ಮೈಸೂರು ದಸರಾದ ಹತ್ತು ಹಲವು ಆಕರ್ಷಣೆಗಳಲ್ಲಿ ವಸ್ತುಪ್ರದರ್ಶನವೂ ಸೇರಿದೆ.
ವಸ್ತು ಪ್ರದರ್ಶನದಲ್ಲಿ ಅಕ್ಟೋಬರ್ 12ರಿಂದ ಅಪೂರ್ವ ಚಿತ್ರಗಳು ಪ್ರದರ್ಶಿತವಾಗುತ್ತಿವೆ. ಮೈಸೂರು ಮತ್ತು ವಿಜಯನಗರ ಪರಂಪರೆಯ ಚಿತ್ರಗಳನ್ನು ಕಾರಂಜಿ ಮಹಲಿನ ಏಳು ಮಳಿಗೆಗಳಲ್ಲಿ ಪ್ರದರ್ಶನಕ್ಕಿಡಲಾಗಿದೆ.
ಮೈಸೂರು ಅರಸೊತ್ತಿಗೆಯೂ ಸೇರಿದಂತೆ ವಿವಿಧ ಮೂಲಗಳಿಂದ ಸಂಗ್ರಹಿಸಲಾದ ಈ ಚಿತ್ರಗಳಲ್ಲಿ ಮೈಸೂರು ಅರಸರು, ಅವರ ಕುಟುಂಬಿಕರು ಮತ್ತು ಮೈಸೂರಿನ ಸಂಪ್ರದಾಯ ಹಾಗೂ ಮಹಾರಾಜರ ಕಾಲದಲ್ಲಿನ ದಸರಾ ಆಚರಣೆಗಳ ಚಿತ್ರಗಳು ಸೇರಿವೆ.
ಬ್ರಿಟಿಷರ ಕಾಲದ ಆಡಳಿತಾವಧಿಯಲ್ಲಿ ಅಧಿಕಾರಿಯಾಗಿದ್ದ ಗ್ರೀನ್ ಲಾ ಅವರು ವಿಜಯನಗರದ ಕಾಲದ ಪರಂಪರೆಯ ಕುರಿತು ತೆಗೆದಿರುವ ಚಿತ್ರಗಳೂ ಪ್ರದರ್ಶನಗೊಳ್ಳುತ್ತಿವೆ.
ಇದರೊಂದಿಗೆ ಮೈಸೂರಿನ ದೊಡ್ಡ ಕೆರೆ ಮೈದಾನದಲ್ಲಿ ಎಂದಿನ ಸಾಂಪ್ರದಾಯಿಕ ವಸ್ತುಪ್ರದರ್ಶನ ನಡೆಯುತ್ತದೆ. ವಾಣಿಜ್ಯ ಮೇಳದೊಂದಿಗೆ ಸಾಂಸ್ಕೃತಿಕ ಮೇಳವೂ ಮೇಳೈಸುತ್ತಿದೆ. ಜತೆಗೆ ಆಹಾರ ಮತ್ತು ಚಿತ್ರೋತ್ಸವಗಳು ದಸರಾ ಉತ್ಸವ ಸಲುವಾಗಿ ನಡೆಯುತ್ತಿವೆ.