ರಿಯೊದಲ್ಲಿ ಎರಡನೇ ಒಲಿಂಪಿಕ್ ಪದಕದ ಗುರಿ ಹೊಂದಿರುವ ಯೋಗೇಶ್ವರ್

ಯೋಗೇಶ್ವರ್ ದತ್ ಒಂದು ದಶಕದಿಂದ ಭಾರತದ ಪರ ಸ್ಪರ್ಧಿಸುತ್ತಿದ್ದು, ಇತ್ತೀಚೆಗೆ ತಾನೆ ಅವರು ಹಿರಿಯ ಕ್ರೀಡಾಪಟು ಎಂಬ ಸ್ಥಾನಮಾನ ಸಾಧಿಸಿದ್ದಾರೆ. ರಿಯೊ ಒಲಿಂಪಿಕ್ಸ್‌ಗೆ ತಂಡದಲ್ಲಿ ಸುಶೀಲ್ ಕುಮಾರ್ ಇಲ್ಲದಿರುವ ಹಿನ್ನೆಲೆಯಲ್ಲಿ ಯೋಗೇಶ್ವರ್ ತಂಡದ ಅತೀ ಹಿರಿಯ ಸದಸ್ಯರಾಗಿದ್ದಾರೆ. ಹರ್ಯಾಣದ ಸೋನೆಪೇಟೆ ತರಬೇತಿ ಶಿಬಿರದಲ್ಲಿ ಯೋಗೀಶ್ವರ್ ಕುಸ್ತಿ ಹಾಲ್‌ಗೆ ಪ್ರವೇಶಿಸುತ್ತಿದ್ದಂತೆ ಯುವ ಕುಸ್ತಿಪಟುಗಳು ಅವರ ಪಾದಗಳನ್ನು ಮುಟ್ಟಿ ನಮಸ್ಕರಿಸುತ್ತಾರೆ. ಈ ಕುಸ್ತಿ ಹಾಲ್ ಯೋಗಿ ಮತ್ತು ಸುಶೀಲ್ ಕುಮಾರ್ ಹೆಸರಿನಲ್ಲಿದೆ.

 ಲಂಡನ್‌ನಲ್ಲಿ ನಾಲ್ಕು ವರ್ಷಗಳ ಹಿಂದೆ ಯೋಗಿ ಕೆ.ಡಿ.ಜಾಧವ್ ಮತ್ತು ಸುಶೀಲ್ ಕುಮಾರ್ ಬಳಿಕ ಯೋಗೇಶ್ವರ್ ಪದಕ ಗೆದ್ದ ಮೂರನೇ ಭಾರತೀಯ ಕುಸ್ತಿಪಟುವಾಗಿದ್ದರು. ಆಗಿನಿಂದ ಪರಿಸ್ಥಿತಿ ಬದಲಾಗಿದೆ. ಉದಾಹರಣೆಗೆ ಅವರೀಗ 65 ಕೆಜಿ ಫ್ರೀಸ್ಟೈಲ್ ವಿಭಾಗದಲ್ಲಿ ಸ್ಪರ್ಧಿಸುತ್ತಿದ್ದಾರೆ.

ಕಾಲಾಂತರದಲ್ಲಿ ಯೋಗೇಶ್ವರ್ ತಮ್ಮ ತೂಕದ ವಿಭಾಗವನ್ನು ಬದಲಿಸಿದ್ದಾರೆ. ಅವರ ಕಾಮನ್‌ವೆಲ್ತ್ ಕ್ರೀಡಾಕೂಟ ಮತ್ತು ಒಲಿಂಪಿಕ್ ಪದಕಗಳು 2010 ಮತ್ತು 2012ರಲ್ಲಿ 60 ಕೆಜಿ ಫ್ರೀಸ್ಟೈಲ್ ವಿಭಾಗದಲ್ಲಿ ದಕ್ಕಿದೆ. ಆದರೆ ತಮ್ಮ 65 ಕೆಜಿ ತೂಕದ ವಿಭಾಗಕ್ಕೆ ಹೊಂದಿಕೊಳ್ಳಲು ಹೆಚ್ಚು ಸಮಯ ತೆಗೆದುಕೊಳ್ಳದೇ 2014ರ ಕಾಮನ್‌ವೆಲ್ತ್ ಮತ್ತು ಏಷ್ಯನ್ ಕ್ರೀಡಾಕೂಟದಲ್ಲಿ ಚಿನ್ನದ ಪದಕ ಜಯಿಸಿದ್ದರು.

 ರಿಯೊನಲ್ಲಿ ಸ್ಪರ್ಧಿಸುತ್ತಿರುವ ಯೋಗೇಶ್ವರ್ ಉತ್ತಮ ಫಾರಂನಲ್ಲಿದ್ದು ಒಲಿಂಪಿಕ್ ಅರ್ಹತಾ ಈವೆಂಟ್‌ನಲ್ಲಿ ಚಿನ್ನ ಗೆದ್ದಿದ್ದರು. ರಿಯೊದಲ್ಲಿ ಯಶಸ್ವಿಯಾದರೆ ಸುಶೀಲ್ ಬಳಿಕ ಎರಡನೇ ವೈಯಕ್ತಿಕ ಚಿನ್ನದ ಪದಕ ಗಳಿಸುವ ಗೌರವಕ್ಕೆ ಅವರು ಪಾತ್ರರಾಗಲಿದ್ದಾರೆ. 

ತಾಜಾ ಸುದ್ದಿಗಳಿಗಾಗಿ ವೆಬ್ ದುನಿಯಾ ಮೊಬೈಲ್ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ