Publish Date: Mon, 27 Jul 2026 (09:52 IST)
Updated Date: Mon, 27 Jul 2026 (09:58 IST)
ಸಾಮಾಜಿಕ ಜಾಲತಾಣಗಳಲ್ಲಿ ಇತ್ತೀಚೆಗೆ ವಿಡಿಯೋವೊಂದು ಸಖತ್ ವೈರಲ್ ಆಗುತ್ತಿದ್ದು, ರೈಲಿನ ಎಸಿ ಬೋಗಿಯ ಮೇಲಿನ ಬರ್ತ್ನಲ್ಲಿ ಪ್ರಯಾಣಿಕರೊಬ್ಬರು ಪೂಜೆ ಮಾಡುತ್ತಾ ಅಗರ್ಬತ್ತಿ ಮತ್ತು ಎಣ್ಣೆಯ ದೀಪವನ್ನು ಹಚ್ಚಿರುವುದು ಕಂಡುಬಂದಿದೆ.
ಇದನ್ನು ಗಮನಿಸಿದ ಪಕ್ಕದ ಪ್ರಯಾಣಿಕರೊಬ್ಬರು ತಕ್ಷಣವೇ ಮಧ್ಯಪ್ರವೇಶಿಸಿ, ಚಲಿಸುವ ರೈಲಿನಲ್ಲಿ ಬೆಂಕಿ ಅಥವಾ ಹೊಗೆಯನ್ನು ಹಾಕುವುದು ಎಷ್ಟು ಅಪಾಯಕಾರಿ ಎಂಬುದನ್ನು ಅವರಿಗೆ ತಿಳಿಸಿ ತಡೆದಿದ್ದಾರೆ. ರೈಲಿನಲ್ಲಿ ದೀಪ ಅಥವಾ ಧೂಪ ಹಚ್ಚುವುದು ಕೇವಲ ಸಣ್ಣ ವಿಷಯವಲ್ಲ, ಇದು ಇಡೀ ಬೋಗಿಯ ಪ್ರಯಾಣಿಕರ ಜೀವಕ್ಕೆ ಕಂಟಕ ತರಬಲ್ಲದು. ಚಲಿಸುವ ರೈಲಿನಲ್ಲಿ ಗಾಳಿಯ ಸಂಚಾರ ಹೆಚ್ಚಿರುತ್ತದೆ ಹಾಗೂ ಎಸಿ ಬೋಗಿಗಳಲ್ಲಿ ಬೆಂಕಿ ಬೇಗನೇ ಹರಡುವಂತಹ ವಸ್ತುಗಳು ಇರುತ್ತವೆ. ಮುಕ್ತವಾಗಿ ದೀಪದ ಒಲೆ ಅಥವಾ ಬೆಂಕಿ ಹಚ್ಚುವುದು ದೊಡ್ಡ ಅಗ್ನಿ ಅವಘಡಕ್ಕೆ ಕಾರಣವಾಗಬಹುದು.
ಆಧುನಿಕ ರೈಲುಗಳಲ್ಲಿ ಹೊಗೆಯನ್ನು ಪತ್ತೆಹಚ್ಚುವ ಅತ್ಯಾಧುನಿಕ ಅಲಾರಾಂ ವ್ಯವಸ್ಥೆ ಇರುತ್ತದೆ. ಧೂಪದ ಹೊಗೆಯಿಂದ ಅಲಾರಾಂ ಸೌಂಡ್ ಬಂದು, ರೈಲು ಸ್ವಯಂಚಾಲಿತವಾಗಿ ನಿಂತು ಅನಗತ್ಯ ಗೊಂದಲ ಉಂಟಾಗಬಹುದು. ಮುಚ್ಚಿದ ಎಸಿ ಬೋಗಿಯಲ್ಲಿ ಹೊಗೆಯಿಂದಾಗಿ ಆಸ್ತಮಾ ಅಥವಾ ಉಸಿರಾಟದ ತೊಂದರೆ ಇರುವ ಇತರ ಪ್ರಯಾಣಿಕರಿಗೆ ತೀವ್ರ ಉಸಿರುಗಟ್ಟುವಿಕೆ ಉಂಟಾಗಬಹುದು.
ಧರ್ಮದ ವಿರುದ್ಧವಲ್ಲ, ಭದ್ರತೆಯೇ ಮೊದಲ ಆದ್ಯತೆ
ಈ ಘಟನೆಯ ಉದ್ದೇಶ ಅಥವಾ ನೀಡುತ್ತಿರುವ ಸಂದೇಶ ಯಾವುದೇ ನಿರ್ದಿಷ್ಟ ಧರ್ಮ, ನಂಬಿಕೆ ಅಥವಾ ಪ್ರಾರ್ಥನೆಯ ವಿರುದ್ಧವಾದುದಲ್ಲ. ಪ್ರತಿಯೊಬ್ಬರಿಗೂ ತಮ್ಮ ನಂಬಿಕೆಗಳನ್ನು ಪಾಲಿಸುವ ಹಕ್ಕಿದೆ. ಆದರೆ, ಸಾರ್ವಜನಿಕ ಸ್ಥಳಗಳಲ್ಲಿ ಹಾಗೂ ಚಲಿಸುವ ವಾಹನಗಳಲ್ಲಿ ಪ್ರತಿಯೊಬ್ಬರ ಜೀವದ ರಕ್ಷಣೆ ಮತ್ತು ಸುರಕ್ಷತೆ ಮೊದಲ ಆದ್ಯತೆಯಾಗಬೇಕು.
ರೈಲ್ವೆ ನಿಯಮ ನೆನಪಿರಲಿ
ಭಾರತೀಯ ರೈಲ್ವೆ ಕಾಯ್ದೆಯ ಪ್ರಕಾರ ರೈಲಿನೊಳಗೆ ಬೆಂಕಿ ಪೊಟ್ಟಣ, ದೀಪ, ಸೀಮೆಎಣ್ಣೆ, ಪಟಾಕಿ ಅಥವಾ ಯಾವುದೇ ದಹನಕಾರಿ ವಸ್ತುಗಳನ್ನು ಹಚ್ಚುವುದು ಅಥವಾ ಒಯ್ಯುವುದು ಕಾನೂನುಬಾಹಿರ ಹಾಗೂ ಶಿಕ್ಷಾರ್ಹ ಅಪರಾಧವಾಗಿದೆ.
About Writer
ಕೃಷ್ಣವೇಣಿ ಕೆ
Completed bachelor degree in Journalism and communication in SDMC Ujire. 15 years of experience as journalist. Worked as sub editor and reporter. Specialties in sports, politics and entertainment.....
ಮತ್ತಷ್ಟು ಓದಿ