ಐಸಿಸಿ ಟೆಸ್ಟ್ ಚಾಂಪಿಯನ್ ಶಿಪ್ ಫೈನಲ್ ಗೆ ಮೈದಾನ ಫಿಕ್ಸ್

ದುಬೈ: ಐಸಿಸಿ ಟೆಸ್ಟ್ ಚಾಂಪಿಯನ್ ಶಿಪ್ ಫೈನಲ್ ಪಂದ್ಯ ನಡೆಯುವ ಮೈದಾನವನ್ನು ಕೊನೆಗೂ ಐಸಿಸಿ ಅಂತಿಮಗೊಳಿಸಿದೆ. ಸೌಥಾಂಪ್ಟನ್ ನಲ್ಲಿ ಅಂತಿಮ ಪಂದ್ಯ ನಡೆಯಲಿರುವುದಾಗಿ ಘೋಷಿಸಿದೆ.

ಜುಲೈನಲ್ಲಿ ನಡೆಯಲಿರುವ ಚೊಚ್ಚಲ ಟೆಸ್ಟ್ ಚಾಂಪಿಯನ್ ಶಿಪ್ ನಲ್ಲಿ ಭಾರತ ಮತ್ತು ನ್ಯೂಜಿಲೆಂಡ್ ತಂಡಗಳು ಮುಖಾಮುಖಿಯಾಗಲಿವೆ. ಇಲ್ಲಿ ಕೊರೋನಾ ಬಳಿಕ ಮೊದಲ ಬಾರಿಗೆ ಜೈವ ಸುರಕ್ಷಾ ವಲಯದಲ್ಲಿ ಕ್ರಿಕೆಟ್ ಪಂದ್ಯ ನಡೆದಿತ್ತು. ಹೀಗಾಗಿ ಇದುವೇ ಸುರಕ್ಷಿತ ತಾಣ ಎಂಬ ನಿರ್ಧಾರಕ್ಕೆ ಐಸಿಸಿ ಮತ್ತು ಇಂಗ್ಲೆಂಡ್ ಕ್ರಿಕೆಟ್ ಮಂಡಳಿ ತೀರ್ಮಾನಕ್ಕೆ ಬಂದಿದೆ.

ಈ ಮೊದಲು ಕ್ರಿಕೆಟ್ ಕಾಶಿ ಲಾರ್ಡ್ಸ್ ಮೈದಾನದಲ್ಲಿ ಫೈನಲ್ ಪಂದ್ಯ ನಡೆಯಲಿದೆ ಎಂದು ತೀರ್ಮಾನವಾಗಿತ್ತು. ಆದರೆ ಕೊರೋನಾ ಭೀತಿಯಿಂದಾಗಿ ಮೊನ್ನೆಯಷ್ಟೇ ಐಸಿಸಿ ಪಂದ್ಯವನ್ನು ಲಾರ್ಡ್ಸ್ ನಿಂದ ಸ್ಥಳಾಂತರಿಸಲು ತೀರ್ಮಾನಿಸಿತ್ತು. ಇದೀಗ ಸೌಥಾಂಪ್ಟನ್ ನಲ್ಲಿ ಪಂದ್ಯ ನಡೆಯುವುದು ಪಕ್ಕಾ ಆಗಿದೆ.

ಸೌಥಾಂಪ್ಟನ್ ಮೈದಾನದಿಂದ ಕ್ರಿಕೆಟಿಗರು ಉಳಿದುಕೊಳ್ಳಲಿರುವ ಹೋಟೆಲ್ ರೂಂಗೂ ಹೆಚ್ಚು ದೂರವಿಲ್ಲ. ಇದು ಕ್ರಿಕೆಟಿಗರಿಗೆ ಅನುಕೂಲಕವಾಗಲಿದೆ ಎಂಬ ಕಾರಣಕ್ಕೆ ಇಲ್ಲಿ ಪಂದ್ಯ ಆಯೋಜಿಸಲಾಗುತ್ತಿದೆ.