ಬೆಂಗಳೂರು: ಆಷಾಢ ಶುಕ್ರವಾರದಂದು ಲಕ್ಷ್ಮೀ ದೇವಿ ಪೂಜೆ ಮಾಡುವುದು ವಿಶೇಷವಾಗಿರುತ್ತದೆ. ಲಕ್ಷ್ಮೀ ದೇವಿಯ ಪೂಜೆಯಿಂದ ಇಂದು ಎಲ್ಲಾ ರೀತಿಯಲ್ಲೂ ನಮಗೆ ಸಮೃದ್ಧಿಯುಂಟಾಗುತ್ತದೆ.
ಆಷಾಢ ಮಾಸದಲ್ಲಿ ಪ್ರತೀ ಶುಕ್ರವಾರವೂ ವಿಶೇಷವೇ. ಪ್ರತೀ ಶುಕ್ರವಾರವೂ ಲಕ್ಷ್ಮೀ ದೇವಿಗೆ ಪೂಜೆ ಮಾಡುವುದು ನಮ್ಮ ಮನೆಯಲ್ಲಿ ಸುಖ, ಶಾಂತಿ, ಸಮೃದ್ಧಿ ನೆಲೆಸಲು ಸಾಧ್ಯವಾಗುತ್ತದೆ. ಇಂದು ಬೆಳಿಗ್ಗೆ ಎದ್ದು ಮಡಿಯಲ್ಲಿ ಮನೆ ಶುಚಿಯಾಗಿರಿಸಿ ವಿಶೇಷವಾಗಿ ತುಳಸಿ ಕಟ್ಟೆಯ ಮುಂಭಾಗ ರಂಗೋಲಿ ಹಾಕಿ ಪೂಜೆ ಮಾಡಿ.
ಇಂದು ಲಕ್ಷ್ಮೀ ದೇವಿಯ ಪೂಜೆ ನಿಮಿತ್ತ ಮುಸ್ಸಂಜೆ ಹೊತ್ತು ದೀಪ ಹಚ್ಚಿಟ್ಟು ಅಂಧಕಾರವನ್ನು ನಿವಾರಿಸುವುದೇ ಪೂಜೆಯ ವಿಶೇಷತೆ. ಲಕ್ಷ್ಮೀ ದೇವಿ ಮನೆಗೆ ಬರಬೇಕೆಂದರೆ ಅಂಧಕಾರವನ್ನು ಹೋಗಲಾಡಿಸಬೇಕು. ಜೊತೆಗೆ ದೀಪವನ್ನು ದಾನ ಮಾಡುವುದರಿಂದ ಮನಸ್ಸಿನ ದುಃಖ ದುಮ್ಮಾನಗಳು ದೂರವಾಗಿ ನೆಮ್ಮದಿ ಮೂಡುವುದು.
ಲಕ್ಷ್ಮೀ ದೇವಿ ಪೂಜೆ ಎಂದರೆ ಕೇವಲ ಹೆಂಗಳೆಯರು ಮಾತ್ರ ಮಾಡಬೇಕೆಂದೇನಿಲ್ಲ. ವಿದ್ಯಾರ್ಥಿಗಳಿಗೆ ವಿದ್ಯಾಭ್ಯಾಸದಲ್ಲಿ ಯಶಸ್ಸು, ಮಹಿಳೆಯರಿಗೆ ಮನೆಯಲ್ಲಿ ಸುಖ ಸಮೃದ್ಧಿ, ನೆಮ್ಮದಿ, ಪುರುಷರಿಗೆ ಐಶ್ವರ್ಯಾಭಿವೃದ್ಧಿ, ಮಾನಸಿಕವಾಗಿ ನೆಮ್ಮದಿಗಾಗಿ ಹಂಬಲಿಸುವವರಿಗೆ ನೆಮ್ಮದಿ ನೀಡುವ ಲಕ್ಷ್ಮೀ ದೇವಿ ಒಲಿಯಬೇಕೆಂದರೆ ಇಂದು ಭಕ್ತಿಯಿಂದ ಲಕ್ಷ್ಮೀ ದೇವಿ ಪೂಜೆ ಮಾಡಬೇಕು.
