ಐಪಿಎಲ್ ನಲ್ಲಿ ಸಿಗಬೇಕಾದ ಗೌರವ ಸಿಗಲಿಲ್ಲ: ಕ್ರಿಸ್ ಗೇಲ್!

ನನಗೆ ಸಿಗಬೇಕಾದ ಗೌರವ ಐಪಿಎಲ್ ನಲ್ಲಿ ಸಿಗಲಿಲ್ಲ ಎಂದು ವೆಸ್ಟ್ ಇಂಡೀಸ್ ಬ್ಯಾಟಿಂಗ್ ದೈತ್ಯ ಕ್ರಿಸ್ ಗೇಲ್ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಐಪಿಎಲ್ ನಲ್ಲಿ ಹಲವಾರು ದಾಖಲೆಗಳನ್ನು ನಿರ್ಮಿಸಿರುವ ಕ್ರಿಸ್ ಗೇಲ್ ಅವರನ್ನು ಈ ಬಾರಿ ಯಾವುದೇ ತಂಡ ಖರೀದಿಸಿಲ್ಲ. ಹಾಗಾಗಿ ಅವರು ಐಪಿಎಲ್ ನಿಂದ ಹೊರಗುಳಿಯಬೇಕಾಗಿದೆ. ಬೌಲರ್ ಗಳು ದುಸ್ವಪ್ನವಾಗಿ ಕಾಡುತ್ತಿದ್ದ ಗೇಲ್ ಐಪಿಎಲ್ ನಿಂದ ಹೊರಗುಳಿದಿರುವ ಬಗ್ಗೆ ಮೊದಲ ಬಾರಿ ಬಾಯಿಬಿಟ್ಟಿದ್ದಾರೆ.

ಕಳೆದ ಕೆಲವು ವರ್ಷಗಳಿಂದ ಐಪಿಎಲ್ ನಲ್ಲಿ ನನ್ನನ್ನು ಸರಿಯಾಗಿ ನಡೆಸಿಕೊಳ್ಳಲಿಲ್ಲ ಎಂಬ ನೋವಿದೆ ಎಂದು ಗೇಲ್ ಹೇಳಿದ್ದಾರೆ.

ನನಗೆ ಸಿಗಬೇಕಾದ ಗೌರವ ಸಿಗಲಿಲ್ಲ. ಕ್ರೀಡೆಗಾಗಿ ಹಾಗೂ ಐಪಿಎಲ್ ಗಾಗಿ ನಾನು ಏನು ಮಾಡಿದ್ದರೂ ಅದು ಯಾವುದೂ ಲೆಕ್ಕಕ್ಕಿಲ್ಲ ಎಂಬುದು ತಿಳಿದಾಗ ಓಕೆ ಅದಕ್ಕೆ ಯಾಕೆ ತಲೆಕೆಡಿಸಿಕೊಳ್ಳಬೇಕು ಎಂದು ಸುಮ್ಮನಾದೆ ಎಂದು ಗೇಲ್ ಪ್ರತಿಕ್ರಿಯಿಸಿದ್ದಾರೆ.

ಕ್ರೀಡೆಯ ನಂತರವೂ ಜೀವನ ಇರುತ್ತೆ. ಆದ್ದರಿಂದ ನಾನು ಯಾವುದನ್ನೂ ಗಂಭೀರವಾಗಿ ಪರಿಗಣಿಸಲಿಲ್ಲ. ಮುಂದಿನ ವರ್ಷ ನಾನು ಮತ್ತೆ ಐಪಿಎಲ್ ಗೆ ಬರುತ್ತೇನೆ. ನನ್ನ ಅಗತ್ಯ ಅವರಿಗೆ ಖಂಡಿತ ಇದೆ ಎಂದು ಗೇಲ್ ವಿಶ್ವಾಸ ವ್ಯಕ್ತಪಡಿಸಿದರು.

ಐಪಿಎಲ್ ನಲ್ಲಿ ನಾನು 3 ತಂಡಗಳ ಪರ ಆಡಿದ್ದೇನೆ. ಅದರಲ್ಲೂ ಕೆಕೆಆರ್ ಮತ್ತು ಆರ್ ಸಿಬಿ ಪರ ಆಡುವಾಗ ತಂಡಕ್ಕೆ ಪ್ರಶಸ್ತಿ ತಂದುಕೊಡಬೇಕು ಎಂದು ತುಂಬಾ ಪ್ರಯತ್ನಪಟ್ಟೆ ಎಂದು ಗೇಲ್ ಹೇಳಿದರು.