ಗುವಾಹಟಿ: ಟೀಂ ಇಂಡಿಯಾ ರನ್ ಮೆಷಿನ್ ವಿರಾಟ್ ಕೊಹ್ಲಿಯನ್ನು ಭೇಟಿ ಮಾಡಿ ಸೆಲ್ಫೀ ಪಡೆಯಬೇಕೆಂದು ಎಷ್ಟೋ ಅಭಿಮಾನಿಗಳು ಕಾಯುತ್ತಿರುತ್ತಾರೆ.
ಅಂತಹ ಅಭಿಮಾನಿಗಳಲ್ಲಿ ಗುವಾಹಟಿಯ ರಾಹುಲ್ ರಾಹಿ ಕೂಡಾ ಒಬ್ಬರು. ತಮ್ಮ ತವರು ಗುವಾಹಟಿಯಲ್ಲಿ ದಕ್ಷಿಣ ಆಫ್ರಿಕಾ ವಿರುದ್ಧ ಟಿ20 ಕ್ರಿಕೆಟ್ ಆಡಲು ತಂಡದ ಜೊತೆ ಕೊಹ್ಲಿ ಬರುತ್ತಾರೆಂದಾಗ ರಾಹುಲ್ ಗೂ ಅವರನ್ನು ಭೇಟಿ ಮಾಡುವ ಆಸೆಯಾಗಿತ್ತು. ಈ ಕಾರಣಕ್ಕೆ ಟೀಂ ಇಂಡಿಯಾ ಆಗಮಿಸುವಾಗ ವಿಮಾನ ನಿಲ್ದಾಣಕ್ಕೆ ಬಂದಿದ್ದರು. ಆದರೆ ಅಲ್ಲಿನ ಭದ್ರತಾ ಅಧಿಕಾರಿಗಳು ಅವರನ್ನು ಕೊಹ್ಲಿಯನ್ನು ಭೇಟಿ ಮಾಡಲು ಬಿಡಲಿಲ್ಲ.
ಹೀಗಾಗಿ ಈ ಅಭಿಮಾನಿ ಕೊಹ್ಲಿ ಮತ್ತು ಟೀಂ ಇಂಡಿಯಾ ವಾಸ್ತವ್ಯವಿದ್ದ ಐಷಾರಾಮಿ ಹೋಟೆಲ್ ನಲ್ಲಿ 23 ಸಾವಿರ ರೂ. ತೆತ್ತು ರೂಂ ಬುಕ್ ಮಾಡಿದರು. ಬಳಿಕ ಬ್ರೇಕ್ ಫಾಸ್ಟ್ ಏರಿಯಾ ಬಳಿ ಕೊಹ್ಲಿಯನ್ನು ಭೇಟಿ ಮಾಡಿ ಸೆಲ್ಫೀ ಕ್ಲಿಕ್ಕಿಸಿದ್ದಲ್ಲದೆ, ತಾವೇ ಕೊಲೇಜ್ ಮಾಡಿದ್ದ ಫೋಟೋ ಫ್ರೇಮ್ ಗೆ ಕೊಹ್ಲಿಯ ಆಟೋಗ್ರಾಫ್ ಪಡೆದುಕೊಂಡು ಖುಷಿಪಟ್ಟಿದ್ದಾರೆ.
-Edited by Rajesh Patil
