ಬಾಯಿಮುಚ್ಚು, ಇಲ್ಲಾಂದ್ರೆ ಕಿಡ್ನ್ಯಾಪ್ ಮಾಡಿ ರೇಪ್ ಎಸಗುತ್ತೇನೆ: ಮಹಿಳಾ ಪ್ರಯಾಣಿಕಳಿಗೆ ಕ್ಯಾಬ್ ಚಾಲಕನ ಬೆದರಿಕೆ

ಬಾಯಿ ಮುಚ್ಚದಿದ್ದಲ್ಲಿ ಕಿಡ್ನಾಪ್ ಮಾಡಿ ರೇಪ್ ಎಸಗಿ ಬಿಸಾಕುತ್ತೇನೆ ಎಂದು ಮಹಿಳಾ ಪ್ರಯಾಣಿಕಳೊಬ್ಬಳಿಗೆ ಕ್ಯಾಬ್ ಚಾಲಕ ಬೆದರಿಕೆ ಹಾಕಿದ ಘಟನೆ ವರದಿಯಾಗಿದೆ.

27 ವರ್ಷದ ಮಹಿಳೆ ರಾತ್ರಿ ಸುಮಾರು 10 ಗಂಟೆಗೆ ಜೆಡಿ ಬ್ಲಾಕ್‌ನ ಸಾಲ್ಟ್ ಲೇಕ್‌ನಿಂದ ಕ್ಯಾಬ್ ಬುಕ್ ಮಾಡಿದ್ದಳು ಎನ್ನಲಾಗಿದೆ. ಆದರೆ, ಯಾವುದೇ ಕಾರಣವಿಲ್ಲದೇ ಕ್ಯಾಬ್ ಚಾಲಕ ಮಹಿಳೆಗೆ ಸುಮ್ಮನಿರದಿದ್ದಲ್ಲಿ ಅಪಹರಣ ಮಾಡಿ ರೇಪ್ ಮಾಡುತ್ತೇನೆ ಎಂದು ಬೆದರಿಕೆಯೊಡ್ಡಿದ್ದಾನೆ.

 ಚಾಲಕನ ವರ್ತನೆ ಮತ್ತು ಉದ್ದೇಶದಿಂದ ಆಘಾತಗೊಂಡ ಮಹಿಳೆ ಚಲಿಸುತ್ತಿರುವ ಕಾರಿನಿಂದಲೇ ಜಂಪ್ ಮಾಡಿ ಹೊರಗೆ ಹಾರಿದ್ದಾಳೆ. ಆದಾಗ್ಯೂ, ಕ್ಯಾಬ್ ಚಾಲಕ ಕಾರು ಮತ್ತೆ ರಿವರ್ಸ್ ತೆಗೆದುಕೊಂಡು ಆಕೆಯ ಮೇಲೆ ಹರಿಸಲು ಪ್ರಯತ್ನಿಸಿದ್ದಾನೆ. 

28 ವರ್ಷ ವಯಸ್ಸಿನ ಕಾರು ಚಾಲಕ ಸಂತು ಪರ್ಮಾನಿಕ್‌ನನ್ನು ನಂತರ ಪೊಲೀಸರು ಬಂಧಿಸಿ, ಲೈಂಗಿಕ ಕಿರುಕುಳ ಮತ್ತು ಅಪರಾಧಿಕ ಉದ್ದೇಶದ ಪ್ರಕರಣಗಳನ್ನು ದಾಖಲಿಸಿ ನ್ಯಾಯಾಂಗದ ವಶಕ್ಕೆ ಒಪ್ಪಿಸಿದ್ದಾರೆ. 

ಮಹಿಳಾ ಪ್ರಯಾಣಿಕಳ ಪ್ರಕಾರ, ಕಾರಿನಲ್ಲಿ ನನ್ನ ಗೆಳತಿಯಿರುವವರೆಗೆ ಎಲ್ಲವು ಚೆನ್ನಾಗಿತ್ತು. ಆದರೆ,ನನ್ನ ಗೆಳತಿ ಅರಣ್ಯ ಭವನದಲ್ಲಿ ಇಳಿದಕೂಡಲೇ ಚಾಲಕ ಕಾರನ್ನು ವೇಗವಾಗಿ ಚಲಾಯಿಸಿ ನಾನು ಹೋಗಬೇಕಾಗಿದ್ದ ದಾರಿಗೆ ವಿರುದ್ಧವಾಗಿ ಕಾರು ತಿರುಗಿಸಿದ್ದಾನೆ.

ರಸ್ತೆ ನಿರ್ಜನವಾಗಿದ್ದರಿಂದ ಜೋರಾಗಿ ಕೂಗಿಕೊಂಡರು ಯಾರು ಬಾರದಿದ್ದಾಗ ಮಹಿಳೆ, ಚಲಿಸುತ್ತಿರುವ ಕಾರಿನಿಂದಲೇ ಹೊರಗೆ ಹಾರಿದ್ದಾಳೆ. ಮಾರನೇ ದಿನ ಕಾರು ಚಾಲಕ , ಉಬೇರ್ ಕಂಪೆನಿ ಮತ್ತು ಪೊಲೀಸ್ ಠಾಣೆಗೆ ದೂರು ನೀಡಿದ್ದಾಳೆ ಎಂದು ಹಿರಿಯ ಪೊಲೀಸ್ ಅಧಿಕಾರಿಗಳು ತಿಳಿಸಿದ್ದಾರೆ. 

ತಾಜಾ ಸುದ್ದಿಗಳಿಗಾಗಿ ವೆಬ್ ದುನಿಯಾ ಮೊಬೈಲ್ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ.