೌಲಿಂಗ್ ವಿಭಾಗವನ್ನು ಹೇಳುವಂತೆಯೇ ಇಲ್ಲ. ಟೀಂ ಇಂಡಿಯಾಗೆ ಸ್ಪಿನ್ನರ್ ಗಳೇ ಆಸ್ತಿ ಎಂದಾದರೂ ಕಳೆದ ಪಂದ್ಯದಲ್ಲಿ ವೇಗಿಗಳಾದ ಭುವನೇಶ್ವರ್ ಕುಮಾರ್, ಬುಮ್ರಾ ಕೊಂಚ ಹಿಡಿತದಲ್ಲಿ ರನ್ ಬಿಟ್ಟುಕೊಟ್ಟವರು. ಉಳಿದಂತೆ ಎಲ್ಲಾ ಬೌಲರ್ ಗಳೂ ಧಾರಾಳಿಯಾಗಿದ್ದರು.
ಹಾಗಿದ್ದರೂ ಇದು ಟಿ20 ಮಾದರಿ. ಇಲ್ಲಿ ಬೌಲರ್ ಗಳಿಗೆ ಚಚ್ಚಿಸಿಕೊಳ್ಳವುದೇ ಕೆಲಸ. ಹಾಗಿದ್ದರೂ ಇಂದಿನ ಪಂದ್ಯ ರಾತ್ರಿ ನಡೆಯುವುದಾದ ಕಾರಣ ಕಳೆದ ಪಂದ್ಯದ ಪರಿಸ್ಥಿತಿಯೇ ಇರಲಾರದು. ಅದೇನೇ ಇದ್ದರೂ ಸದ್ಯದ ಮಟ್ಟಿಗೆ ಭಾರತವೇ ಫೇವರಿಟ್.
ತಾಜಾ ಸುದ್ದಿಗಳನ್ನು ಓದಲು ವೆಬ್‌ದುನಿಯಾ ಮೊಬೈಲ್ ಆ್ಯಪ್ ಡೌನ್‍ ಲೋಡ್ ಮಾಡಿಕೊಳ್ಳಿ