Publish Date: Wed, 01 Jul 2026 (10:51 IST)
Updated Date: Wed, 01 Jul 2026 (10:55 IST)
ಮುಂಬೈ: ಸೆಲೆಬ್ರಿಟಿಗಳು ಎಲ್ಲೇ ಹೋದರೂ ಅಭಿಮಾನಿಗಳು ಅವರೊಂದಿಗೆ ಸೆಲ್ಫಿ ಅಥವಾ ಫೋಟೋ ಕ್ಲಿಕ್ಕಿಸಿಕೊಳ್ಳಲು ಮುಗಿಬೀಳುವುದು ಸಾಮಾನ್ಯ. ಆದರೆ ಕೆಲವೊಮ್ಮೆ ಈ ಅಭಿಮಾನದ ಗಡಿ ಮೀರಿ ಸೆಲೆಬ್ರಿಟಿಗಳ ವೈಯಕ್ತಿಕ ಸ್ವಾತಂತ್ರ್ಯ ಹಾಗೂ ಖಾಸಗಿ ಸಮಯಕ್ಕೆ ಧಕ್ಕೆ ತರುವ ಘಟನೆಗಳು ನಡೆಯುತ್ತಲೇ ಇರುತ್ತವೆ. ಇಂತಹದ್ದೇ ಒಂದು ಕಹಿ ಅನುಭವ ಈಗ ಟೀಮ್ ಇಂಡಿಯಾದ ಬ್ಯಾಟರ್ ಕೆ.ಎಲ್. ರಾಹುಲ್ ಮತ್ತು ಅಥಿಯಾ ಶೆಟ್ಟಿ ದಂಪತಿಗೆ ಎದುರಾಗಿದೆ.
ಕೆ.ಎಲ್. ರಾಹುಲ್ ತಮ್ಮ ಬಿಡುವಿನ ದಿನಗಳಲ್ಲಿ ಪತ್ನಿ ಅಥಿಯಾ ಶೆಟ್ಟಿ ಜೊತೆ ರೆಸ್ಟೋರೆಂಟ್‌ ಒಂದಕ್ಕೆ ರಾತ್ರಿಯ ಭೋಜನಕ್ಕೆ (Dinner) ತೆರಳಿದ್ದರು. ಊಟ ಮುಗಿಸಿ ದಂಪತಿಗಳು ಹೊರಬಂದು ರಸ್ತೆಯಲ್ಲಿ ಪ್ರಶಾಂತವಾಗಿ ವಾಕಿಂಗ್ ಮಾಡಲು ಮುಂದಾದಾಗ, ಅಲ್ಲಿ ನೆರೆದಿದ್ದ ಕೆಲವು ಜನರು ಇವರನ್ನು ಗುರುತಿಸಿದ್ದಾರೆ.
ತಕ್ಷಣವೇ ರಾಹುಲ್ ಮತ್ತು ಅಥಿಯಾ ಅವರನ್ನು ಸುತ್ತುವರಿದ ಜನರು, ಫೋಟೋ ಮತ್ತು ಸೆಲ್ಫಿ ನೀಡುವಂತೆ ಒತ್ತಾಯಿಸಲು ಆರಂಭಿಸಿದ್ದಾರೆ. ಆರಂಭದಲ್ಲಿ ರಾಹುಲ್ ನಯವಾಗಿಯೇ ನಿರಾಕರಿಸಿದರೂ, ಬಂದಿದ್ದ ಜನರು ಮಾತ್ರ ದಂಪತಿಗಳಿಗೆ ದಾರಿ ಬಿಡದೆ, ಹಠ ಹಿಡಿದು ಫೋಟೋಗಾಗಿ ಪೀಡಿಸಲು ಶುರುಮಾಡಿದ್ದಾರೆ.
ಅಭಿಮಾನಿಗಳ ಈ ನೂಕುನುಗ್ಗಲು ಮತ್ತು ಅತಿರೇಕದ ವರ್ತನೆಯಿಂದ ಕೆ.ಎಲ್. ರಾಹುಲ್ ತೀವ್ರ ಅಸಮಾಧಾನ ಹಾಗೂ ಮುಜುಗರಕ್ಕೊಳಗಾಗಿರುವುದು ಅವರ ಮುಖದಲ್ಲೇ ಎದ್ದು ಕಾಣುತ್ತಿತ್ತು. ಪತ್ನಿ ಅಥಿಯಾ ಶೆಟ್ಟಿ ಅವರ ಕೈ ಹಿಡಿದು ಅಲ್ಲಿಂದ ಬೇಗನೆ ಹೊರಡಲು ಯತ್ನಿಸಿದರೂ, ಜನರು ಅವರನ್ನು ಸುಲಭವಾಗಿ ಹೋಗಲು ಬಿಡದೆ ಹಿಂಬಾಲಿಸಿದ್ದಾರೆ. ಕೊನೆಗೆ ಭದ್ರತಾ ಸಿಬ್ಬಂದಿ ಹಾಗೂ ಅವರ ಕಾರಿನ ಚಾಲಕನ ಸಹಾಯದಿಂದ ದಂಪತಿಗಳು ಅಲ್ಲಿಂದ ಜಾಗ ಖಾಲಿ ಮಾಡಿದ್ದಾರೆ.
About Writer
ಕೃಷ್ಣವೇಣಿ ಕೆ
Completed bachelor degree in Journalism and communication in SDMC Ujire. 15 years of experience as journalist. Worked as sub editor and reporter. Specialties in sports, politics and entertainment.....
ಮತ್ತಷ್ಟು ಓದಿ
