ಮುಂಬೈ: ದೇಶದಾದ್ಯಂತ ಕೊರೋನಾ ರೋಗ ಹಲವರ ಜೀವನ ಅತಂತ್ರಗೊಳಿಸಿದೆ. ಇಂತಹವರ ನೆರವಿಗಾಗಿ ಕ್ರಿಕೆಟಿಗ ಕೆಎಲ್ ರಾಹುಲ್ ಈಗ ತಾವು ವಿಶ್ವಕಪ್ ನಲ್ಲಿ ಆಡಿದ್ದ ಬ್ಯಾಟ್ ನ್ನು ಹರಾಜಿಗಿಟ್ಟಿದ್ದಾರೆ.
ಅವೇರ್ ಫೌಂಡೇಷನ್ ಎನ್ನುವ ಸಂಸ್ಥೆಯ ಜತೆಗೆ ಕೈ ಜೋಡಿಸಿರುವ ರಾಹುಲ್ ತಾವು ಏಕದಿನ ವಿಶ್ವಕಪ್ ನಲ್ಲಿ ಆಡಿದ್ದ ಬ್ಯಾಟ್, ತಮ್ಮ ಟೆಸ್ಟ್, ಏಕದಿನ ಮತ್ತು ಟಿ20 ಜೆರ್ಸಿ, ಗ್ಲೌಸ್, ಪ್ಯಾಡ್ ನ್ನು ಹರಾಜಿಗಿಡಲು ಸಹಿ ಹಾಕಿ ಸಂಸ್ಥೆಗೆ ನೀಡಿದ್ದಾರೆ.
ಈ ಸಂಸ್ಥೆ ಕೊರೋನಾದಿಂದಾಗಿ ಸಂಕಷ್ಟಕ್ಕೀಡಾದ, ಬದುಕು ಕಳೆದುಕೊಂಡ ಬಡವರ ಪರವಾಗಿ ಕೆಲಸ ಮಾಡುತ್ತಿದೆ. ಈ ಹರಾಜಿನಲ್ಲಿ ಎಷ್ಟೇ ಮೊತ್ತದ ಹಣ ಸಂಗ್ರಹವಾದರೂ ಸಂಸ್ಥೆಗೆ ಸೇರಲಿದ್ದು, ಅದು ಕೊರೋನಾದಿಂದಾಗಿ ಸಂಕಷ್ಟಕ್ಕೀಡಾದವರ ನೆರವಿಗೆ ಬಳಕೆಯಾಗಲಿದೆ ಎಂದು ರಾಹುಲ್ ಸಾಮಾಜಿಕ ಜಾಲತಾಣದಲ್ಲಿ ಬರೆದುಕೊಂಡಿದ್ದಾರೆ.
