ಬಾಲಿವುಡ್ ನಟ ಶಾಹಿದ್ ಕಪೂರ್ ಮತ್ತು ಅವರ ಮಡದಿ ಮೀರಾ ರಜಪೂತ್ ಹೊಸ ಮನೆಗೆ ತೆರಳಲಿದ್ದಾರೆ ಎನ್ನುವ ಸುದ್ದಿ ಹರಿದಾಡಲು ಪ್ರಾರಂಭವಾಗಿ 6 ತಿಂಗಳಾಗಿತ್ತು. ಅಂತಿಮವಾಗಿ ವೋರ್ಲಿಯಲ್ಲಿ ಸುಮಾರು 56 ಕೋಟಿ ರೂಪಾಯಿ ಬೆಲೆ ಬಾಳುವ ಡ್ಯುಪ್ಲೆಕ್ಸ್ ಅನ್ನು ಖರೀದಿಸಿರುವುದಾಗಿ ಮೂಲಗಳು ತಿಳಿಸಿವೆ.
ಜುಹುವಿನಲ್ಲಿರುವ ತಮ್ಮ ಫ್ಲ್ಯಾಟ್‌ನಲ್ಲಿ ವಾಸಿಸುತ್ತಿದ್ದ ದಂಪತಿಗಳು ಕಳೆದ ಆರು ತಿಂಗಳಿನಿಂದ ಮನೆಯ ಹುಡುಕಾಟದಲ್ಲಿದ್ದು ಅಂತಿಮವಾಗಿ ವೋರ್ಲಿಯಲ್ಲಿ ಮನೆಯೊಂದನ್ನು ಖರೀದಿಸಿದ್ದಾರೆ. ಮೂಲಗಳ ಪ್ರಕಾರ ಅವರ ಹಳೆಯ ಮನೆಯ ಹೊರಗೆ ಬೆಳೆಯುತ್ತಿರುವ ವೇಶ್ಯಾವಾಟಿಕೆಯೇ ಅವರು ಮನೆ ಬದಲಾಯಿಸಲು ಕಾರಣ. ಆದರೆ ಶಾಹಿದ್ ಅಥವಾ ಅವರ ಪತ್ನಿ ಈ ಕುರಿತಂತೆ ಯಾವುದೇ ಅಧಿಕೃತ ಪ್ರತಿಕ್ರಿಯೆಯನ್ನು ನೀಡಿಲ್ಲವಾದರೂ ವರದಿಗಳು ಮತ್ತು ಮೂಲಗಳು ಇದೇ ಕಾರಣವನ್ನು ಊಹಿಸಿವೆ.
ಶಾಹಿದ್ ಅವರ ಹೊಸ ನೆರೆ ಹೊರೆಯವರಾಗಿ ಅಕ್ಷಯ್ ಕುಮಾರ್-ಟ್ವಿಂಕಲ್ ಖನ್ನಾ ಮತ್ತು ಅಭಿಷೇಕ್ ಬಚ್ಚನ್-ಐಶ್ವರ್ಯಾ ರೈ ವಾಸಿಸುತ್ತಿರುವುದು ಶುಭ ಸುದ್ದಿಯಾಗಿದೆ. ಆರು ತಿಂಗಳ ಬಸುರಿಯಾಗಿರುವ ಮೀರಾ ಮತ್ತು ಶಾಹಿದ್ ತಮ್ಮ ಎರಡನೇ ಮಗುವಿನ ನಿರೀಕ್ಷೆಯಲ್ಲಿದ್ದಾರೆ.
