ನವದೆಹಲಿ: ಭಾರತೀಯ ಬ್ಯಾಡ್ಮಿಂಟನ್ ಆಟಗಾರ್ತಿ ಜ್ವಾಲಾ ಗುಟ್ಟಾ ಅವರನ್ನು ಭಾರತದ ಮಾಜಿ ಕ್ರಿಕೆಟ್ ನಾಯಕ ಮಹಮ್ಮದ್ ಅಜರುದ್ದೀನ್ ಜತೆ ಹಿಂದೆ ಹೊಂದಿದ್ದರೆಂಬ ಸಂಬಂಧ ಕುರಿತು ಪ್ರಶ್ನಿಸಿದಾಗ ಜ್ವಾಲಾ ತಮ್ಮ ಸಹನೆ ಕಳೆದುಕೊಂಡು ಸಿಟ್ಟಾದರು.
ಕ್ರೀಡಾ ಸಂಕೀರ್ಣವೊಂದನ್ನು ಉದ್ಘಾಟಿಸಲು ಜ್ವಾಲಾ ಸೂರತ್‌ಗೆ ತೆರಳಿದ್ದರು. ಮಾಧ್ಯಮದ ಜತೆ ಸಂವಾದದಲ್ಲಿ ಅವರನ್ನು ಅಜರುದ್ದೀನ್ ಜತೆ ಹೊಂದಿದ್ದ ಸಂಬಂಧ ಕುರಿತು ಪ್ರಶ್ನಿಸಿದಾಗ ಇದೊಂದು ಗಾಳಿಸುದ್ದಿಯಾಗಿದ್ದು, ನೀವು ಈ ಪ್ರಶ್ನೆಯನ್ನು ಪುನಃ ಪುನಃ ಏಕೆ ಕೇಳುತ್ತೀರಿ. ನಾನು ಇದನ್ನು ವದಂತಿ ಎಂದು ಹಿಂದೆಯೂ ಹೇಳಿದ್ದಾಗಾ ಜ್ವಾಲಾ ಗುಟ್ಟಾ ಸಿಟ್ಟಿನಿಂದ ಹೇಳಿದರು.
ಈ ನಡುವೆ ಅಜರುದ್ದೀನ್ ಆತ್ಮಕಥನ ಅಜರ್ ಚಿತ್ರವು ಬೆಳ್ಳಿತೆರೆಯ ಮೇಲೆ ಶೀಘ್ರವೇ ಬರಲಿದೆ. ಹಿಂದೆಯೂ ಅಜರ್ ಜತೆ ತಮ್ಮ ಸಂಬಂಧವನ್ನು ಅಸಂಬದ್ಧ ಎಂದು ತಳ್ಳಿಹಾಕಿದ ಜ್ವಾಲಾ, ತಮಗೆ ಕಳಂಕ ತರಲು ಬ್ಯಾಡ್ಮಿಂಟನ್ ಸಂಸ್ಥೆಯ ಕೆಲವರು ಪ್ರಯತ್ನಿಸಿದ್ದಾರೆ ಎಂದಿದ್ದರು. ಆದರೆ ಜ್ವಾಲಾ ಗುಟ್ಟಾ ಅಜರುದ್ದೀನ್ ಪುತ್ರ ಅಸಾದುದ್ದೀನ್ ಜತೆ ಅನೇಕ ಬಾರಿ ಕಾಣಿಸಿಕೊಂಡಿದ್ದರು.
ಜ್ವಾಲಾ ಹೈದರಾಬಾದಿನಲ್ಲಿ ಆಡುವ ಎಲ್ಲಾ ಪಂದ್ಯಗಳಲ್ಲಿ ಅಸಾದುದ್ದೀನ್ ಇರುತ್ತಿದ್ದ. ಪ್ರತಿಯೊಂದು ಪಂದ್ಯದ ಬಳಿಕ ಜ್ವಾಲಾ ಅಸಾದುದ್ದೀನ್ ಪಕ್ಕದಲ್ಲಿ ಕುಳಿತುಕೊಂಡು ಚಾಟ್ ಮಾಡುತ್ತಿದ್ದರು ಎಂದು ಮೂಲವೊಂದು ತಿಳಿಸಿದೆ.
