ಮನೆಯ ಮಹಡಿಯಿಂದ ಐಸ್ ಕ್ರೀಂಗಾಗಿ ಬಾಗಿದ ವ್ಯಕ್ತಿ: ನಂತರ ನಡೆದ ಈ ಆಘಾತಕಾರಿ ಘಟನೆಯ ವಿಡಿಯೋ ನೋಡಿ

ಉತ್ತರ ಪ್ರದೇಶದ ಸೋನ್‌ಭದ್ರಾ ಜಿಲ್ಲೆಯಲ್ಲಿ ಅತ್ಯಂತ ವಿಚಿತ್ರ ಹಾಗೂ ಆಘಾತಕಾರಿ ಘಟನೆಯೊಂದು ನಡೆದಿದ್ದು, ಇದರ ಸಿಸಿಟಿವಿ ದೃಶ್ಯಾವಳಿಗಳು ಸದ್ಯ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗುತ್ತಿವೆ. ಐಸ್‌ಕ್ರೀಮ್ ಕೊಳ್ಳುವ ತರಾತುರಿಯಲ್ಲಿ ವ್ಯಕ್ತಿಯೊಬ್ಬರು ಮನೆಯ ಮಹಡಿಯಿಂದ ನೇರವಾಗಿ ಕೆಳಗೆ ಬಿದ್ದ ಘಟನೆ ಸಾರ್ವಜನಿಕರನ್ನು ಬೆಚ್ಚಿಬೀಳಿಸಿದೆ.

ಸೋನ್‌ಭದ್ರಾದ ವಸತಿ ಪ್ರದೇಶವೊಂದರಲ್ಲಿ ಈ ಘಟನೆ ಸಂಭವಿಸಿದೆ. ಮಧ್ಯಾಹ್ನದ ಸಮಯದಲ್ಲಿ ಐಸ್‌ಕ್ರೀಮ್ ಮಾರಾಟಗಾರನೊಬ್ಬ  ಸೈಕಲ್‌ನಲ್ಲಿ ಹಾರ್ನ್ ಬಾರಿಸುತ್ತಾ ಮನೆಯ ಮುಂದೆ ಬಂದಿದ್ದಾನೆ. ಮನೆಯ ಮೊದಲ ಮಹಡಿಯ ತುದಿಯಲ್ಲಿ ನಿಂತಿದ್ದ ವ್ಯಕ್ತಿಯೊಬ್ಬರು ಐಸ್‌ಕ್ರೀಮ್ ಕೊಳ್ಳಲು ಆತನನ್ನು ಕೂಗಿ ಕರೆದಿದ್ದಾರೆ.

ಐಸ್‌ಕ್ರೀಮ್ ಗಾಡಿಯವನಿಗೆ ಸನ್ನೆ ಮಾಡಲು ಅಥವಾ ಆತನಿಗೆ ಹಣ ನೀಡಲು ಮುಂದಕ್ಕೆ ಬಾಗಿದಾಗ, ಆ ವ್ಯಕ್ತಿ ಇದ್ದಕ್ಕಿದ್ದಂತೆ ತಮ್ಮ ದೇಹದ ಸಮತೋಲನವನ್ನು  ಕಳೆದುಕೊಂಡಿದ್ದಾರೆ. ಮಹಡಿಗೆ ಯಾವುದೇ ಸುರಕ್ಷಿತ ತಡೆಗೋಡೆ ಇಲ್ಲದ ಕಾರಣ, ಅವರು ನೇರವಾಗಿ ತಲೆಕೆಳಗಾಗಿ ಕೆಳಗಿನ ರಸ್ತೆಗೆ ಬಿದ್ದಿದ್ದಾರೆ.

ಮನೆಯ ಮುಂಭಾಗದಲ್ಲೇ ಅಳವಡಿಸಲಾಗಿದ್ದ ಸಿಸಿಟಿವಿ ಕ್ಯಾಮೆರಾದಲ್ಲಿ ಈ ಇಡೀ ದೃಶ್ಯ ಅತ್ಯಂತ ಸ್ಪಷ್ಟವಾಗಿ ಸೆರೆಯಾಗಿದೆ. ವ್ಯಕ್ತಿ ಮೇಲಿನಿಂದ ಕೆಳಗೆ ಬೀಳುತ್ತಿದ್ದಂತೆ ಕೆಳಗೆ ನಿಂತಿದ್ದ ಐಸ್‌ಕ್ರೀಮ್ ವ್ಯಾಪಾರಿ ಮತ್ತು ಸುತ್ತಮುತ್ತಲಿನ ಜನರು ತೀವ್ರ ಆಘಾತಕ್ಕೊಳಗಾಗಿ ಓಡಿ ಬಂದಿದ್ದಾರೆ.

ಬಿದ್ದ ರಭಸಕ್ಕೆ ವ್ಯಕ್ತಿಗೆ ತೀವ್ರ ಪೆಟ್ಟಾಗಿದ್ದು, ತಕ್ಷಣವೇ ಸ್ಥಳೀಯರು ಮತ್ತು ಕುಟುಂಬಸ್ಥರು ಅವರನ್ನು ಹತ್ತಿರದ ಆಸ್ಪತ್ರೆಗೆ ಸಾಗಿಸಿ ದಾಖಲಿಸಿದ್ದಾರೆ. ಇಷ್ಟು ಎತ್ತರದಿಂದ ಬಿದ್ದರೂ ಆ ವ್ಯಕ್ತಿ ಅದೃಷ್ಟವಶಾತ್ ಪ್ರಾಣಾಪಾಯದಿಂದ ಪಾರಾಗಿದ್ದಾರೆ. ಆಸ್ಪತ್ರೆಯಲ್ಲಿ ಅವರಿಗೆ ತುರ್ತು ಚಿಕಿತ್ಸೆ ನೀಡಲಾಗಿದ್ದು, ಪ್ರಸ್ತುತ ಅವರ ಆರೋಗ್ಯ ಸ್ಥಿತಿ ಸ್ಥಿರವಾಗಿದೆ ಮತ್ತು ಚೇತರಿಸಿಕೊಳ್ಳುತ್ತಿದ್ದಾರೆ ಎಂದು ವೈದ್ಯರು ಹಾಗೂ ಕುಟುಂಬದ ಮೂಲಗಳು ತಿಳಿಸಿವೆ.

pic.twitter.com/tAiPxwF7Yh — The Tatva (@thetatvaindia) June 25, 2026