Meghalaya Honeymoon Case: ನೂರಕ್ಕೆ ನೂರು ಇದು ಆಕೆಯೇ ಮಾಡಿದ್ದು: ಸೋನಮ್‌ ವಿರುದ್ಧ ಕೆಂಡಕಾರಿದ ಸಹೋದರ

Photo Courtesy X

ಮೇಘಾಲಯ: ಇಲ್ಲಿಯವರೆಗೆ ಸಿಕ್ಕಿರುವ ಸಾಕ್ಷ್ಯಗಳ ಪ್ರಕಾರ,  ರಾಜಾ ರಘುವಂಶಿ ಕೊಲೆ ಪ್ರಕರಣದಲ್ಲಿ ಸಹೋದರಿ ಸೋನಮ್‌ ಕೈವಾಡವಿರುವುದು ನನಗೆ 100% ಖಚಿತವಾಗಿದೆ ಎಂದು ಆಕೆಯ ಸಹೋದರ ಗೋವಿಂದ್ ಆರೋಪಿಸಿದ್ದಾರೆ. 

ಇದುವರೆಗೆ ಸೋನಮ್ ಅವರ ಕುಟುಂಬ ರಾಜ ರಘುವಂಶಿ ಹತ್ಯೆ ಪ್ರಕರಣದಲ್ಲಿ ನಮ್ಮ ಮಗಳ ಪಾತ್ರವಿಲ್ಲ ಎಂದು ವಾದಿಸುತ್ತಲೇ ಬಂದಿದ್ದರು. ಈ ಅಪರಾಧದಲ್ಲಿ ಅವರ ಭಾಗಿಯಾಗಿರುವ ಸಾಧ್ಯತೆಯನ್ನು ನಿರಾಕರಿಸಿದ್ದರು.

ಮೇಘಾಲಯದ ಕಮರಿಯಲ್ಲಿ ಪತಿಯ ಶವ ಪತ್ತೆಯಾದ 14 ದಿನಗಳ ನಂತರ ಉತ್ತರ ಪ್ರದೇಶದಲ್ಲಿ ಶರಣಾದ ಸೋನಮ್ ರಘುವಂಶಿ ಪ್ರಸ್ತುತ ಟ್ರಾನ್ಸಿಟ್ ರಿಮಾಂಡ್‌ನಲ್ಲಿದ್ದಾರೆ. ಪತಿಯ ಕೊಲೆಗೆ ಸಂಚು ರೂಪಿಸಿದ ಮತ್ತು ಅದಕ್ಕಾಗಿ ಕೊಲೆಗಾರರನ್ನು ನೇಮಿಸಿಕೊಂಡ ಆರೋಪ ಆಕೆಯ ಮೇಲಿದೆ. ಸೋನಮ್ ಪ್ರಿಯಕರ ರಾಜ್ ಸೇರಿದಂತೆ ಐವರನ್ನು ಇಲ್ಲಿಯವರೆಗೆ ಬಂಧಿಸಲಾಗಿದೆ.

ಇದೀಗ ಸೋನಾಮ್ ಸಹೋದರ ಗೋವಿಂದ, ಹತ್ಯೆಯಾದ ರಾಜ ರಘುವಂಶಿಯ ತಾಯಿಯನ್ನು ಭೇಟಿಯಾಗಿ ಮಾಧ್ಯಮದ ಮುಂದೆ ಪ್ರತಿಕ್ರಿಯಿಸಿದ್ದಾನೆ. ಈ ವೇಳೆ ತಾಜ ರಘುವಂಶಿಯ ಹತ್ಯೆ ಪ್ರಕರಣದಲ್ಲಿ ಸೋನಾಮ್ ಪಾತ್ರವಿರುವುದು ದೃಢವಾಗಿದೆ ಎಂದರು. 

ಇಲ್ಲಿಯವರೆಗೆ ಸಿಕ್ಕಿರುವ ಸಾಕ್ಷ್ಯಗಳ ಪ್ರಕಾರ, ಅವಳು ಈ ಕೊಲೆ ಮಾಡಿದ್ದಾಳೆ ಎಂದು ನನಗೆ 100% ಖಚಿತವಾಗಿದೆ. ಈ ಪ್ರಕರಣದ ಎಲ್ಲಾ ಆರೋಪಿಗಳು ರಾಜ್ ಕುಶ್ವಾಹ ಜೊತೆ ಸಂಬಂಧ ಹೊಂದಿದ್ದಾರೆ. ನಾವು ಸೋನಮ್ ರಘುವಂಶಿ ಜೊತೆಗಿನ ನಮ್ಮ ಸಂಬಂಧವನ್ನು ಮುರಿದುಕೊಂಡಿದ್ದೇವೆ. ನಾನು ರಾಜಾ ಅವರ ಕುಟುಂಬಕ್ಕೆ ಕ್ಷಮೆಯಾಚಿಸುತ್ತೇನೆ ಎಂದು ಗೋವಿಂದ್ ಹೇಳಿದರು.

ರಾಜ್ ಕುಶ್ವಾಹ ಜೊತೆಗಿನ ಸಂಬಂಧದ ಬಗ್ಗೆ ಸೋನಮ್ ತಮ್ಮ ತಾಯಿಗೆ ಎಂದಿಗೂ ತಿಳಿಸಿರಲಿಲ್ಲ ಎಂದು ಅವರು ಬಹಿರಂಗಪಡಿಸಿದರು. "ನಮಗೆ ತಿಳಿದಿದ್ದರೆ, ನಾವು ಇದು ಸಂಭವಿಸಲು ಎಂದಿಗೂ ಬಿಡುತ್ತಿರಲಿಲ್ಲ" ಎಂದು ಅವರು ಹೇಳಿದರು.