ಜೈಪುರ: ರಾಜಸ್ಥಾನ್ ರಾಯಲ್ಸ್ ವಿರುದ್ಧದ ಐಪಿಎಲ್ ಪಂದ್ಯದಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ತಂಡ 12 ರನ್ ಗಳ ಸೋಲು ಅನುಭವಿಸಿದೆ. ಈ ಸೋಲು ನಾಯಕ ರಿಷಬ್ ಪಂತ್ ಗೆ ತೀವ್ರ ಹತಾಶೆ ಉಂಟು ಮಾಡಿದೆ.
ನಿನ್ನೆಯ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ಮಾಡಿದ ರಾಜಸ್ಥಾನ್ 20 ಓವರ್ ಗಳಲ್ಲಿ 5 ವಿಕೆಟ್ ನಷ್ಟಕ್ಕೆ 185 ರನ್ ಗಳಿಸಿತು. ಈ ಮೊತ್ತ ಬೆನ್ನತ್ತಿದ ಡೆಲ್ಲಿ ಕ್ಯಾಪಿಟಲ್ಸ್ 173 ರನ್ ಗಳಿಸಲಷ್ಟೇ ಶಕ್ತವಾಯಿತು. ಇದರೊಂದಿಗೆ 12 ರನ್ ಗಳ ಸೋಲು ಅನುಭವಿಸಿತು.
ಈ ಪಂದ್ಯದಲ್ಲಿ ಡೆಲ್ಲಿ ನಾಯಕ ರಿಷಬ್ ಪಂತ್ 26 ಎಸೆತಗಳಿಂದ 28 ರನ್ ಗಳಿಸಿದ್ದರು. ತಂಡದ ಚೇಸಿಂಗ್ ನಲ್ಲಿ ಅವರು ಕೊನೆಯವರೆಗೂ ಇದ್ದಿದ್ದರೆ ಬಹುಶಃ ಡೆಲ್ಲಿ ಗೆಲ್ಲುತ್ತಿತ್ತೇನೋ. ಬಹಳ ಸಮಯದ ನಂತರ ಕ್ರಿಕೆಟ್ ಗೆ ಮರಳಿದ ರಿಷಬ್ ಕಳೆದ ಎರಡೂ ಪಂದ್ಯಗಳಲ್ಲಿ ದೊಡ್ಡ ಮೊತ್ತ ಗಳಿಸಲು ವಿಫಲರಾಗಿದ್ದಾರೆ.
ನಿನ್ನೆಯ ಪಂದ್ಯದಲ್ಲಿ ಔಟಾದ ಬಳಿಕ ನಿರಾಸೆಯಿಂದಲೇ ಪೆವಿಲಿಯನ್ ಗೆ ತೆರಳಿದ ರಿಷಬ್ ತಮ್ಮ ಸಿಟ್ಟು ಹೊರಹಾಕಿದ್ದಾರೆ. ಪೆವಿಲಿಯನ್ ಗೆ ಹೋಗುವ ಹಾದಿಯಲ್ಲಿ ಗೋಡೆಗೆ ಬ್ಯಾಟ್ ನಿಂದ ಗುದ್ದಿದ್ದಾರೆ. ಇದಕ್ಕೆ ಮೊದಲು ಮೊದಲ ಪಂದ್ಯದಲ್ಲೂ ಔಟಾದ ಬಳಿಕ ಬೇಸರಗೊಂಡ ರಿಷಬ್ ಗೆ ಕೊನೆಗೆ ಕೋಚ್ ರಿಕಿ ಪಾಂಟಿಂಗ್ ಸಮಾಧಾನ ಮಾಡಬೇಕಾಗಿ ಬಂದಿತ್ತು.