ದೆಹಲಿ ಕೊಳ್ಳೆಗಾರರು ಗೋವಾ ಮೇಲೆ ಕಣ್ಣಿಟ್ಟಿದ್ದಾರೆ: ಆಪ್ ವಿರುದ್ಧ ಮನೋಹರ್ ಪರಿಕ್ಕರ್

ದೆಹಲಿಯಂತೆ ಗೋವಾದಲ್ಲಿ ಕೂಡ ಛಾಪು ಮೂಡಿಸಲು ಪ್ರಯತ್ನಿಸುತ್ತಿರುವ ಆಮ್ ಆದ್ಮಿ ಪಕ್ಷದ ವಿರುದ್ಧ ಕೇಂದ್ರ ರಕ್ಷಣಾ ಸಚಿವ, ಬಿಜೆಪಿಯ ಹಿರಿಯ ನಾಯಕ ಮನೋಹರ ಪರಿಕ್ಕರ್ ಹರಿಹಾಯ್ದಿದ್ದಾರೆ. 

ದೆಹಲಿಯನ್ನು ಕೊಳ್ಳೆ ಹೊಡೆದ ಬಳಿಕ ಕೆಲವರೀಗ ಗೋವಾ ಮೇಲೆ ಕಣ್ಣಿಟ್ಟಿದ್ದಾರೆ ಎಂದ ಅವರು ಅರವಿಂದ ಕೇಜ್ರಿವಾಲ್ ನೇತೃತ್ವದ ಸರ್ಕಾರವನ್ನು "ಮುಂಗಾರಿನ ಹುಲ್ಲಿಗೆ" ಹೋಲಿಸಿದ್ದಾರೆ. 

ಗೋವಾ ಮುಖ್ಯಮಂತ್ರಿ ಲಕ್ಷ್ಮಿಕಾಂತ್ ಪರ್ಸೇಕರ್ ಅವರ 60 ನೇ ಜನ್ಮದಿನದ ಪ್ರಯುಕ್ತ ಆಯೋಜಿಸಲಾಗಿದ್ದ ನಾಗರಿಕ ಸತ್ಕಾರ ಕಾರ್ಯಕ್ರಮದಲ್ಲಿ ಭಾಗವಹಿಸಿ ಮಾತನ್ನಾಡುತ್ತಿದ್ದ ಅವರು, ನಾನು ಗೋವಾಕ್ಕೆ ನಿಯಮಿತ ಭೇಟಿ ನೀಡುತ್ತಿರುವುದು ದೆಹಲಿಯ ಕೆಲವರಿಗೆ ಚಿಂತೆಯನ್ನು ತರಿಸಿದೆ. ಗೋವದಲ್ಲಿ ಚುನಾವಣೆ ಗೆಲ್ಲುವ ಅವರ ಮಹಾತ್ವಾಕಾಂಕ್ಷೆಗೆ ನಾನು ಅಡ್ಡಿಯಾಗುತ್ತೇನೆ ಎಂಬುದು ಅವರ ಭಯ. ಅವರು ಗೋವಾ ಮೇಲೆ ಕಣ್ಣಿಟ್ಟಿದ್ದಾರೆ ಎಂದು ಆಪ್ ಹೆಸರೆತ್ತದೆ ಪರಿಕ್ಕರ್ ಚಾಟಿ ಬೀಸಿದ್ದಾರೆ. 

ಪರಿಕ್ಕರ್ ತಮ್ಮ ಸಚಿವಾಲಯಕ್ಕಿಂತ ಗೋವಾ ಕಡೆಗೆ ಹೆಚ್ಚು ಗಮನ ನೀಡುತ್ತಾರೆ ಎಂದು ದೆಹಲಿ ಸಿಎಂ ಮುಖ್ಯಮಂತ್ರಿ ಅರವಿಂದ ಕೇಜ್ರಿವಾಲ್ ವ್ಯಂಗ್ಯವಾಡಿದ್ದರು. ಸ್ವಲ್ಪ ತಡವಾದರೂ ಖಡಕ್ ಆಗಿ ಕೇಜ್ರಿಗೀಗ ಟಾಂಗ್ ನೀಡಿದ್ದಾರೆ ಪರಿಕ್ಕರ್.

ತಾಜಾ ಸುದ್ದಿಗಳಿಗಾಗಿ ವೆಬ್ ದುನಿಯಾ ಮೊಬೈಲ್ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ.